ភ្នំពេញៈ សិក្ខាកាមចំនួន ៣៥ នាក់ (ស្រី ១២ នាក់) មកពី ១១ ក្លិប ដែលភាគច្រើនជាអត្តពលិកស្ថិតក្រោមចំណុះរបស់សហព័ន្ធកីឡាសូហ្វតិន្នីសកម្ពុជា បានបន្ថែមជំនាញថ្មីមួយទៀត គឺគ្រូបង្វឹកមូលដ្ឋាន និងអាជ្ញាកណ្តាល បន្ទាប់ពីអ្នកទាំងនេះ ទទួលបានការបណ្តុះបណ្តាលពីគ្រូបង្វឹកមកពីជប៉ុន និងកូរ៉េខាងត្បូង កាលពីចុងឆ្នាំ ២០១៨ កន្លងមកនេះ។
បើទោះបីជាវគ្គបណ្តុះបណ្តាលគ្រូបង្វឹកកម្រិតមូលដ្ឋាន និងអាជ្ញាកណ្តាលថ្នាក់ជាតិកីឡាសូហ្វតិន្នីសកម្ពុជានេះ បានធ្វើឡើងត្រឹម ៤ ថ្ងៃ គឺចាប់ផ្តើមពីថ្ងៃ ២៨ និងបានបញ្ចប់នៅថ្ងៃទី ៣១ ខែធ្នូ ឆ្នាំ ២០១៨ ប៉ុន្តែក្រោមការបង្ហាត់បង្ហាញដោយផ្ទាល់ពីលោក គីម ហ្គាន់ជុង ជាអនុប្រធានអាជ្ញាកណ្តាលរបស់សហព័ន្ធកីឡា សូហ្វតិន្នីសកូរ៉េខាងត្បូង និងលោក ម៉ាសាតូ អូហ្គីវ៉ារ៉ា គ្រូបង្វឹកក្រុមយុវជនមកពីជប៉ុន បានធ្វើឲ្យ សិក្ខាកាមភាគច្រើន មានការយល់ដឹងបានច្រើន។
តាមរបាយការណ៍របស់លោក ជា សែនវិស្សុត អគ្គលេខាធិការសហព័ន្ធកីឡាសូហ្វតិន្នីសកម្ពុជា បានឲ្យដឹងថា វគ្គបណ្តុះបណ្តាលនេះ មានការសិក្សាទៅលើបច្ចេកទេសមូលដ្ឋាន, ប្រវត្តិសង្ខេបរបស់កីឡាសូហ្វតិន្នីស, ការបណ្តុះបណ្តាលឧបនិស្ស័យក្មេងៗកម្រិតបឋមសិក្សា, ហ្វឹកហាត់កម្លាំងកាយសម្បទា និងបច្ចេកទេស ជំនាញមូលដ្ឋានគ្រឹះ (អនុវត្តផ្ទាល់លើទីលាន) រៀបចំផែនការហ្វឹកហាត់ និងសិក្សាបទបញ្ជានៃការប្រកួត ហើយតាមរយៈការសិក្សានេះ គឺសិក្ខាកាម មានការយល់ដឹងពី ៧០ ភាគរយទៅ ៨៥ ភាគរយ លើចំណុចមូលដ្ឋានទាំង ៦ នេះ។
ជាមួយគ្នានេះ លោក គីម ហ្គាន់ជុង លោក ម៉ាសាតូ អូហ្គីវ៉ារ៉ា និងលោក ជា ប៊ុនហេង អនុប្រធានសហព័ន្ធកីឡាសូហ្វតិន្នីសកម្ពុជា ដែលជាគ្រូឧទ្ទេសម្នាក់ដែរ ក្នុងវគ្គនេះ បានធ្វើការវាយតម្លៃជារួមថា សិក្ខាកាម ៥០ ភាគរយ ទទួលបាននិទ្ទេសល្អ ៣៥ ភាគរយ មធ្យម និង ១៥ ភាគរយ និទ្ទេសក្រោមមធ្យម។
លោក ជា សែនវិស្សុត បានបន្ថែមថា៖ «វគ្គបណ្តុះបណ្តាល ៤ ថ្ងៃនេះ ទទួលបានជោគជ័យ ហើយដំណើរការនៃការសិក្សាប្រព្រឹត្តទៅបានរលូន និងទាន់ពេលវេលា ដែលបានកំណត់ក្នុងកម្មវិធីសិក្សា ប៉ុន្តែបើសិនជាក្រសួង អប់រំ យុវជន និងកីឡា ព្រមទាំង សប្បុរសជន ក្រុមហ៊ុននានា ចូលរួមសហការឧបត្ថម្ភបន្ថែមនោះ វគ្គបណ្តុះបណ្តាលឆ្នាំ ២០១៩ នឹងកាន់តែបានលទ្ធផលល្អប្រសើរជាងឆ្នាំ ២០១៨ ជាមិនខាន»។
ចំណែក លោក ជា ប៊ុនហេង បានថ្លែងថា៖ «សូហ្វតិន្នីសរបស់យើង ទើបតែបានបើកវគ្គបណ្តុះបណ្តាលគ្រូបង្វឹកកម្រិតមូលដ្ឋាន និងអាជ្ញាកណ្តាលថ្នាក់ជាតិ ប៉ុន្តែយើងនឹងព្យាយាមបើកឲ្យមានវគ្គបណ្តុះបណ្តាលបន្ថែមទៀត ជាពិសេសយើងនឹងជំរុញឲ្យធនធានរបស់យើងឈានទៅដល់ការសិក្សាវគ្គអាជ្ញាកណ្តាលអន្តរជាតិ ព្រោះមកដល់ពេលនេះ សហព័ន្ធយើងនៅមិនទាន់មានអាជ្ញាកណ្តាលអន្តរជាតិ នៅឡើយទេ»៕