ភ្នំពេញ: លទ្ធផលប្រកួតគុនខ្មែររយៈពេល ៣ ថ្ងៃដើម្បីអបអរសាទរពិធីសម្ពោធវិមានឈ្នះ-ឈ្នះ និងដើម្បីរំឭកខួមលើកទី ២០ ឆ្នាំនៃទិវាសន្តិភាពដែល រាជរដ្ឋាភិបាលព្រះរាជាណាចក្រកម្ពុជា បានបញ្ចប់សង្គ្រាមស៊ីវិលនោះ ទទួលបានលទ្ធផលល្អគួរឲ្យជក់ចិត្តនិ ងកត់សម្គាល់។ ប៉ុន្តែ ការដែលកីឡាករកម្ពុជា ជាម្ចាស់ផ្ទះ បានឈ្នះច្រើនរហូតដល់ទៅជិត ៩០ ភាគរយនោះ នាំឲ្យមានមតិរិះគន់ថា ការរៀបចំមានរបៀបតាមលំនាំចាស់ ពោលគឺដូចការប្រកួតប្រដាល់គុនខ្មែរតាមសង្វៀនឯកជន រាល់ចុងសប្តាហ៍ដែរ ដោយគ្មានអ្វីប្លែកទេ។ ចំណែកលទ្ធផលប្រកួតបានបង្ហាញឲ្យឃើញថា កីឡាករកម្ពុជាមានសមត្ថភាពខ្លាំងជាងកីឡាករមកពីបរទេសដាច់ ហើយគណៈកម្មការរៀបចំផ្គូផ្គងមួយចំនួនឆ្លើយដាក់គ្នានៅពេលមានការរិះគន់ពីមហាជន។
លោកវ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការនៃគណៈកម្មការជាតិអូឡាំពិកកម្ពុជា ក៏ដូចជាប្រធានអនុគណៈកម្មការការប្រកួតកីឡាក្នុងព្រឹត្តិការណ៍នេះ មានប្រសាសន៍ថា៖ «គុនខ្មែរអន្តរជាតិមានគោលបំណងនៃការប្រកួតគឺចង់ផ្សព្វផ្សាយពីគុនខ្មែរទៅកាន់ពិភពលោក»។
លោកបានប្រាប់បន្តថា ៖ «ការរៀបចំគឺមានគោលបំណងរឹតចំណងមិត្តភាព សហប្រតិបត្តិការអន្តរជាតិ និងសុខភាព ហើយការប្រកួតកាត់បន្ថយឲ្យបាននូវបញ្ហាគ្រោះថ្នាក់ ដោយឈានឆ្ពោះទៅរកការប្រមែប្រមូលប្រទេសមួយចំនួននៅលើឆាកអន្តរជាតិឲ្យលេង និងស្គាល់ថា ប្រដាល់គុនខ្មែរគឺជាមរតករបស់ខ្មែរ ព្រមទាំងខ្មែរជាម្ចាស់ដើមនៃក្បាច់គុន ក៏ដូចជាទាក់ទាញឲ្យប្រភេទកីឡានេះមានវត្តមានក្នុងស៊ីហ្គេមលើកទី ៣២ ដែលព្រះរាជាណាចក្រកម្ពុជាធ្វើម្ចាស់ផ្ទះ»។
លោកវ៉ាត់ ចំរើន បានបញ្ជាក់ថា៖ «ទាក់ទងទៅនឹងសមត្ថភាពកីឡាករបរទេសវិញ វាពិតជាលំបាកស្វែងរកកីឡាករប្រកួតឲ្យមានសមត្ថភាពប្រហាក់ប្រហែលគ្នាណាស់ ពីព្រោះកីឡាករមកពីប្រទេសមួយចំនួនថ្មីថ្មោង ហ្វឹកហាត់គុនខ្មែរបានរយៈពេលតិចតួច ហើយចង់មកចូលរួម ហេតុនេះវាមានការលំបាក ពីព្រោះយើងសា្វគមន៍ពួកគេឲ្យចូលរួម»។
លោកបានបន្ថែមទៀតថា៖ «ទោះបីយ៉ាងណា ខ្លឹមសារនៃការរៀបចំ យើងមិនសំដៅទៅលើការប្រកួតខ្លាំង ឬបែកឈាមសន្លប់ធំបានថាល្អនោះទេ ប៉ុន្តែ គោលបំណងគឺការសា្វគមន៍ឲ្យមានការចូលរួមបង្ហាញពីប្រភេទកីឡាគុនខ្មែរ ទៅកាន់ពិភពលោក ខណៈដែលគុនខ្មែរក្នុងស្រុកយើងមានភាពរីកចម្រើន គួរឲ្យកត់សម្គាល់រួចទៅហើយ»។
ក្នុងការប្រកួតដែលមានរយៈពេល ៣ ថ្ងៃ មានការប្រកួត ៣ កម្រិត គឺប្រកួតកម្រិតស្ម័គ្រចិត្ត ពាក់កណ្តាលអាជីព និងប្រកួតអាជីពដោយបន្ថែមការប្រកួតដណ្តើមខ្សែក្រវាត់ផងដែរ។
លទ្ធផលពីការប្រកួតដណ្តើមខ្សែក្រវាត់ទម្ងន់ស្រាល កីឡាការិនីនូវ ស្រីពៅ មកពីក្លិបតាឡីមានរិទ្ធ ឈ្នះបានខ្សែក្រវាត់បន្ទាប់ពីឈ្នះកីឡាការិនី Ra Nini មកពីប្រទេសម៉ូរីតានី ក្នុងទម្ងន់ ៥១ គីឡូក្រាម។ កីឡាករសៀវ ង៉ុយ មកពីក្រសួងការពារជាតិ បានឈ្នះខ្សែក្រវាត់ក្នុងទម្ងន់ ៥៧ គីឡូក្រាម។
ចំណែកលទ្ធផលគូប្រដាល់ខ្លាំងៗរបស់កម្ពុជា បានបញ្ចប់ដោយកីឡាករម្ចាស់ផ្ទះឈ្នះកីឡាករបរទេស ក្នុងលក្ខណៈមិនសូវស្វិតស្វាញ ប៉ុន្តែឈ្នះដោយផ្តួលដៃគូឲ្យសន្លប់ ឬហៅថា ស៊ីផុយមានចំនួនច្រើនគួរឲ្យកត់សម្គាល់។
កីឡាករផល សោភ័ណ្ឌ មកពីតាឡីមានរិទ្ធ បានឈ្នះកីឡាករ Was Min Min មកពីមីយ៉ាន់ម៉ា ដោយពិន្ទុក្រោយការប្រកួត ៥ ទឹកពេញ។ កីឡាករ Was Min Min មានប្រវត្តិប្រកួតមិនដែលចាញ់សោះគឺទើបតែចាញ់ផល សោភ័ណ្ឌ ជាលើកដំបូងក្នុងអាជីព។ កីឡាករចាន់ រតនា បានចំណាយពេលចំនួន ៤ ទឹក ដើម្បីផ្តួលកីឡាករ Bard មកពីម៉ារ៉ុក ឲ្យបោះបង់ការប្រកួត។
កីឡាកររឿង សោភ័ណ្ឌ ដែលមកពីក្លិបមកុដរាជសីហ៍នៃសមាគមប្រដាល់ក្រសួងមហាផ្ទៃ បានចំណាយពេលតែ ១ ទឹក ដើម្បីផ្តួលកីឡាករថៃ Chak torong ដោយក្បាច់កណ្តាប់ដៃឲ្យសន្លប់ធំ។ កីឡាករសេង ស្រឿន មកពីក្លិបស្វាយរៀង បានផ្តួលកីឡាករ Adramsyat ឲ្យសន្លប់ត្រឹមទឹកទី ១។ ចំណែកកីឡាករឌុន រដ្ឋា មកពីក្លិបអេភូថងកីឡា បានចាញ់កីឡាករ Vovirin មកពីឥណ្ឌូនេស៊ី នៅទឹកទី ៤ ដោយខូចជើង។
ទាក់ទងលទ្ធផលខ្មែរឈ្នះច្រើននេះ លោកតែម ម៉ឺន ប្រធានគុនខ្មែរ និងជាអនុប្រធានទី ១ នៃគុនខ្មែរអន្តរជាតិ និងជាអ្នកមើលការខុសត្រូវ បាននិយាយថា៖ «លទ្ធផលបែបនេះមិនទាន់បានល្អគ្រប់ជ្រុងជ្រោយទេ ពីព្រោះមានកីឡាករមកពីបរទេសខ្លះមកប្រកួត មានបទពិសោធតិចតួច ប៉ុន្តែយើងមានគោលការណ៍ត្រូវតែស្វាគមន៍ឲ្យបានចូលរួម។ មួយវិញទៀត បទពិសោធនៃការរៀបចំព្រឹត្តិការណ៍បែបនេះ យើងទើបតែធ្វើបាន ២ លើកពោលគឺ ១ ឆ្នាំម្តង ភាពខ្វះចន្លោះនៅតែមាន ដែលជារឿងធម្មតា»៕