ភ្នំពេញ៖ អុកចត្រង្គជាប្រភេទកីឡាដ៏ពេញនិយមបែបប្រពៃណីរបស់ខ្មែរ ដែលមានការជួបគ្នាលេងជាអចិន្រៃ្តយ៍ទាំងនៅតាមគេហដ្ឋានទីប្រជុំជន ហើយក៏មានការប្រកួតជាលក្ខណៈតូច ធំ រហូតដល់ការប្រកួតថ្នាក់ជាតិ និងជ្រើសរើសស្តេចអុកជារៀងរាល់ឆ្នាំផងដែរ ប៉ុន្តែព្រឹត្តិការណ៍ទាំងនោះ ត្រូវបានផ្អាកអស់ទៅហើយ។
កុំថាឡើយការប្រកួតកីឡាអុកជ្រើសរើសជើងឯកថ្នាក់ជាតិ និងការប្រកួតអុក មហាសង្ក្រាន បុណ្យចូលឆ្នាំប្រពៃណីជាតិខ្មែរ ត្រូវបានផ្អាក គឺសូម្បីតែទីតាំងលេងអុកជាលក្ខណៈកម្សាន្តប្រចាំថ្ងៃ នៅតាមគេហដ្ឋាន និងនៅតាមរោងកាហ្វេ ពិសេសកាហ្វេស្រីអូន ដែលជាទីតាំងជួបគ្នារបស់ក្រុមជម្រើសជាតិ ក៏ត្រូវបានផ្អាកសកម្មភាពដូចគ្នា។
លោក គ្រួច ចន្ថារិទ្ធ ហៅ ត្រេន ដែលជាគ្រូកីឡាអុកចត្រង្គជម្រើសជាតិធ្លាប់មានប្រវត្តិប្រកួតល្បីល្បាញតាំងពីឆ្នាំ ១៩៨០ នោះ បានឲ្យភ្នំពេញប៉ុស្តិ៍ដឹងថា ដោយមានបម្រាមពីក្រសួងសុខាភិបាល និងដើម្បីការពារសុវត្ថិភាពពីការឆ្លងរាលដាលនៃជំងឺកូវីដ ១៩ នោះ ក្រុមកីឡាអុកចត្រង្គកម្ពុជា សម្រេចផ្អាកការជួបជុំហ្វឹកហាត់ និងលេងកម្សាន្តផ្សេងៗ រាប់ទាំងជាលក្ខណៈឯកជនទាំងអស់។
លោក គ្រួច ចន្ថារិទ្ធ បានបន្ថែមថា៖ «គម្រោងហ្វឹកហាត់សម្រាប់ប្រកួតក្នុងព្រឹត្តិការណ៍ធំៗប្រចាំឆ្នាំចំនួន ៣ មានពានរង្វាន់សហព័ន្ធ ការប្រកួតជម្រើសជើងឯកជាតិ និងពានរង្វាន់មហាចង្ក្រានបុណ្យចូលឆ្នាំប្រពៃណីជាតិខ្មែរ ត្រូវបានផ្អាកជាបណ្តោះអាសន្នដូចប្រភេទកីឡាផ្សេងៗដែរ ព្រោះការជួបជុំគ្នានៅកន្លែងលេងអុកនេះ អាចមានផលប៉ះពាល់ច្រើននៃការឆ្លងជំងឺនេះ»។
គ្រូបង្វឹកជម្រើសជាតិរូបនេះបានលម្អិតថា៖ «ទាំងអ្នកលេងអុក ព្រមទាំងអ្នកឈរមើល និងអង្គុយមើល គឺនៅជិតៗគ្នាបំផុត ពិសេសការលេងអុកតែងនិយាយស្រែកឡូឡា អ៊ីចឹងបើមាននរណាម្នាក់មានផ្ទុកវីរុសកូវីដ ១៩ គឺងាយឆ្លងណាស់ ហេតុនេះទើបយើងសម្រេចបិទតែម្តង ដើម្បីចូលរួមចំណែកទប់ស្កាត់ការរីករាលដាលនៃជម្ងឺកូវីដ ១៩ ព្រោះយើងមើលឃើញថា ការលេងអុកមានហានិភ័យឆ្លងច្រើនជាងប្រភេទកីឡាដទៃ»។
យ៉ាងណាក៏ដោយ លោក គុជ គឹមឡុង ប្រធានសហព័ន្ធកីឡាកីឡាអុកចត្រង្គកម្ពុជាបានឲ្យដឹងថា ប្រភេទកីឡាអុកចត្រង្គកម្ពុជាត្រូវបានគណៈកម្មាធិការជាតិអូឡាំពិកកម្ពុជា (NOCC) ត្រៀមបញ្ចូលក្នុងការប្រកួតស៊ីហ្គេមលើកទី ៣២ ក្នុងឆ្នាំ ២០២៣ ដែលប្រទេស កម្ពុជា ធ្វើជាម្ចាស់ផ្ទះ។
លោក គុជ គឹមឡុង បានប្រាប់បន្ថែមថា៖ «ជាមួយគ្នានេះ ជាគោលការណ៍របៀបនៃការលេង ឬច្បាប់ប្រកួតបានគ្រោងនឹងដាក់ជាភាសាអង់គ្លេស ដើម្បីបញ្ជូនគ្រូបង្វឹកទៅផ្សព្វផ្សាយពីកីឡាអុកចត្រង្គនេះ នៅតាមបណ្ដាប្រទេសក្នុងអាស៊ាន ប៉ុន្តែបញ្ហាកូវីដ ១៩ វាបានប៉ះពាល់ អ៊ីចឹងយើងនឹងអនុវត្តតាមការណែនាំរបស់ក្រសួងជំនាញសិន»។
ជាមួយគ្នានេះ លោក វ៉ាត់ ចំរើន អគ្គលេខាធិការ NOCC បានឲ្យដឹងដែរថា៖ «ពេលនេះប្រទេស មីយ៉ាន់ម៉ា ឡាវ វៀតណាម និងប្រទេសមួយចំនួនទៀត នៅក្នុងតំបន់អាស៊ាន កំពុងតែគាំទ្រប្រភេទកីឡាអុកចត្រង្គកម្ពុជានេះជាបន្តបន្ទាប់ ហើយក្នុងការដាក់បញ្ចូលកីឡាអុកចត្រង្គ ទៅក្នុងការប្រកួតកីឡាស៊ីហ្គេមលើកទី ៣២ ឆ្នាំ ២០២៣ នៅកម្ពុជា ហើយកម្ពុជាដែលជាម្ចាស់ដើមនៃប្រភេទកីឡានេះ ត្រូវតែចេញទៅបង្រៀនគេពីនីតិវិធីនៃការលេង ដែលក្នុងកីឡាហៅថា ច្បាប់ល្បែង»៕