ភ្នំពេញ: គ្រូបង្វឹកក្រុមណាហ្គាវើល លោក មាស ចាន់ណា បាន សម្តែងការបារម្ភ និងបាក់ទឹកចិត្តផងដែរ ទៅលើការធ្លាក់ចុះទម្រង់លេងរបស់កូនក្រុម ដោយលេងបណ្តែតបណ្តោយទៅតាមអារម្មណ៍បែបជាកីឡាករខ្វះការអប់រំផ្នែកបាល់ទាត់ដែលធ្វើឲ្យក្រុមណាហ្គាវើល ចាញ់ក្រុម Tampines Rovers រហូតដល់ ៥-១ ក្នុងការប្រកួតជម្រុះប្រចាំពូល F នៃពានរង្វាន់ AFC Cup 2019 កាលពីយប់ថ្ងៃអង្គារ។
តាមរយៈការប្រកួតដែលត្រូវបានធ្វើឡើងនៅពហុកីឡដ្ឋានជាតិកាលពីយប់ថ្ងៃអង្គារនោះលោក មាស ចាន់ណា បានសរសើរទៅលើឆន្ទៈលេងរបស់ក្រុម ដែលធ្វើបានល្អនៅដើមតង់ទី ១ ដែលនាំឲ្យ គួច ដានី រកបានគ្រាប់នាំមុខនៅនាទីទី ២៤ ប៉ុន្តែការប្រចាំគ្នាចេញទៅយកបាល់របស់អ្នកចាំទី ស៊ូ យ៉ាទី និងខ្សែការពារ ញឹម សុវណ្ណារ៉ា បានធ្វើឲ្យបាល់ដែលលើកចូលដោយខ្សែប្រយុទ្ធកាណាដា Jordan Webb ធ្លាក់នៅចំពីមុខរបស់អ្នកទាំង ២ រួចលោតចូលទីយ៉ាងស្រួលនៅនាទីទី ៤៤។
លោក មាស ចាន់ណា បាននិយាយនៅក្នុងសន្និសីទកាសែតក្រោយការប្រកួតថា៖ «នៅតង់ទី ១ យើងធ្វើបានល្អរហូតដល់ជាង ៣០ នាទីដែលធ្វើឲ្យក្រុម Tampines Rovers សឹងតែរកឱកាសគ្រប់គ្រងបាល់មិនបាន ប៉ុន្តែជាអកុសលគេបានទាត់ចូលយើង ដោយសារការប្រចាំគ្នា ហើយចាប់ពីតង់ទី ២ ទៅគឺយើងមានបញ្ហាខ្លាំងមែនទែន ព្រោះការប្រមូលអារម្មណ៍របស់យើងមិនបានចប់ចុង ចប់ដើម»។
លោកបានបន្ថែមថា៖ «ការប្រកួតពីនាទីទី ១ ដល់នាទីទី ៤០ គឺការប្រមូលអារម្មណ៍របស់យើងបានខ្លាំង ប៉ុន្តែចុងក្រោយពេលដែលក្ដៅតិចតួច ហត់តិចតួច ចាប់ផ្ដើមធ្លាក់ការប្រមូលអារម្មណ៍ ហើយបើធ្លាក់ការប្រមូលអារម្មណ៍តែ ៥ វិនាទី ឬ ១០ វិនាទីគឺគេអាចទាត់ចូលយើងបានហើយ»។
ក្រោយតាមស្មើ ១-១ នៅក្នុងតង់ទី ១ ក្រុម Tampines Rovers បានដាក់សម្ពាធទៅលើក្រុមម្ចាស់ផ្ទះ ណាហ្គាវើល ជាបន្តបន្ទាប់នៅតង់ទី ២ នឹងរកបាន ៤ គ្រាប់បន្ថែមទៀតហើយគ្រាប់បាល់ដែលធ្វើឲ្យអ្នកគាំទ្របាក់ទឹកចិត្តបំផុតនោះ គឺគ្រាប់ទី ៤ កីឡាករ Delimedjac និងគ្រាប់បាល់ទី ៥ របស់ខ្សែប្រយុទ្ធ ជប៉ុន Ryutaro Megumi ព្រោះគ្រាប់ទាំង ២ នេះបានកើតឡើងក្នុងនាទីបន្ថែម ៩០+៤ ដូចគ្នា។ រីឯគ្រាប់បាល់ទី ២ រកបានដោយ Mehmedovic នៅនាទីទី ៥៧ មុនពេល Jordan Webb បានរកឃើញគ្រាប់បាល់ទី ២ របស់គេនៅនាទីទី ៦៦។
តាមរយៈការចាញ់ក្រុម Tam-pines Rovers ៥-១ ជាមួយទម្រង់លេងបែបបែកអារម្មណ៍នេះលោក មាស ចាន់ណា បានបន្ថែមថា៖ «កីឡាករកម្ពុជាមួយចំនួនធំ ខ្វះការអប់រំផ្នែកបាល់ទាត់មានន័យថានៅក្នុងបាល់ទាត់គេមានការអប់រំផ្នែកចិត្តសាស្ត្រក្នុងការលេងគឺពេលទាត់ចូលគេ ឬក៏មិនចូលយើងនៅតែរក្សាជំហររបស់យើងខ្លាំង ផ្ទុយទៅវិញបើខ្វះការអប់រំនេះគឺពេលណាយើងមានឱកាស តែទាត់គេអត់ចូល គឺចាប់ផ្ដើមមានការធ្លាក់អារម្មណ៍ និងទម្លាក់ការយកចិត្តទុកដាក់»។
គ្រូបង្វឹកវ័យ ៣៩ ឆ្នាំលោក មាស ចាន់ណា កំពុងមានការបារម្ភថាការខ្វះការប្រមូលអារម្មណ៍ក្នុងការលេងនេះ វានឹងធ្វើឲ្យក្រុមម្ចាស់ជើងឯក ណាហ្គាវើល អាចនឹងមិនទទួលបានលេខ ៦ ក្នុងលីកកំពូលកម្ពុជានៅឆ្នាំនេះផង។ លោកបានបញ្ជាក់ថា៖ «ដំបូងខ្ញុំគិតថាវាប្រហែលជាមិនអាចប៉ះពាល់ទេ តែពេលនេះវាប៉ះពាល់ហើយ ហើយបើពួកគាត់នៅតែមានស្ថានភាពបែបនេះទៀតនឹងប៉ះពាល់ ១០០ ភាគរយ។ បើសិនជានៅតែមានស្ថានភាពបែបនេះគឺសូម្បីតែឈរលេខ ៦ ក្នុងតារាងលីកកំពូលក៏ឈរមិនបានផង ព្រោះឥឡូវនេះម្នាក់ៗសឹងតែខ្ជិលដើរទៅផ្ទះទៀតផង»៕