.jpg)
លោក Rolando Castellano ប្រាប់បច្ចេកទេសប្រកួតដល់កីឡាករកម្ពុជា។
ភ្នំពេញ៖ គ្រូប្រដាល់សកលជនជាតិគុយបា លោក Rolando Castellano Rodriguez ដែលធ្លាប់ទទួលបានប្រាក់ខែជាង ២ ០០០ ដុល្លារ ក្នុង ១ ខែៗ សម្រាប់ការបង្វឹកក្រុមប្រដាល់សកលជម្រើសជាតិកម្ពុជានោះ នៅតែបន្តសហការជាមួយសហព័ន្ធកីឡាប្រដាល់សកលកម្ពុជា ទោះជាលោកបានផុតកិច្ចសន្យាជាមួយក្រសួងអប់រំ យុវជន និងកីឡា អស់រយៈពេលជាង ៨ ឆ្នាំហើយក៏ដោយ។
បើទោះបីជាការងារស្ម័គ្រចិត្តជាគ្រូបង្វឹកនេះ មិនទទួលប្រាក់ឈ្នូលដូចកាលពីអតីតកាលក្ដី ប៉ុន្តែដោយសារការស្រឡាញ់ចូលចិត្តកីឡាករ និងប្រទេសកម្ពុជា លោក Rolando Castellano បានសម្រេចចិត្តនៅបន្តជាគ្រូបង្វឹកដដែល ដោយទទួលបានកម្រៃប្រចាំខែដូចគ្រូបង្វឹកក្នុងស្រុក គឺប្រហែល ១,៩ លានរៀល។
ជាមួយគ្នានេះ លោក Rolando Castellano សុខចិត្តបន្ថែមការបង្វឹកតាមក្លិបឯកជននានា ដោយទទួលបានកម្រៃតាមការយោគយល់បន្តិចបន្តួច ដើម្បីជីវភាពសាមញ្ញប៉ុណ្ណោះ។ ទោះជាយ៉ាងនេះក្តី នៅក្នុងបទសម្ភាសជាមួយ ភ្នំពេញ ប៉ុស្តិ៍ លោក Rolando Castellano ប្រាប់ថា លោកនឹងបន្តកិច្ចការជាគ្រូបង្វឹកតាមរបៀបនេះ ចំនួន ១០ ឆ្នាំបន្តទៀត ដើម្បីជួយឱ្យប្រដាល់សកលកម្ពុជាមានភាពរីកចម្រើន។
គ្រូបង្វឹកវ័យ ៥០ ឆ្នាំ លោក Rolando Castellano បានអះអាងថា៖ «បច្ចុប្បន្នក្រៅពីបង្វឹកឱ្យក្រុមជម្រើសជាតិ ក្នុងរយៈពេលប្រមូលផ្តុំ ខ្ញុំបានទៅបង្វឹកឱ្យក្លិបប្រដាល់ឯកជននានា ក្នុងប្រទេសកម្ពុជា ហើយទទួលបានកម្រៃមិនកំណត់នោះទេ គឺតាមគេឱ្យ ព្រោះការងារនេះ ខ្ញុំចង់ធ្វើ និងស្រឡាញ់ ដើម្បីឱ្យតែមានកីឡាករឡើងប្រកួតមានគុណភាពល្អ គឺខ្ញុំពេញចិត្តណាស់ទៅហើយ»។
លោកបានបន្ថែមថា៖ «ការងារនេះខ្ញុំពេញចិត្ត ដោយមិនគិតពីប្រាក់ចំណូលជាធំនោះទេ ប៉ុន្តែទទួលបានមកវិញដោយសមរម្យផងដែរ ព្រោះគេតែងតែផ្តល់ឱ្យខ្ញុំបានសមរម្យ អាចរស់បានក្នុងជីវភាពសាមញ្ញនៅប្រទេសកម្ពុជា។ កាលខ្ញុំជាកីឡាករ នៅប្រទេសគុយបា ខ្ញុំធ្លាប់ឈ្នះមេដាយ និងពានទាំងអស់ ទាំងថ្នាក់ជាតិ និងអន្តរជាតិ មានកម្រិតតំបន់ និងទ្វីបសរុបចំនួន ១៥ មេដាយ»។
លោកបានទម្លាយថា៖ «ក្នុងឋានៈជាគ្រូបង្វឹក ដែលរដ្ឋាភិបាលគុយបា បញ្ជូនមកបង្វឹកនៅក្រៅប្រទេស គឺមានប្រាក់ខែជិត ៣ ០០០ ដុល្លារឯណោះ ប៉ុន្តែមានការបែងចែកច្រើនមិនមែនបានមកយើងជាសាមីខ្លួនទាំងអស់នោះឡើយ។ ចំណែកស្ថានភាពរស់នៅរបស់ខ្ញុំនៅក្នុងប្រទេសកម្ពុជា ទោះបីជាប្រាក់ចំណូលបានតិច គឺបានផ្ទាល់ទាំងអស់មកដល់ដៃខ្ញុំ ហើយបន្ថែមលើនេះ ខ្ញុំចង់ជួយកីឡាករប្រដាល់សកលកម្ពុជា ឱ្យមានភាពលេចធ្លោលើឆាកអន្តរជាតិ ដោយខ្ញុំចង់នៅបន្ត ១០ ឆ្នាំទៀត»។
លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជាបានប្រាប់ថា សហព័ន្ធក៏ដូចជាក្រសួងអប់រំ យុវជន និងកីឡា ពេញចិត្តចំពោះវត្តមានរបស់លោកគ្រូ Rolando Castellano។ ស្នាដៃរបស់គាត់ ទទួលបានលទ្ធផលល្អ ដោយសហការជាមួយគ្រូបង្វឹកក្នុងស្រុក គឺលោក វ៉ែន សុផល នាំឱ្យប្រដាល់សកលកម្ពុជាទទួលបានមេដាយពីអន្តរជាតិជាបន្តបន្ទាប់ ពិសេសធ្លាប់ឈ្នះមេដាយប្រាក់ ១ ពីស៊ីហ្គេមឆ្នាំ ២០១៥ នៅសិង្ហបុរី ឈ្នះមេដាយសំរឹទ្ធ ៣ ឆ្នាំ ២០១៧ នៅម៉ាឡេស៊ី និងស៊ីហ្គេម ឆ្នាំ ២០១៩ នៅហ្វីលីពីនបានសំរឹទ្ធចំនួន ៥។
លោក ប៊ុយ សុភ័ណ្ឌ បន្ថែមថា៖ «នៅលើពិភពលោក គ្រូបង្វឹកប្រដាល់សកលគេ ចែកជា ៣ កម្រិត គឺផ្កាយ ១ ផ្កាយ ២ និងផ្កាយ ៣ ហើយកម្រិតផ្កាយ ១ ដែលចេញមកបង្វឹកក្រៅប្រទេសក៏មានតម្លៃពលកម្មចាប់ពីខ្ទង់ ៣ ០០០ ដុល្លារ ក្នុង ១ ខែ និងមានបន្ថែមការស្នាក់នៅទៀតផង។ ចំណែកលោក Rolando Castellano ដែលស្ម័គ្រចិត្តជាគ្រូបង្វឹកឱ្យក្រុមជម្រើសជាតិសព្វថ្ងៃ គាត់ទទួលបានប្រហែលជិត ៥០០ ដុល្លារប៉ុណ្ណោះ ក្នុង ១ ខែ ក្នុងអំឡុងពេលប្រមូលផ្តុំក្រុមជម្រើសជាតិប្រចាំឆ្នាំ ហើយនេះជាការលះបង់មួយដ៏ល្អរបស់គាត់ ដែលស្រឡាញ់ប្រដាល់សកលកម្ពុជា»៕
