.jpg)
បេក្ខភាពទាំង៤នាក់ ដែលត្រូវប្រកួតម៉ារ៉ាតុងដណ្តើមប្រាក់លាន ទម្ងន់ ៦០ គីឡូក្រាម នៅលើសង្វៀនថោន។
ភ្នំពេញ៖ កីឡាករ អេលីត សាន់, ណាម ម៉ូរ៉ាក់ និង ទូច ដាវីដ បានស្ថិតក្នុងបេក្ខភាពត្រូវប្រកួតម៉ារ៉ាតុងដណ្តើមប្រាក់លានទម្ងន់ ៦០ គីឡូក្រាម ក្នុងកម្មវិធី Mas Fight Cambodia នៅលើសង្វៀនថោននាល្ងាចថ្ងៃអាទិត្យនេះ គឺមានសមត្ថភាពប្រហាក់ប្រហែលគ្នា ដែលធ្វើឲ្យពួកគេហាក់មានការខ្លាចរអាគ្នាមុនការប្រកួតមកដល់ ប៉ុន្តែបេក្ខភាពទី៤ សេក ចាន់រាជ មិនត្រូវបានស្ថិតក្នុងការបារម្ភរបស់អ្នកទាំង ៣ នោះឡើយ។
លោក សៅ ប៊ុនធឿន ហៅគ្រូញ៉ែ ជាគ្រូបង្វឹករបស់ ណាម ម៉ូរ៉ាក់ បានប្រាប់ថា៖ «ចំពោះបេក្ខភាព ៣ នាក់ទៀត សុទ្ធតែខ្លាំងដូចគ្នា ហើយការប្រកួតតឹងតែងដូចគ្នា ប៉ុន្តែបើប៉ះ សេក ចាន់រាជ គឺអាចឈ្នះបាន ព្រោះកន្លងមកធ្លាប់ឈ្នះ ២ លើកមកហើយ។ បច្ចុប្បន្ន ម៉ូរ៉ាក់ កំពុងហ្វឹកហាត់ជាប្រចាំត្រៀមបានល្អ ហើយបើចាប់គូប៉ះ អេលីត សាន់ បែបលំបាកឈ្នះ ព្រោះអាចចាញ់ផ្នែកកម្លាំង ពីព្រោះគេក្មេងជាង កម្លាំងល្អជាង ហេតុនេះខ្ញុំជាគ្រូសង្ឃឹមឈ្នះត្រឹម ៥០ ភាគរយ ប៉ុន្តែបើប៉ះ ២ នាក់ទៀត គឺមិនលំបាកខ្លាំងទេ»។
កីឡាករ ណាម ម៉ូរ៉ាក់ ប្រកួតតាំងពីក្មេងបានចំនួនច្រើនជាង ៣០០ ដង ចំណែកការប្រកួត ៩ សប្តាហ៍ជាប់ៗគ្នានេះ ណាម ម៉ូរ៉ាក់ ឈ្នះ ៤ ចាញ់ ៤ និងស្មើ ១ ដង។ យ៉ាងណាក៏ដោយ នៅក្នុងការប្រកួតដណ្តើមប្រាក់លាននេះ ណាម ម៉ូរ៉ាក់ នៅមិនទាន់ដឹងថា ត្រូវជួបបេក្ខភាពរូបណានោះទេ ព្រោះអ្នកទាំង ៤ នេះ តម្រូវឲ្យធ្វើការចាប់ឆ្នោតមុនការប្រកួតជម្រុះ ដែលមាន ៣ ទឹក ហើយអ្នកឈ្នះ ត្រូវឡើងទៅប្រកួតផ្តាច់ព្រ័ត្រ ដោយប្រកួតគ្នា ៩ នាទីពេញ តាមច្បាប់ Mas Fight ខណៈអ្នកផ្តួលគូប្រកួតឲ្យសន្លប់ ទើបអាចក្លាយជាជើងឯក តែបើគ្មានអ្នកសន្លប់ចាត់ទុកថាស្មើគ្នា។
ចំណែក លោក ស៊ន អេលីត គ្រូបង្វឹក អេលីត សាន់ និយាយថា៖ «ក្នុងចំណោមអ្នកប្រដាល់ទាំង ៣ នាក់នេះ អេលីត សាន់ មានប្រៀបឈ្នះច្រើន ប៉ុន្តែបញ្ហាខកខានប្រកួតយូររបស់ អេលីត សាន់ ដោយសារជាប់ពិន័យនោះ ធ្វើឲ្យខ្ញុំមិនហ៊ានអះអាង ឬព្យាករពីលទ្ធផលមុនបានទេ ព្រោះអាចវាគាំង។ កាលពីមុន អេលីត សាន់ ធ្លាប់ឈ្នះ ណាម ម៉ូរ៉ាក់ ប៉ុន្តែពេលនេះ ណាម ម៉ូរ៉ាក់ មានវិជ្ជាគុនរីកចម្រើនជាងមុន គឺលំបាកឈ្នះដែរ ហេតុនេះបើជួប ទូច ដាវីត ឬ សេក ចាន់រាជ គឺសង្ឃឹមឈ្នះ ១០០ ភាគរយ»។
លោកបន្ថែមថា៖ «ក្នុងករណី អេលីត សាន់ ប៉ះ ណាម ម៉ូរ៉ាក់ វគ្គផ្តាច់ព្រ័ត្រ អាចនឹងមានអ្នកសន្លប់មិនខាន ព្រោះវ៉ៃសម្រុកគ្មានសំចៃកម្លាំងដូចគ្នា ប៉ុន្តែបើជួបគ្នានៅក្នុងវគ្គជម្រុះ ៣ ទឹក អេលីត សាន់ ពិតជាលំបាកទស្សន៍ទាយណាស់ គឺ ១ ចានទឹក ១ ចានគោកទេ»។
ចំណែក លោក អាត សំរិទ្ធ គ្រូបង្វឹក ទូច ដេវីត ប្រាប់ថា៖ «ដេវីត ហាត់បានល្អ ហើយខ្ញុំសង្ឃឹមឈ្នះត្រឹម ៥០ ភាគរយប៉ុណ្ណោះ ព្រោះកីឡាករជើងចាស់ ណាម ម៉ូរ៉ាក់ និង អេលីត សាន់ គឺជាឧបសគ្គធំក្នុងនោះ ណាម ម៉ូរ៉ាក់ ល្អគ្រប់ផ្នែក ចំណែក អេលីត សាន់ ល្អកណ្តាប់ដៃ ហេតុនេះគឺសុទ្ធតែលំបាកឈ្នះតែម្តង។ ដេវីត បើចេញកណ្តាប់ដៃបាន មានប្រសិទ្ធភាព គឺសង្ឃឹមឈ្នះខ្ពស់ ប៉ុន្តែយើងមានចំណុចខ្សោយដែរ លើបញ្ហាក្បាច់ជង្គង់ យើងវាយមិនទាន់គេទេ គឺពេលគេចាប់បានលំបាកណាស់ អាចចាញ់ប្រៀបតែម្តង»។
លោក ហ៊ិន សៃហេង អតីតអ្នកប្រដាល់សកល ហើយបច្ចុប្បន្នជាគណៈកម្មការចៅក្រមអាជ្ញាកណ្តាលបានប្រាប់ថា៖ «តាមខ្ញុំមើល ទូច ដេវីត និង អេលីត សាន់ នៅខ្ចីវស្សាមែន ប៉ុន្តែក្បាច់កណ្តាប់ដៃធ្ងន់ និងរហ័ស យើងមិនអាចប៉ាន់ស្មានបានទេ គឺអាចនឹងមានឱកាសផ្តួលគ្នាឲ្យសន្លប់បាន ប៉ុន្តែ ណាម ម៉ូរ៉ាក់ និង សេក ចាន់រាជ មានក្បាច់គុនចម្រុះ និងអាចគេចពីក្បាច់កណ្តាប់ដៃបាន ហើយលេងជង្គង់ក៏មានឱកាសឈ្នះបានដែរ»៕
