ភ្នំពេញ៖ លោក ហែម លំផាត់ គ្រូជម្រើសជាតិកីឡាហែលទឹក និងជាគ្រូបង្វឹកក្រុមជម្រើសជាតិកីឡាហែលទឹកជនពិការផងនោះ បានទទួលមរណភាពកាលពីវេលាម៉ោង ១ រំលងអធ្រាត្រឈានចូលថ្ងៃទី ១៥ ខែកក្កដា ក្នុងវ័យ ៤៩ ឆ្នាំ ដោយរោគាពាធ នៅមន្ទីរពេទ្យកាល់ម៉ែត។
លោក ហែម លំផាត់ ទទួលមរតកជំនាញកីឡាហែលទឹកពីលោក ហែម ថុន ជាឪពុក ដោយលោកមានអាជីពជាកីឡាករហែលទឹក និងបានក្លាយខ្លួនជាគ្រូបង្វឹកជាង ១០ ឆ្នាំហើយ និងជាគ្រូបង្វឹកក្រុមជនពិការតាំងពីឆ្នាំ ២០១១។ យោងតាមប្រវត្តិ និងបទពិសោធ លោក ហែម លំផាត់ មានស្នាដៃក្នុងវិស័យកីឡាហែលទឹកនេះល្អគួរសម ពិសេសប្រវត្តិនៃការឆ្លងកាត់សកម្មភាពកីឡាសំខាន់ៗ គឺពីឆ្នាំ ១៩៨៦ ដល់ឆ្នាំ ១៩៩៨ លោកធ្លាប់ទៅបណ្តុះបណ្តាលនៅប្រទេសកូរ៉េខាងជើង ហើយនៅឆ្នាំ ១៩៩២ គឺក្រោយបញ្ចប់ការសិក្សា លោកបានចូលរៀនសាលាគរុកោសល្យអប់រំកាយ និងកីឡាជំនាន់ទី ៤ (បច្ចុប្បន្នវិទ្យាស្ថានជាតិអប់រំកាយ និងកីឡា)។
នៅឆ្នាំ ១៩៩៥ លោក ហែម លំផាត់ បានចូលរួមការប្រកួតកីឡាអាស៊ានលើកទី ១៨ នៅឈៀងម៉ៃ ប្រទេសថៃ ហើយឆ្នាំ ១៩៩៦ លោកចូលរួមការប្រកួតក្នុងព្រឹត្តិការណ៍ធំបំផុត គឺអូឡាំពិកហ្គេមនៅសហរដ្ឋអាមេរិក។ ឆ្នាំ ២០១៧ លោកទៅចូលរួមការប្រកួតស៊ីហ្គេមនៅលើកទី ១៩ ប្រទេសប៊្រុយណេ និងជាបន្តបន្ទាប់លោកបានបន្តការងារជាគ្រូបង្វឹក ព្រមទាំងជាគណៈកម្មាធិការប្រតិបត្តិសហព័ន្ធ។
តាមការឲ្យដឹងពី លោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា គឺលោក ហែម លំផាត់ មានអាការឈឺពោះ ១ សប្ដាហ៍មកហើយ បន្ទាប់មកគ្រួសារលោកបានបញ្ជូនទៅមន្ទីរពេទ្យកាល់ម៉ែត ទើបដឹងថា គាត់ធ្លាយក្រពះ ហើយគ្រូពេទ្យក៏បានព្យាបាល និងដេរក្រពះរួចហើយ ប៉ុន្តែនៅតែមានឈាមហូរចូលក្រពះនាំឲ្យធ្វើទុក្ខខ្លាំងរហូតលោកទទួលមរណភាពតែម្តង។ តាមក្រុមគ្រួសារឲ្យដឹងថា គាត់មានបញ្ហាលើសសម្ពាធឈាមផងដែរ។
ជាមួយគ្នានេះ លោកទេសរដ្ឋមន្ដ្រី ស៊ុន ចាន់ថុល ប្រធានសហព័ន្ធខ្មែរកីឡាហែលទឹក ដែលបានខ្នះខ្នែងជួយមើលថែ លោក ហែម លំផាត់ ពេលចូលមន្ទីរពេទ្យនោះ បានប្រកាសទទួលខុសត្រូវទាំងស្រុងលើការចំណាយក្នុងការរៀបចំបុណ្យសពលោក ហែម លំផាត់ ដែលកំពុងតម្កល់ធ្វើបុណ្យតាមប្រពៃណី នៅគេហដ្ឋាន ផ្ទះលេខ ១៨៩ តាមបណ្ដោយផ្លូវ ២០០៤ ក្នុងសង្កាត់កាកាប ខណ្ឌពោធិ៍សែនជ័យ។ តាមកម្មវិធីគ្រោងដង្ហែសពទៅបូជា នៅព្រឹកថ្ងៃអាទិត្យ ហើយលោក ហែម លំផាត់ មានកូន ៣ នាក់ ក្នុងបន្ទុកផងដែរ។
លោក យី វាសនា បានបញ្ជាក់ថា៖ «មរណភាពរបស់គ្រូបង្វឹកក្រុមជម្រើសជាតិកីឡាហែលទឹក លោក ហែម លំផាត់ បានធ្វើឲ្យគ្រួសារកីឡាហែលទឹកទាំងប្រភេទកីឡាអូឡាំពិក និងប៉ារ៉ាឡាំពិក មានការសោកស្ដាយជាខ្លាំង ព្រោះជាការបាត់បង់ធនធានគ្រូបង្វឹកដ៏ឆ្នើម ដែលធ្លាប់បង្វឹក និងផលិតបានធនធានកីឡាករកីឡាការិនីល្អៗជាច្រើននាក់ ដើម្បីចូលរួមប្រកួតទាំងថ្នាក់ជាតិ និងអន្ដរជាតិ»៕