ភ្នំពេញៈ ព្រឹត្តិការណ៍ប្រកួតប្រដាល់គុនខ្មែរពិភពលោក ឬ Secon World Kun Khmer ចំនួន ៣ ថ្ងៃ ដើម្បីអបអរពិធីសម្ពោធវិមានឈ្នះឈ្នះ និងរំឭកខួបលើកទី ២ ០ឆ្នាំនៃ នយោបាយឈ្នះឈ្នះ បានបិទបញ្ចប់ជាមួយនឹងការរិះគន់មួយចំនួន ព្រោះកីឡាករបរទេស ដែលយកមកប្រកួតភាគច្រើនមានសមត្ថភាពខ្សោយៗ ធ្វើឲ្យកីឡាករកម្ពុជាជាម្ចាស់ផ្ទះសឹងតែទាំងអស់ទទួលបានជ័យជម្នះយ៉ាងងាយស្រួល គឺឈ្នះដោយវ៉ៃគូប្រកួតសន្លប់ចំនួន ២០ នាក់ ឈ្នះដោយពិន្ទុ ១ នាក់ ចាញ់ដោយវ៉ៃខុសបទបញ្ជា ២ នាក់ និងចាញ់ដោយពិន្ទុត្រឹម ១ នាក់ប៉ុណ្ណោះ។
ទាក់ទងនឹងការរិះគន់នេះ ថ្នាក់ដឹកនាំការប្រកួត និងសហព័ន្ធកីឡាប្រដាល់គុនខ្មែរក្នុងស្រុក បានឆ្លើយដាក់គ្នា ខណៈដែលកិច្ចការផ្ទៃក្នុងរបស់មន្ត្រីសហព័ន្ធកីឡាប្រដាល់គុនខ្មែរមួយចំនួនមិនពេញចិត្ត ឬគ្មានការគាំទ្រវត្តមានរបស់លោក ម៉ាម រ៉ា ជាប្រធានសហព័ន្ធកីឡាគុនខ្មែរអន្តរជាតិ។
ទិដ្ឋភាពនៃការរៀបចំ និងការប្រកួត ទោះបីមានលក្ខណៈរលូន ប៉ុន្តែលទ្ធផលដែលកីឡាករខ្មែរឈ្នះសឹងទាំងអស់នោះ ត្រូវបានគេមើលឃើញថា របៀបរៀបចំស្រដៀងទៅនឹងប្រទេសថៃដែលនិយមយកកីឡាករបរទេស ទៅចូលរួមប្រកួតក្នុងប្រទេសថៃ ៩៥ ភាគរយ គឺកីឡាករមកពីបរទេសត្រូវតែចាញ់ម្ចាស់ផ្ទះនោះ។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានថ្លែងថា៖ «ការរៀបនោះ ខ្ញុំគ្រាន់តែជាផ្នែកមួយ។ ការប្រកួតមើលឃើញថា មានភាពទាក់ទាញល្អណាស់ ប៉ុន្តែលក្ខណៈបច្ចេកទេស ឬការផ្គូផ្គង យើងក៏នៅមានកម្រិតមួយលំបាក ព្រោះយើងចង់ឲ្យមានប្រទេសមួយចំនួន ដែលកំពុងទទួលយកការហ្វឹកហាត់ប្រដាល់គុនខ្មែរ បានចូលរួមឲ្យបានច្រើន»។
លោកបានបន្តថា៖ «យើងធ្វើអ៊ីចឹង ទើបការប្រកួតនេះមានប្រទេសមកចូលរួម ដោយយើងបានសម្រួលទៅលើសមត្ថភាព ធ្វើឲ្យមានគូខ្លះមានកម្រិតសមត្ថភាពនៅឃ្លាតឆ្ងាយពីគ្នាមែន។ ទោះបីយ៉ាងណាបទពិសោធនៃការរៀបចំ យើងទើបតែបាន ២ លើកពិតជាមានការខ្វះចន្លោះណាមួយមិនខាន អ៊ីចឹងហើយសុំឲ្យមានការយោគយល់ តែការរិះគន់ខ្លះពីអ្នកទស្សនា ក៏ជាការដាស់តឿនឲ្យយើងមានបទពិសោធទៅការរៀបចំនៅលើកក្រោយដែរ»។
យ៉ាងណាក៏ដោយ ការផ្គូផ្គងកីឡាករ ត្រូវបានគេរិះគន់ថា គ្មានហ្វ៊ែផ្លេយ៍ ព្រោះការរៀបចំក្នុងនាមប្រដាល់គុនខ្មែរអន្តរជាតិ ប៉ុន្តែមន្ត្រីបច្ចេកទេស និងកីឡាករ គឺនៅក្នុងប្រដាល់គុនខ្មែរ ហើយលទ្ធផលដែលមហាជនរិះគន់ភាគច្រើនគេយល់ថា គណៈកម្មាធិការជាតិអូឡាំពិកកម្ពុជា (NOCC) ជាអ្នកទទួលខុសត្រូវ តែការពិតមន្ត្រីផ្គូផ្គងមកពីប្រដាល់គុនខ្មែរសឹងតែ ៩៩ ភាគរយ ខណៈដែលលោក ម៉ាម រ៉ា ជាប្រធានរៀបចំ ទំនងគ្មានសិទ្ធិ ឬអំណាចអ្វីដែលនិយាយទៅកាន់មន្ត្រីទាំងនោះ គេយកចិត្តទុកដាក់ស្តាប់នោះឡើយ។
លោក វ៉ាត់ ចំរើន អគ្គលេខាធិការ NOCC និងជាប្រធានអនុគណៈកម្មការកីឡាក្នុងព្រឹត្តិការណ៍នេះ បានថ្លែងថា៖ «សកម្មភាពកីឡា គឺមិនគប្បីមានជម្លោះទេ ព្រោះខ្លឹមសារនៃកីឡាគឺសាមគ្គី មិត្តភាព សហប្រតិបត្តិការ សុខភាព និងការទូត ហើយទាក់ទងទៅនឹងបច្ចេកទេសផ្គូផ្គងឬសម្រេចសេចក្តី ឬលទ្ធផលជ័យជម្នះ វាមិនមែនជាគោលដៅសំខាន់ ដែលយើងសម្រួចទៅរកនោះឡើយ»។
លោកបានបន្ថែមថា៖ «ខ្លឹមសារពិតប្រាកដនៃការប្រកួតនេះ គឺទី ១ គោរព និងទទួលការចូលរួមពីប្រទេសនានា តាមច្បាប់កីឡាអន្តរជាតិ ទី ២ គោរពគោលការណ៍តម្លាភាព ហ៊ែ្វផ្លេយ៍ ព្រោះព្រឹត្តិការណ៍ប្រកួតកីឡា ដែលល្អ គឺគោរពហ៊ែ្វផ្លេយ៍ គ្មានជម្លោះ គ្មានហិង្សា គឺមានន័យថា មិនមែនវ៉ៃគ្នា ដោយបង្ហូរឈាម ឬបែកបាក់គ្រោះថ្នាក់សន្លប់ធំ ទើបហៅថាល្អនោះទេ។ សម្រាប់ការរិះគន់យើងទទួលយក ប៉ុន្តែអ្នករិះគន់ខ្លះក៏មិនយល់ពីច្បាប់កីឡាដែរ ព្រោះគាត់អាចស៊ាំទៅនឹងការប្រកួតលក្ខណៈអាជីពក្នុងវិស័យឯកជន គឺប្រកួតវ៉ៃគ្នាដោយផ្តោតទៅនឹងតម្លៃខ្លួនជាចម្បង មិនសូវផ្តោតលើមិត្តភាព ឬសហប្រតិបត្តិការទេ»។
តាមប្រភពច្បាស់ការណ៍សុំមិនឲ្យបញ្ចេញឈ្មោះប្រាប់ថា មន្ត្រីជាន់ខ្ពស់មកពីសហព័ន្ធកីឡាប្រដាល់គុនខ្មែរ មិនសូវពេញចិត្តវត្តមានលោក ម៉ាម រ៉ា ជាប្រធានសហព័ន្ធកីឡាគុនខ្មែរអន្តរជាតិនោះទេ ប៉ុន្តែការចូលរួមក្នុងសកម្មភាពទាំងនោះ បានដោយសារតែគោរព និងយោគយល់ដល់លោក វ៉ាត់ ចំរើន ដែលជាអ្នកគ្រប់គ្រងរួមក្នុងកម្មវិធី។
ប្រភពដដែលបន្ថែមថា លោក ម៉ាម រ៉ា ធ្លាប់ជាប្រធានសហព័ន្ធកីឡាគុនខ្មែរប្រចាំនៅបារាំង ហើយធ្លាប់ស្និទ្ធជាមួយមន្ត្រីកីឡានៅក្រសួងអប់រំយុវជន និងកីឡា និងធ្លាប់ចេញលុយប៉ាវមន្ត្រីទាំងនោះ ទៅលេងប្រទេសបារាំង ព្រមទាំងជួយជុសជុល និងទិញសម្ភារការិយាល័យនៅក្នុងស្តាតផងដែរ ក្នុងគោលបំណងឲ្យមានការគាំទ្រលោកជាប្រធានសហព័ន្ធកីឡាគុនខ្មែរអន្តរជាតិ។ លុះបានសម្រេច លោកទំនងជាអស់លុយប៉ាវគេ គឺពួកមន្ត្រីនោះឈប់គាំទ្រ បន្ថែមលើសពីនេះលោក ម៉ាម រ៉ា ចាប់បានតួនាទីជាទីប្រឹក្សាជាន់ខ្ពស់ NOCC ក៏ធ្វើរឹកខ្ពស់ មិនសហការស្រួលជាមួយមន្ត្រីក្រសួងអប់រំ ដោយភាគច្រើនយកមន្ត្រីជាន់ខ្ពស់មួយចំនួនជាខ្នងបង្អែក៕