.jpg)
ខ្សែប្រយុទ្ធ Bata បានលោតរំលងអ្នកចាំទីក្រុមខេត្តកំពង់ចាមក្នុងការប្រកួតកាលពីយប់ថ្ងៃសៅរ៍។ រូប CNCC
ភ្នំពេញៈ ក្រសួងការពារជាតិ (ទ័ព) បានក្លាយជាក្រុមទី ២ ដែលអាចយកឈ្នះលើក្រុមចំណូលថ្មី ខេត្តកំពង់ចាមរហូតដល់ ១១-០ គឺដូចគ្នាបេះបិទទៅនឹងក្រុមអង្គរថាយហ្គឺរ ដែលបានលត់ខេត្តកំពង់ចាម ១១-០ ដែរ កាលពីសប្តាហ៍មុននៅក្នុងការប្រកួតលីកកំពូលកម្ពុជានេះ ប៉ុន្តែជ័យជម្នះដ៏ធំនេះ វាបានផ្តល់ទាំងភាពរីករាយ និងក្តីកង្វល់ដល់ក្រុមទ័ព ចំណែកក្រុមសាលាបាល់ទាត់ជាតិបាទីបានបន្តចាញ់ជាលើកទី ៣។
លោក ភា សុភ័ក្ត្រា គ្រូបង្វឹកក្រុមទ័ពបានប្រាប់ភ្នំពេញ ប៉ុស្តិ៍ កាលពីព្រឹកថ្ងៃអាទិត្យថា៖ « ការសម្រេចទីដ៏ច្រើនជាមួយក្រុមខេត្តកំពង់ចាមលើកនេះ វាមិនមែនជាការកំណត់គោលដៅសម្រាប់ការប្រកួតរបស់យើងនោះទេ ហើយក៏មិនមែនជាការជំរុញ ឬដាក់បន្ទុកផ្លូវចិត្តក្រុម និងកីឡាករថាត្រូវតែស៊ុតបញ្ចូលទីឲ្យច្រើនគ្រាប់បែបនេះនោះដែរ តែអ្វីដែលយើងចង់បាន គឺ ៣ ពិន្ទុជាមួយនឹងប្រសិទ្ធភាព និងគុណភាពនៃការសម្រេចទីរបស់យើង»។
យ៉ាងណាក៏ដោយសម្រាប់ការយកឈ្នះក្រុមខេត្តកំពង់ចាម ១១-០ នៅកីឡដ្ឋានស្តាតចាស់របស់ខ្លួនកាលពីយប់ថ្ងៃសៅរ៍កន្លងមកនេះក៏បានបន្សល់ទុកនូវក្តីកង្វល់ចំពោះក្រុមទ័ពផងដែរ ព្រោះកីឡាករសំខាន់ ២ នាក់របស់ក្រុមនេះបានជួបនឹងបញ្ហាដោយក្នុងនោះខ្សែការពារ ខែក ខេមរិន្ទ មានបញ្ហារបួស ខណៈ ស ពិសិដ្ឋ បានទទួលកាតលឿង ១ ដែលលោក សុភ័ត្ត្រា គិតថា វាជារឿងខាតបង់មួយដោយសារវាអាចនឹងធ្វើឲ្យ ស ពិសិដ្ឋ អវត្តមាននៅក្នុងការប្រកួតណាមួយនៅពេលខ្សែការពាររូបនេះទទួលបានកាតលឿងម្តងទៀត។
លោក ភា សុភ័ត្ត្រា បានបន្ថែមថា៖ «ខ្ញុំសប្បាយចិត្តជាមួយការប្រកួតដោយរកបានគ្រាប់បាល់ច្រើន ប៉ុន្តែខ្ញុំក៏មិនសូវជារីករាយដែរ ព្រោះកីឡាករសំខាន់យើង ២ នាក់មានបញ្ហា គឺ ខេមរិន្ទ មានរបួសចង្កេះ ឯ ពិសិដ្ឋ បានទទួលកាតលឿងទាំងមិនសមទំនងទៅនឹងទំហំនៃការប៉ះទង្គិច ហើយនេះជាឧបសគ្គសម្រាប់ការរៀបចំប្រកួតក្រោយដែលខ្ញុំមិនមានការរំពឹងខ្ពស់ឡើយ ហើយយើងក៏កាន់តែមិនអាចលេងបែបប្រយុទ្ធ ដើម្បីរកគ្រាប់បាល់ឲ្យបានច្រើនទៀតនោះដែរ ព្រោះគ្រូគេផ្សេងៗក៏មានរបៀបរៀបចំការលេងផងដែរ»។
ជាមួយនឹងជ័យជម្នះដ៏ធំនេះខ្សែប្រយុទ្ធ Bata រកបាន ៣ គ្រាប់តែម្នាក់ឯង ដើម្បីឡើងទៅឈរនៅកំពូលតារាងនៃអ្នកស៊ុតបាល់បញ្ចូលទីបានច្រើនជាងគេជាបណ្តោះអាសន្នគឺ ៦ គ្រាប់ ចំណែកខ្សែប្រយុទ្ធ រ៉ឹង ប៊ុនហៀង ក៏រកបាន ៣ គ្រាប់តែម្នាក់ឯងជាលើកដំបូងផងដែរ ខណៈ Bisan Goerge និង Obi រកបាន ២ គ្រាប់ដូចគ្នា ហើយ ១ គ្រាប់ទៀតរកបានដោយកីឡាករវ័យក្មេង ណារ៉ុង កក្កដា ហើយការរកបាន ៣ ពិន្ទុបន្ថែមនេះបានធ្វើឲ្យក្រុមទ័ព មាន ៧ ពិន្ទុជាមួយការឈ្នះ ២ និងស្មើ ១ ប្រកួត។
យ៉ាងណាក៏ដោយលោក ភា សុភ័ក្ត្រា មិនបានចាត់ទុកការឈ្នះខេត្តកំពង់ចាម ១១-០ នេះជាការបើកផ្លូវដ៏សំខាន់ជួយឲ្យក្រុមទ័ពទៅប្រជែងយកពានលេខ ១ នោះទេ។ លោកបានបញ្ជាក់ថា៖ «វាមិនអាចទេ ព្រោះកម្រិតគូប្រកួតរដូវកាលនេះមានចំណុចខ្លាំងខុសៗគ្នា គឺក្រុមខ្លះខ្លាំងប្រយុទ្ធ ក្រុមខ្លះខ្លាំងការពារ ខ្លះមានតុល្យភាព ឬលំនឹងទាំងប្រយុទ្ធ និងការពារ ហើយក្រុមខ្លះទៀតពូកែលេងបាល់រៀបចំ។ ហេតុនេះយើងក៏កាន់តែមិនភ្លេចខ្លួនជាមួយរឿងប្រយុទ្ធតែមួយមុខ គ្រាន់តែថាយ៉ាងហោចណាស់ក៏យើងអាចមានលទ្ធភាពរកគ្រាប់បាល់ស្ទើរគ្រប់ការប្រកួតក៏ថាបាន»។
សម្រាប់ការប្រកួតកាលពីថ្ងៃសៅរ៍នោះដែរក្រុមម្ចាស់ផ្ទះអាស៊ីអឺរ៉ុបបានយកឈ្នះក្រុមសូលទីឡូអង្គរ ២-១ ដើម្បីទទួលបាន ៣ ពិន្ទុជាលើកដំបូង បន្ទាប់ពីចាញ់ ២ ប្រកួតកន្លងមក ប៉ុន្តែក្រុមសាលាបាល់ទាត់ជាតិបាទី បន្តចាញ់ក្រុមម្ចាស់ផ្ទះអគ្គិសនីកម្ពុជា ២-០ ធ្វើឲ្យអគ្គិសនីកម្ពុជាពេលនេះមាន ៦ ពិន្ទុ៕
