The Phnom Penh Post Search

Search form




Logo of Phnom Penh Post newspaper Phnom Penh Post - គ្រូណាហ្គា ថា បឹងកេត អាច​ពិបាក បើ​ហ៊ាន​តែ​កញ្ជ្រោល




គ្រូណាហ្គា ថា បឹងកេត អាច​ពិបាក បើ​ហ៊ាន​តែ​កញ្ជ្រោល

Content image - Phnom Penh Post
ខ្សែ​ប្រយុទ្ធ​របស់​ណាហ្គាវើល Marcio (ឆ្វេង) ប្រជែង​តែតបាល់​ Mizuno Hikaru របស់បឹងកេត។ សហ​ការី

គ្រូណាហ្គា ថា បឹងកេត អាច​ពិបាក បើ​ហ៊ាន​តែ​កញ្ជ្រោល

ភ្នំពេញ៖ ​គ្រូ​បង្វឹក​​ណាហ្គាវើល លោក មាស ចាន់ណា បាន​ចាត់​ទុក​ការ​វិល​មក​ជួប​ក្រុម​កំពុង​ឈរ​នៅ​លេខ ​១ បឹងកេត ជា​ជំនួប​ដ៏​តានតឹង ប៉ុន្តែ​លោក​បាន​ព្រលយ​ថា ណាហ្គាវើល មិន​ខ្លាច​ខ្សែ​ប្រយុទ្ធ​​បឹងកេត​នោះ​ទេ ចំណែក​ក្រុម​ភ្នំពេញ​ក្រោន នឹង​យក​ទម្រង់​លេង​ជោគជ័យ ដើម្បី​ទៅ​​ជួប​ក្រុម​ម្ចាស់​ផ្ទះ វិសាខា សម្រាប់​ការ​ប្រកួត​លីក​កំពូល​កម្ពុជា​ឆ្នាំ ​២០២០ នៅ​ចុង​សប្តាហ៍​នេះ។

ក្រុម​ណាហ្គាវើល​បាន​ត្រឹម​ស្មើ ១-១ ជាមួយ​ក្រុម​បឹង​កេត សម្រាប់​ការ​ប្រកួត​ជើងទី​១ នៅ​ក្រៅ​ទឹក​ដី ប៉ុន្តែ​ការ​ប្រកួត​លើក​នេះ ​លោក មាស ចាន់ណា បាន​ពោល​ពាក្យ​បែប​បំភ័យ​ទៅ​លើ​​ក្រុម​ម្ចាស់​ផ្ទះ បឹងកេត ថា ក្រុម​មួយ​នេះ អាច​នឹង​ជួប​ការ​ពិបាក បើ​សិន​ជា បឹងកេត កញ្ជ្រោល​ចង់​ឈ្នះ​ខ្លាំង​ពេក។

លោក មាស ចាន់ណា បាន​ប្រាប់​ភ្នំពេញ​ប៉ុស្តិ៍​ថា៖ ​«ការ​ប្រកួត​នេះ វា​ត្រូវ​តែ​តានតឹង​ហើយ ដោយសារ​ក្រុម​ឈរ​នៅ​ចំណាត់​ថ្នាក់ លេខ ​១ ប៉ះ​ជាមួយ​ក្រុម​ឈរ​នៅ​លេខ ​៦ ហើយ​ម្យ៉ាង​​ទៀត ក្រុម​បឹង​កេត កំពុង​តែ​ល្អ ប៉ុន្តែ​ខ្ញុំ​គ្រាន់​តែ​ចង់​និយាយ​ថា បើ​បឹងកេត កញ្ជ្រោល​​​ចង់​ឈ្នះ​ខ្លាំង​ពេក ប្រហែល​ជា​ពិបាក​ហើយ​ជាមួយ​ ណាហ្គាវើល»។

គ្រូ​បង្វឹក​របស់​ក្រុម​ណាហ្គាវើល រូប​នេះ​បាន​បន្ថែម​ថា៖ ​«ក្រុម​ផ្សេង​គេ​បារម្ភ​ទៅ​លើ​ខ្សែ​ប្រយុទ្ធ​​របស់​បឹងកេត ប៉ុន្តែ​ចំពោះ​ខ្ញុំ​មិន​បារម្ភ​ជាមួយ​ខ្សែ​ប្រយុទ្ធ ​បឹងកេត​នោះ​ទេ»។ ជាមួយ​គ្នា​នេះ លោក ចាន់ណា ក៏​មិន​ចង់​ឃើញ​ការ​ប្រកួត​នេះ បញ្ចប់​ដោយ​លទ្ធផល​ត្រឹម​ស្មើ​នោះ​ដែរ ដោយ​លោក​បញ្ជាក់​ថា៖ «បើ​ខ្ញុំ​ស្មើ ក្រុម​ខ្ញុំ ឈរ​នៅ​លេខ ​៦ ​ដដែល​ហ្នឹង ហើយ​បើ​ខ្ញុំ​ចាញ់ ក៏​ឈរ​នៅ​លេខ ​៦ តែ​បើ​ខ្ញុំ​ឈ្នះ ​ខ្ញុំ​អាច​ឡើង​ដល់​លេខ ​៣ អ៊ីចឹង​រឿង​អី ខ្ញុំ​ត្រូវ​លេង​ទប់ ដើម្បី​ស្មើ គឺ​យើង​ត្រូវ​ការ​ឈ្នះ ដើម្បី​ប្រជែង​យក​លេខ ​៣»។

ចំណែក លោក គឹម ភក្តី គ្រូ​បង្វឹក​ស្តីទី​របស់​បឹងកេត មិន​អាច​ទាក់ទង​សម្ភាស​បាន​ទេ។ យ៉ាង​ណា​ក៏​ដោយ ការ​ប្រកួត ​៨ លើក​​ចុង​ក្រោយ​នេះ លោក ភក្តី បាន​ដឹកនាំ​ក្រុម​បឹងកេត ឈ្នះ​ទាំង ​៨ ​លើក ហើយ​ការ​ជួប ណាហ្គាវើល លើក​នេះ បឹង​កេត ត្រូវ​ការ​ឈ្នះ​ខ្លាំង​ ដើម្បី​បន្ថែម​ឱកាស​ឈ្នះ​ពាន​នារដូវកាល​នេះ ពី​ការ​ប្រជែង​របស់​ព្រះខ័នរាជ​ស្វាយរៀង។

ការ​បរាជ័យ​ក្រោម​ស្នាដៃ​ក្រុម​ភ្នំពេញ​ក្រោន ២-១ កាល​ពី​សប្តាហ៍​មុន ​បាន​ធ្វើ​ឲ្យ​ក្រុម​ស្វាយរៀង បាន​ថមថយ​ឱកាស​មួយ​កម្រិត ដោយ​មាន​ត្រឹម ​៣១ ​ពិន្ទុ​ដដែល តិច​ជាង បឹងកេត ដែល​មាន ៣៥ ពិន្ទុ។ ចំណែក​ការ​ប្រកួត​លើក​នេះ ស្វាយរៀង ត្រូវ​ជួប​ក្រុម​ម្ចាស់​ផ្ទះ​កង​យោធពល​ខេមរភូមិន្ទ (ទ័ព) ដែល​ពួក​គេ ធ្លាប់​ឈ្នះ ២-០ កាល​ពី​ជើង​ទី​១ ប៉ុន្តែ​ឱកាស​​ឈ្នះ ​៣ ពិន្ទុ នៅ​មិន​ទាន់​ប្រាកដ​ដូច​គ្នា។

ដោយ​ឡែក​ក្រុម​ភ្នំពេញ​ក្រោន ដែល​ទើប​បាន​ឡើង​ទៅ​ឈរ​នៅ​លេខ ​៣ មាន ​២៥ ពិន្ទុ​នោះ បាន​​ត្រៀម​យក​ទម្រង់​លេង​ជោគជ័យ ពេល​​ពួក​គេ​យក​ឈ្នះ​​ក្រុម​ស្វាយ​រៀង​នោះ ទៅ​លេង​ជាមួយ​ក្រុម​កំពុង​ឈរ​នៅ​លេខ ​៥ មាន ​២៣ ពិន្ទុ វិសាខា សម្រាប់​ជំនួប​លើក​នេះ ខណៈ​ជំនួប​ជើង​ទី​១ ភ្នំពេញ​ក្រោន បាន​ស្មើ វិសាខា ២-២ នៅ​លើ​ទឹក​ដី​ខ្លួន​ឯង។

លោក ស៊ុំ វណ្ណា គ្រូ​បង្វឹក​ក្រុម​ភ្នំពេញក្រោន ប្រាប់​ថា៖ ​«យើង​នឹង​ព្យាយាម​ធ្វើ​ទៅ​តាម​អ្វី​ដែល​យើង​បាន​ធ្វើ ​(ពេល​លេង​ជាមួយ ក្រុម​ស្វាយរៀង) ដើម្បី​ជួប​ក្រុម​វិសាខា​លើក​នេះ ព្រោះ​ជំនួប​ទាំង ​៥ ​ក្រុម ក្នុង​តំបន់ Top6 ក្នុង​ជើងទី​២ ​នេះ សុទ្ធ​តែ​ជា​ក្រុម​​ខ្លាំង»។

ដោយ​ឡែក សម្រាប់​ការ​ប្រកួត​រវាង​ក្រុម​ចំណាត់​ថ្នាក់​លេខ​ទាំង ៧ (​ក្រុម​ឈរ​នៅ​លេខ ​៧ ដល់​លេខ ​១៣) ត្រូវ​បាន​គេ​មើល​ឃើញ​ថា ​ក្រុម​មាន​ ២៤ ពិន្ទុ អង្គរថាយហ្គឺរ នឹង​ទទួល​បាន​លេខ ​៧ លើ​គេ ប៉ុន្តែ​នៅ​សប្តាហ៍​នេះ ពួក​គេ​ត្រូវ​ជួប​ក្រុម​ម្ចាស់​ផ្ទះ គិរីវង់​សុខសែនជ័យ ដែល​កំពុង​ឈរ​នៅ​លេខ ​៨ មាន ​១៤ ពិន្ទុ ខណៈ​ជំនួប​ជើងទី​១ អង្គរថាយហ្គឺរ បាន​ឈ្នះ ២-០ នៅ​ក្នុង​ទឹក​ដី៕

កម្មវិធី​ប្រកួត​នៅ​ថ្ងៃ​សៅរ៍

-សូលទីឡូអង្គរ v យុវជន​បាទី កីឡដ្ឋាន SRU ៣:៣០
-ណាហ្គាវើល v បឹងកេត កីឡដ្ឋាន​ស្តាតចាស់ ៦:០០
-វិសាខា v ភ្នំពេញ​ក្រោន កីឡដ្ឋាន​ព្រីនស៍ ៦:០០

៣ ​ប្រកួត​នៅ​ថ្ងៃ​អាទិត្យ

-គិរីវង់ v អង្គរថាយហ្គឺរ កីឡ.​គិរីវង់​សុខសែន​ជ័យ ៣:៣០
-អាស៊ីអឺរ៉ុប v នគរបាលជាតិ កីឡដ្ឋាន AEU ៣:៣០
-ទ័ព v ស្វាយរៀង កីឡដ្ឋាន​ស្តាតចាស់ ៦:០០

អត្ថបទគួរចាប់អារម្មណ៍