The Phnom Penh Post Search

Search form

គ្រូ​ជម្រើសជាតិ​កម្ពុជា ចង់​យក​អ្នក​លេង​នៅ​​ ម៉ាឡេស៊ី ទៅ​ប្រកួត​ពានស្តេច​ប្រ៊ុយណេ តែ​មិន​អាច

Content image - Phnom Penh Post
កីឡាករ ប្រាក់ មុន្នីឧត្តម (លេខ​៧) ចាន់ វឌ្ឍនាកា (លេខ​ ១១) ឃួន ឡាបូរ៉ាវី (លេខ​ ៩) បាន​ទៅ​ស្វាគមន៍ កែវ សុខផេង ​ក្នុង​ពេល​ពួក​គេ​បង្ហាញ​ខ្លួន​រួម​គ្នាឲ្យ​ក្រុម​ជម្រើសជាតិ​កម្ពុជា កន្លង​មក។ ស្រេង ម៉េងស្រ៊ុន

គ្រូ​ជម្រើសជាតិ​កម្ពុជា ចង់​យក​អ្នក​លេង​នៅ​​ ម៉ាឡេស៊ី ទៅ​ប្រកួត​ពានស្តេច​ប្រ៊ុយណេ តែ​មិន​អាច

ភ្នំពេញៈ កីឡាករ​​​មាន​ទម្រង់​លេង​ល្អ​ចំនួន​ ២២ ​នាក់ ត្រូវ​បាន​លោក ​ប្រាក់ សុវណ្ណារ៉ា កោះ​ហៅ​ជា​ថ្មី ​ឲ្យ​ចូល​រួម​ជាមួយ​ក្រុម​ជម្រើសជាតិ​កម្ពុជាអាយុ​ក្រោម​ ២១ ​ឆ្នាំ (U21) ដើម្បី​ត្រៀម​ទៅ​ចូល​រួម​​ការ​ប្រកួត​ពាន​រង្វាន់​ស្តេច​ប្រ៊ុយណេ Hassanal Bolkiah Trophy 2018 ដែល​នឹង​ប្រព្រឹត្ត​ទៅ​នៅ​លើ​ទឹក​ដី​ប្រទេស​ប្រ៊ុយណេ ចាប់​ដំណើរ​ការ​ពី​ថ្ងៃ​ទី ​២៣ ខែមេសា ដល់​ថ្ងៃ​ទី​ ៦ ខែឧសភា ខាងមុខ​នេះ។

កីឡាករ​វ័យ​ក្មេងមាន​អាយុ​ក្រោម ​២១ ​ឆ្នាំ ប្រាក់ ធីវ៉ា, អ៊ិន សូដាវីដ, អ៊ន ចាន់ប៉ូលីន, អ៊ុក សុវណ្ណ, សឿត បារាំង, ស៊ិន កក្កដា, យ៉ើ សាហ្វី, គន្ធា រ៉ាវាន់, ប្រាក់ សុវណ្ណពិសិដ្ឋ, លី វ៉ាហេទ, សេត រ៉ូហ្ស៊ីប, កាន់ ពិសាល, សុខ ហៀង, ណារ៉ុង កក្កដា, ឆេង ម៉េង, កែវ សុខសិលា, ជា វណ្ណសាក់, ម៉ាត់ នូរុណ, ឡុង ភារ៉ាត់ គឺ​សុទ្ធតែ​មាន​ឈ្មោះ ​ត្រូវ​ទៅ​ប្រកួត​ពាន​រង្វាន់​ស្តេច​ប្រ៊ុយណេ​លើក​នេះ ហើយ​កីឡាករ​មាន​អាយុ​លើស​ ២១ ​ឆ្នាំ ​៣ ​នាក់ មាន​ ឃួន ឡាបូរ៉ាវី, សឿយ វិសាល និង សុះ ស៊ូហាណា ក៏​ស្ថិត​ក្នុង​បញ្ជី​ឈ្មោះ​នោះ​ដែរ។

ទាក់​ទង​នឹង​កីឡាករ​​លើសអាយុ​​​ទាំង​ ៣​ នាក់​នេះ លោក ​ប្រាក់ សុវណ្ណារ៉ា គ្រូ​បង្វឹក​ក្រុម​ជម្រើសជាតិ​កម្ពុជា បាន​​ប្រាប់​ភ្នំពេញ ប៉ុស្តិ៍ កាល​ពី​ព្រឹក​ថ្ងៃសុក្រ​នេះ​​ថា៖​ «​ការ​ដាក់​កីឡាករ​លើស​អាយុ​២១​ឆ្នាំ​ចំនួន​៣​នាក់​នេះ គឺ​យើង​បាន​ធ្វើ​ទៅ​តាម​បទបញ្ជា​នៃ​ការ​ប្រកួតនេះ ដែល​គេ​អនុញ្ញាត​ឲ្យ​ដាក់​កីឡាករ​លើស​អាយុ​បាន ​៣ ​នាក់ និងចូល​លេង​បាន​ទាំង​ ៣​ នាក់»។

នៅ​ពេល​សួរ​បញ្ជាក់​ពី​ការ​សម្រេច​​​ជ្រើស​រើសយក​​កីឡាករ​លើស​អាយុ​ ៣​ នាក់​​នេះ លោក ​ប្រាក់ សុវណ្ណារ៉ា ​បាន​គិត​ទៅ​ដល់​កីឡាករ​កម្ពុជា​ ៤​ រូប កំពុង​លេង​នៅ​លីក​កំពូល​ម៉ាឡេស៊ី ក្នុង​នោះ​​មាន​ខ្សែ​ប្រយុទ្ធ ចាន់ វឌ្ឍនាកា, ប្រាក់ មុន្នីឧត្តម, កែវ សុខផេង និង ធារី ចន្ថាប៊ីន ដែល​​លោក​មិន​អាច​យក​ពួក​គេ​មិន​លេង​ពាន​រង្វាន់​ស្តេច​ប្រ៊ុយណេ​នេះ​បាន។

លោក​បាន​និយាយ​ថា៖ ​«​ការ​ជ្រើស​រើស​យក​កីឡាករ​លើស​អាយុ​នេះ យើងមាន​បញ្ហា​ដែរ។ ឧទាហរណ៍​ដូចជា កីឡាករ​កម្ពុជា ៤ ​នាក់ ដែល​កំពុង​​តែ​លេង​នៅ​ម៉ាឡេស៊ី យើង​ពិបាក​ក្នុងការ​ហៅពួកគាត់មក​លេង ដោយ​សារ​តែ​ក្លិបទាំង​អស់​រវល់។ អ្វី​ដែល​សំខាន់ យើង​ត្រូវមាន​ការ​អនុគ្រោះ​ពី​ក្លិប ដូចជា​នៅ​លីក​របស់​យើង មាន​ការអនុគ្រោះ ប៉ុន្តែ​នៅ​ក្លិប​គេធំៗ គឺ​គេ​ពិបាក​បញ្ជូន​មក​ណាស់ ហើយ​ការ​រៀបចំទូទៅ​ជា​ច្រើន​ទៀត ក្នុងការ​យក​ពួក​គាត់ មក​លេង ក៏​មាន​បញ្ហា​ផងដែរ ទើប​យើងសម្រេច​យក​កីឡាករ​លេង​នៅ​ក្នុងស្រុក​តែ​ម្តង​ទៅ»។

Content image - Phnom Penh Post
លោក ​ប្រាក់ សុវណ្ណារ៉ា បាន​មើល​ទៅ​លើ​កូន​ក្រុម​របស់​លោក ពេល​លោក​ដឹកនាំ​ក្រុម​ជម្រើសជាតិ​កម្ពុជា កន្លង​មក។ ស្រេង ម៉េងស្រ៊ុន

មួយ​វិញ​ទៀត ការ​ត្រៀម​ចេញ​ទៅ​ប្រកួត​ពាន​រង្វាន់​ស្តេច​ប្រ៊ុយណេ​នេះ គឺក្រុមជម្រើសជាតិ​កម្ពុជា ទាំង​ ២២ ​នាក់​ខាង​លើ​នេះ មិន​បាន​ប្រមូលផ្តុំ​ហ្វឹក​ហាត់​នោះ​ទេ ដោយ​សារ​តែ​ម្នាក់ៗជាប់​រវល់​នៅតាម​ក្លិប​រៀងៗ​ខ្លួន ក្នុងការ​ត្រៀម​ប្រកួត​លីកកំពូល​កម្ពុជា ឆ្នាំ ​២០១៨ ដែល​នឹង​ត្រូវ​បើក​ការ​ប្រកួត​វិញ នៅ​ថ្ងៃសៅរ៍ និង​ថ្ងៃ​អាទិត្យ ចុង​សប្តាហ៍នេះ មុន​ពេល​បន្ត​សម្រាក​រយៈ​ពេល ​២ ​ទៀត។

នៅ​ត្រង់​ចំណុច​នេះ លោក ​ប្រាក់ សុវណ្ណារ៉ា បាន​បន្ថែម​ថា៖​«​យើង​អត់​មាន​ពេល​វេលា​ក្នុងការ​ប្រមូល​ផ្តុំ​នោះ​ទេ ព្រោះ​​វា​មាន​ការ​ប៉ះ​ពាល់​ច្រើន ដោយ​សារ​ក្លិប​មួយៗ កំពុងមាន​ការ​មមាញឹក​ខ្លាំង ប៉ុន្តែ​ខ្ញុំ​គិត​ថា ស្ថាន​ភាព​ក្រុម​ផ្សេងៗ​ទៀត ដែល​ត្រៀម​ចូល​រួម​ការ​ប្រកួត​ពាន​នៅ​ប្រ៊ុយណេ​នោះ មិន​ខុស​ពី​យើង​នោះ​ទេ គឺមិនមាន​ពេលប្រមូល​ផ្តុំ​ច្រើន​ឡើយ ដោយ​សារ​នៅ​ប្រទេស​គេ ក៏​ជាប់​រវល់​ការ​ប្រកួត​លីក ដូច​តែ​យើង​ដែរ​ហ្នឹង»។

សម្រាប់​ការ​ប្រកួត​ពាន​រង្វាន់ Hassanal Bolkiah Trophy 2018 នេះ ក្រុម​U21ជម្រើស​ជាតិ​កម្ពុជា ត្រូវ​ឈរ​នៅ​ពូល​B ជាមួយ​ក្រុម​U21ឡាវ និង​សិង្ហបុរី ខណៈ​ក្រុមម៉ាឡេស៊ី និង​ឥណ្ឌូនេស៊ី បាន​ដក​ខ្លួន​ចេញ ដោយ​សារ​ជាប់​ប្រកួត​ពាន 2018 PSSI Anniversary Cup នោះ។ រីឯ​ពូល​Aមាន​ក្រុម​ម្ចាស់​ផ្ទះ​ប្រ៊ុយណេ ថៃ មីយ៉ាន់ម៉ា និង​ទីម័រខាង​កើត៕

Content image - Phnom Penh Post

អត្ថបទគួរចាប់អារម្មណ៍

  • អាជ្ញាធរ​ហាម​កប់​សព ឬ​ធ្វើ​ម៉ុង​នៅ​តាម​ជើងភ្នំ​ស្វាយ

    បន្ទាយមានជ័យៈ អាជ្ញាធរ​ខេត្ត​បន្ទាយមានជ័យ​បាន​ចេញ​បម្រាម​មិន​ឲ្យ​មាន​ការ​សាងសង់​ផ្នូរ​កប់​សព ធ្វើ​ចេតិយ​ ឬ​ធ្វើ​ម៉ុង​នៅ​តាម​ជើងភ្នំ​ស្វាយ​ក្នុង​ក្រុង​សិរីសោភ័ណ​ទៀត​ឡើយ ដោយសារ​តែ​វា​ធ្វើឲ្យ​ខូច​ដល់​សោភណភាព​ភ្នំ​ធម្មជាតិ​ដែល​ជា​ទី​ទៅ​កម្សាន្ត​សម្រាប់​ភ្ញៀវទេសចរ​ជាតិ និង​អន្តរជាតិ​។ ការសម្រេច​នេះ​ត្រូវ​បាន​ធ្វើ​ឡើង​នៅក្នុង​កិច្ចប្រជុំ​មួយ​នៅ​សាលាខេត្ត​កាលពី​ថ្ងៃទី​ ១៤ ខែ​សីហា​ឆ្នាំ​ ២០១៨​។

  • ចិន​នឹង​បញ្ជូន​ក្រុម​អ្នកចរចា​ទៅ​អាមេរិក

    ក្រុងប៉េកាំងៈ ក្រសួង​ពាណិជ្ជកម្ម​ចិន​បាន​ឲ្យ​ដឹង​កាលពី​ថ្ងៃ​ព្រហស្បតិ៍​ថា ចិន​នឹង​បញ្ជូន​អ្នកចរចា​ជាន់​ខ្ពស់​ទៅ​សហរដ្ឋអាមេរិក​នៅ​ចុង​ខែ​សីហា​នេះ ដើម្បី​បន្ត​ការចរចា​ពាណិជ្ជកម្ម​ឡើង​វិញ ដែល​ជា​កិច្ចប្រជុំ​សាធារណៈ​លើកដំបូង​ក្នុង​រយៈពេល​ជាច្រើន​សប្ដាហ៍​ទាក់ទង​នឹង​ប្រធានបទ​នេះ ខណៈ​ជម្លោះ​ពាណិជ្ជកម្ម​មាន សភាព​កាន់តែ​ខ្លាំង​ឡើង​។

  • បរទេស​ និង​ខ្មែរ​ ៥៣ ​នាក់​ត្រូវ​បាន​ចាប់​ខ្លួន​ពាក់ព័ន្ធ​នឹង​គ្រឿងញៀន

    ព្រះសីហនុៈ ជនបរទេស និង​ខ្មែរ​ចំនួន​ ៥៣ ​នាក់​ត្រូវ​បាន​ចាប់ខ្លួន​កាលពី​ម្សិលមិញ​នៅក្នុង​សង្កាត់​លេខ​ ៤ ក្រុង​ព្រះសីហនុ​ពេល​កំពុង​ប្រព្រឹត្ត​បទល្មើស ជួញដូរ និង​ប្រើប្រាស់​គ្រឿងញៀន​នៅក្នុង​រង្គសាល​ស្កាយឡាញ​ ១ ​កន្លែង​។

  • CPP ការពារ​លទ្ធផល​បោះឆ្នោត ហើយ​ថា​រាល់​ការរិះគន់​គឺជា​ការប្រមាថ​ប្រជាជន​កម្ពុជា​យ៉ាង​ធ្ងន់ធ្ងរ

    ភ្នំពេញៈ បន្ទាប់ពី​ទទួល​បាន​ជ័យជម្នះ​ក្ដោប​ក្ដាប់​យក​អាសនៈ​ទាំង​ ១២៥ នៅក្នុង​រដ្ឋសភា មន្ត្រី​ជាន់ខ្ពស់​នៃ​គណបក្ស​ប្រជាជន​កម្ពុជា​កាលពី​ម្សិលមិញ​បាន​ចេញ​មុខ​នៅ​ចំពោះ​ប្រព័ន្ធ​ផ្សព្វផ្សាយ​ជាតិ និង​អន្តរជាតិ​ដើម្បី​ការពារ​ជ័យជម្នះ​ដែល​ទទួល​បាន​ពី​ការបោះឆ្នោត​កាលពី​ថ្ងៃទី​ ២៩ ខែ​កក្កដា​កន្លង​មក​នេះ ហើយ​ក៏​បាន​វាយបក​ធ្ងន់ៗ​ប្រឆាំង​បណ្ដា​ប្រទេស​ប្រជាធិបតេយ្យ​ខ្លះ និង​អតីត​គណបក្ស​ប្រឆាំង​ដែល​រិះគន់​ខ្លួន​ថា​បាន «​ប្រមាថ​យ៉ាងធ្ងន់ធ្ងរ​» ដល់​ឆន្ទៈ​ប្រជាជន​កម្ពុជា ហើយ «​ឧបាយកល​ដ៏ពិសពុល​» របស់​ពួកគេ​បាន​ទទួល​បរាជ័យ​ជា​អ្វី​ដែល​អតីត​មន្ត្រី​ជាន់ខ្ពស់​គណបក្ស​ប្រឆាំង និង​អ្នកវិភាគ​ជំទាស់​។