ភ្នំពេញ៖ ស្របពេលដែលសង្វៀនប្រដាល់ធំៗទាំង ៦ នៅតាមស្ថានីយទូរទស្សន៍បានបើកដំណើរវិញត្រឹម ៤ សង្វៀន ជាលក្ខណៈបិទទ្វារ ដើម្បីបង្ការ និងទប់ស្កាត់ជំងឺកូវីដ ១៩ នោះ សហព័ន្ធកីឡាប្រដាល់គុនខ្មែរ ក៏បានកាត់បន្ថយមន្រ្តីបច្ចេកទេសរបស់ខ្លួនចំនួន ៥០ ភាគរយផងដែរ គឺចៅក្រមផ្តល់ពិន្ទុធ្លាប់ដាក់ ៥ នាក់ តម្រូវតែ ៣ នាក់ប៉ុណ្ណោះ ហើយត្រូវបានរៀបចំឲ្យអង្គុយនៅឃ្លាតឆ្ងាយពីគ្នា។
ទោះជាយ៉ាងនេះក្តីចៅក្រម និងអាជ្ញាកណ្តាល ព្រមទាំងមន្ត្រីបច្ចេកទេសមួយចំនួនទៀតដែលត្រូវបានកាត់បន្ថយ នៅតែទទួលបានរបបឧបត្ថម្ភជាថវិកាពីកម្មវិធីប្រកួតដូចធម្មតា គឺលើកលែងតែមន្ត្រីបច្ចេកទេសនៅស្ថានីយចំនួន ២ មាន PNN និងប៉ុស្តិ៍លេខ ៥ ដែលមិនទាន់ដំណើរការប្រកួតឡើងវិញ គឺដាច់របប។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ ប្រាប់ភ្នំពេញប៉ុស្តិ៍ ថា៖ «យើងបានបើកឲ្យដំណើរការប្រកួតចំនួន ៤ ស្ថានីយ មានសង្វៀនបាយ័ន CBS (CNC) ថោន និងសង្វៀនអាស៊ីអាគ្នេយ៍ ប៉ុន្តែគណៈកម្មការរៀបចំការប្រកួតត្រូវបានកាត់បន្ថយឲ្យមានចំនួនតិចបំផុត គឺសឹង ៥០ ភាគរយ។ ជាមួយគ្នានេះ យើងមានចំណាត់ការឲ្យប្តូរវេនគ្នា ដើម្បីកុំឲ្យមានចំនួនជួបជុំគ្នាច្រើន ព្រមទាំងបន្ថែមនូវការប្រុងប្រយ័ត្នខ្ពស់ ផ្នែកការពារ និងអនាម័យពីគ្រូពេទ្យប្រចាំសង្វៀនផ្ទាល់ ក៏ដូចជាពិនិត្យកម្តៅ លាងដៃ និងមិនឲ្យនៅជិតគ្នា»។
លោកបានបន្ថែមថា៖ «ប្រាក់ចំណូលឧបត្ថម្ភ ដែលទទួលបានពីតម្លៃពលកម្ម ក្នុងការបំពេញការងាររបស់មន្ត្រីបច្ចេកទេសគ្រប់ផ្នែក គឺនៅតែទទួលបានជាធម្មតាដូចមុនៗ ទោះបីត្រូវបង្រួមចំនួន ឬកាត់បន្ថយ ៥០ ភាគរយក៏ដោយ ហើយនេះជាកាយវិការល្អ និងយកចិត្តទុកដាក់ពីអ្នកគ្រប់គ្រងកម្មវិធីប្រដាល់ប្រចាំសង្វៀន ដែលបានបើកចំនួន ៤ ស្ថានីយ និងខាងម្ចាស់ឧបត្ថម្ភគាំទ្រកម្មវិធីប្រកួត។ ខ្ញុំសូមកោតសរសើរខ្លាំងមែនទែន ដែលអាចនិយាយបានថា ជាមនោសញ្ចេតនាយោគយល់ និងអាណិតអាសូរ ដល់ក្រុមបច្ចេកទេសទាំងមូល»។
យ៉ាងណាក៏ដោយ នៅមានចៅក្រមអាជ្ញាកណ្តាល ដែលធ្លាប់បំពេញការងារនៅស្ថានីយទូរទស្សន៍ PNN និងសង្វៀនប៉ុស្តិ៍លេខ ៥ ពុំទទួលបានថវិកាឧបត្ថម្ភឡើយ ព្រោះសង្វៀនទាំង ២ នេះ មិនទាន់បានរៀបចំប្រកួតឡើងវិញទេ។
ទោះជាយ៉ាងនេះក្តី លោក តែម ម៉ឺន បញ្ជាក់ថា៖ «ខ្ញុំទទួលស្គាល់ពីបញ្ហាលំបាកនេះ ប៉ុន្តែមន្ត្រីបច្ចេកទេសនៅប៉ុស្តិ៍ PNN ក្តី និងសង្វៀនប៉ុស្តិ៍លេខ ៥ ក្តី គឺមួយចំនួនពួកគាត់ បម្រើការនៅប៉ុស្តិ៍ផ្សេងទៀតដែរ ហេតុនេះគាត់នៅតែទទួលបាន តាមការបំពេញការងារជាក់ស្តែងនោះ ហើយមន្ត្រីដែលទទួលការងារតែ ១ ប៉ុស្តិ៍ ត្រូវបាត់ចំណូលមួយរយៈសិន ព្រោះយើងគ្មានលទ្ធភាពជួយភ្លាមៗបានទេ គឺរង់ចាំតែបន្តិច ព្រោះនៅដើមខែឧសភានេះ សង្វៀន PNN និងប៉ុស្តិ៍លេខ ៥ នឹងបើកការប្រកួតបន្តឡើងវិញ»។
លោក សួន ប៊ុនសូត្រ គ្រូបង្វឹក និងជាម្ចាស់ក្លិបបក្សីស្លាបដែកបាននិយាយថា៖ «ខ្ញុំធ្វើជាចៅក្រមអាជ្ញាកណ្តាលនៅសង្វៀន PNN ដែលមិនទាន់បើកវិញ តែខ្ញុំក៏បានធ្វើជាមន្ត្រីបច្ចេកទេសនៅសង្វៀនថោន ១ ទៀត ដែលទទួលបានរបប ១ លើក ក្នុង ១ សប្តាហ៍ដែរ»។
លោកបន្តថា៖ «ក្រោយមានបញ្ហាមេរោគកូវីដ ១៩ នេះ ហើយសង្វៀនបើកការប្រកួតឡើងវិញ ខ្ញុំមានជីវភាពធម្មតា ដែលភាគច្រើនបានមកពីកូនៗបង្កើតចំនួនទាំង ៤ នាក់ បានឡើងប្រកួត និងសិស្សចំនួន ២ នាក់ទៀត បានឡើងប្រកួត ដោយទទួលបានតម្លៃខ្លួនប្រកួតដូចមុនៗ ជាពិសេសកូនខ្ញុំ សូត្រ ប៊ុនធី គឺទោះប្រកួតជាមួយកីឡាករខ្មែរគ្នាឯង ក៏នៅតែទទួលបានតម្លៃប្រកួតដូចវ៉ៃជាមួយកីឡាករបរទេស ដោយ ១ លើក ៤០០ ដុល្លារ»៕