.jpg)
សកម្មភាពប្រកួតរវាងក្រុម U23 កូរ៉េខាងត្បូងជាមួយក្រុមម្ចាស់ផ្ទះកម្ពុជាកាលពីថ្ងៃអាទិត្យ។ រូបថត FFC
ភ្នំពេញ: គ្រូបង្វឹកក្រុមជម្រើសជាតិកូរ៉េខាងត្បូងអាយុក្រោម ២៣ ឆ្នាំលោក Hag Bum Kim ហាក់បានបន្ទោសទៅលើមេឃដែលបានបង្អុរទឹកភ្លៀងរំខានដល់ក្រុមរបស់លោកក្នុងការបំពេញមហិច្ឆតាយកឈ្នះលើក្រុមម្ចាស់ផ្ទះកម្ពុជាឲ្យបានច្រើនជាង ៦ គ្រាប់សម្រាប់ការប្រកួតជម្រុះប្រចាំពូល H ពានរង្វាន់ AFC U23 Championship 2020 មុនពេលពួកគេត្រូវប៉ះក្រុមខ្លាំង U23 របស់អូស្ត្រាលីថ្ងៃអង្គារនេះ។
បើទោះបីជាការប្រកួតនៅពហុកីឡដ្ឋានជាតិកាលពីយប់ថ្ងៃអាទិត្យកន្លងមកនេះក្រុម U23 កូរ៉េខាងត្បូងបានលត់ក្រុមម្ចាស់ផ្ទះកម្ពុជារហូតដល់ ៦-១ ដើម្បីបន្តឈរនៅកំពូលតារាងប្រចាំពូល H នេះ ប៉ុន្តែលោក Hag Bum Kim បាននិយាយក្នុងសន្និសីទកាសែតក្រោយការប្រកួតថា៖ «ដោយសារថ្ងៃនេះមេឃភ្លៀងធ្វើឲ្យកីឡាកររបស់យើងរអិលច្រើន ប៉ុន្តែយើងនៅតែធ្វើបានល្អ»។
តាមរយៈការប្រកួតនៅពហុកីឡដ្ឋានជាតិជាមួយនឹងទីលានសើមដោយសារតំណក់ទឹកភ្លៀងនោះ ក្រុមកូរ៉េបានដាក់សម្ពាធក្រុមកម្ពុជាយ៉ាងខ្លាំង ហើយពួកគេមានឱកាសមាសក្នុងការស៊ុតបាល់ទម្លុះសំណាញ់ទីក្រុមកម្ពុជាជិត ១០ គ្រាប់ ប៉ុន្តែពួកគេរកបានតែ ២ គ្រាប់ទេ ខណៈគ្រាប់បាល់មួយចំនួនទៀត ពួកគេស៊ុតខុសគោលដៅ និងខ្លះទៀតត្រូវបានអ្នកចាំទី កែវ សុខសិលា សង្គ្រោះបានសម្រេច។
ចំណែកនៅតង់ទី ២ ក្រុមកូរ៉េរកបាន ៤ គ្រាប់បន្ថែមទៀត ហើយក្នុងនោះ អ៊ុក សុវណ្ណ ក៏បានភ្លាត់ធ្វើឲ្យបាល់ចូលទីខ្លួនឯង ១ គ្រាប់នៅនាទីទី ៨០ ផងដែរ។ ចំណែក ១ គ្រាប់របស់កម្ពុជារកបានដោយខ្សែប្រយុទ្ធ ណារ៉ុង កក្កដា នៅនាទីទី ៦០។
យ៉ាងណាក៏ដោយលោក Hag Bum Kim ដែលបានដឹកនាំក្រុម U23 កូរ៉េ លត់ Chinese Taipei ៨-០ ក្នុងការប្រកួតបើកឆាកកាលពីថ្ងៃសុក្រនោះបានសរសើរទៅដល់ឆន្ទៈប្រកួតដ៏ពុះកញ្ជ្រោលរបស់ក្រុមកម្ពុជាផងដែរ។ លោកបានធ្វើការប្រៀបធៀបយ៉ាងដូច្នេះថា៖ «ក្រោយពីការប្រកួតទាំង ២ របស់យើង យើងយល់ថាការលេងជាមួយក្រុមកម្ពុជាមានការលំបាកជាងលេងជាមួយ Chinese Taipei ព្រោះកម្ពុជាមានឆន្ទៈចង់ឈ្នះខ្លាំងជាង»។
ចំណែកលោក Felix Dalmas គ្រូបង្វឹកក្រុមកម្ពុជាក៏មិនបានបង្ហាញភាពឈឺចាប់ចំពោះការដឹកនាំក្រុមកម្ពុជាចាញ់ក្រុម U23 អូស្ត្រាលី ៦-០ និងបន្តចាញ់ក្រុម U23 កូរ៉េ ៦-១ លើកនេះទេ ដោយលោកបាននិយាយថា៖ «ដូចរាល់ដងអ៊ីចឹង ខ្ញុំអាចនឹងនិយាយដដែលៗថា ខ្ញុំ ស្រឡាញ់ និងជឿជាក់ទៅលើកីឡាករកម្ពុជាពួកគេស្ថិតនៅក្នុងដំណាក់កាលអភិវឌ្ឍខ្លួនទៅមុខ»។
លោក Felix បានបន្ថែមថា៖ «ការយកជ័យជម្នះជូនកម្ពុជាគឺតែងតែជាគោលបំណងសំខាន់របស់យើង ហើយថ្ងៃនេះក្រៅពីលទ្ធផលខ្ញុំឃើញពីភាពរីកចម្រើននៃក្រុម ហើយយើងតែងតែចង់ឃើញស្នាមញញឹមអ្នកគាំទ្ររបស់យើងដែលបានមកទស្សនាផ្ទាល់ និងនៅតាមគេហដ្ឋាន»។
ដោយឡែកនៅថ្ងៃអង្គារនេះក្រុម U23 ជម្រើសជាតិកម្ពុជានឹងត្រូវធ្វើការប្រកួតជាមួយក្រុម Chinese Taipei នៅយប់ម៉ោង ៨។ បើទោះបីជានេះគ្រាន់តែជាការប្រកួតបង្គ្រប់កិច្ចក្តី ប៉ុន្តែនេះជាជំនួបដ៏ល្អសម្រាប់ក្រុមទាំង ២ ក្នុងការបញ្ចេញសមត្ថភាពរកគ្រាប់បាល់ទៅតាមកម្រិតនៃការលេងដែលមានភាពប្រហាក់ប្រហែលគ្នាគឺវាមិនមែនមានគម្លាតគ្នាឆ្ងាយដូចពេលក្រុមកម្ពុជា និង Chinese Taipei ជួបក្រុមកូរ៉េ និងអូស្ត្រាលីកន្លងមកនោះទេ។
ចំណែកក្រុម U23 អូស្ត្រាលី និង U23 កូរ៉េដែលសុទ្ធតែមិនទាន់ស្គាល់ការចាញ់នោះនឹងត្រូវប្រកួតគ្នានៅល្ងាចម៉ោង ៥ ថ្ងៃអង្គារនេះ ដើម្បីរកក្រុមឈ្នះ ទទួលបានលេខ ១ ប្រចាំពូល H នេះឡើងទៅប្រកួតនៅវគ្គបន្តទៀតនៃពាន AFC U23 Championship 2020 នេះ ខណៈក្រុមលេខ ២ ត្រូវស្ថិតនៅក្នុងការរង់ចាំពីការវាយតម្លៃរបស់គណៈកម្មការ ថាតើពួកគេបានជាប់ជាក្រុមលេខ ២ ល្អទាំង ៤ ក្រុម ដើម្បីបានទៅវគ្គបន្តទៀតឬក៏យ៉ាងណា?
