ក្រុងឡុងដ៍៖ លោក Frank Lampard ជឿថា ក្រុមតោខៀវ Chelsea របស់គាត់នឹងឡើងទៅវគ្គបន្ត ក្រោយពីបង្កើនស្មារតីប្រកួតពីការត្រូវបានគេនាំមុខមុន ៤-១ រហូតតាមស្មើវិញ ៤-៤ ជាមួយក្រុម Ajax ដែលនៅសល់គ្នា ៩ នាក់ ជាអ្វីដែលគាត់បានពិពណ៌នាថា «ជារាត្រីឆ្កួត» មួយនៅកីឡដ្ឋាន Stamford Bridge។
ក្រុមតោខៀវហាក់ដូចជាគ្មានសង្ឃឹមនឹងឈ្នះនោះទេ នៅពេលកីឡាករ Tammy Abraham បានធ្វើឲ្យបាល់ចូលទីខ្លួនឯងនៅក្នុងតង់ទី ១ ហើយកីឡាករ Kepa Arrizabalaga បានបន្ថែម ១ គ្រាប់ ពីលើគ្រាប់បាល់របស់កីឡាករ Quincy Promes និងការបញ្ចប់យ៉ាងល្អពីកីឡាករ Donny Van der Beek ធ្វើឲ្យក្រុមម្ចាស់ជើងឯកហូឡង់នាំមុខ ៤-១។
ទោះបីជាយ៉ាងណា បន្ទាប់ពី កីឡាករ Cesar Azpilicueta រកបានគ្រាប់ទី ២ សម្រាប់ក្លិប Chelsea ក្រុមភ្ញៀវ Ajax បាននៅសល់គ្នាតែ ៩ នាក់ដែលជាឱកាសល្អសម្រាប់ក្រុមម្ចាស់ផ្ទះរកបានគ្រាប់បាល់ទី ៣ ដោយកីឡាករ Jorginho មុនពេលកីឡាករ Reece James បានបន្ថែម ១ គ្រាប់ទៀត ធ្វើឲ្យលទ្ធផលស្មើគ្នា ៤-៤។
លោក Lampard គ្រូបង្វឹកក្លិប Chelsea ដែលបានឈ្នះពានរង្វាន់ Champions League ជាមួយក្លិប Chelsea ក្នុងអាជីពដ៏អស្ចារ្យរយៈពេល ១៣ ឆ្នាំនោះ បាននិយាយថា៖ «ខ្ញុំមានរាត្រីឆ្កួតៗរយៈពេលប៉ុន្មានឆ្នាំមកនេះ និងរាត្រីអស្ចារ្យផងដែរ ប៉ុន្តែវាពិតជាត្រឹមត្រូវនៅទីនោះ»។
គ្រូបង្វឹករូបនេះបានបន្ថែមថា៖ «ស្មារតី និងទម្រង់លេងនៅពេលនេះ គឺជាអ្វីម្យ៉ាងដែលខ្ញុំចូលចិត្ត ហើយខ្ញុំគិតថា អ្នកគាំទ្ររបស់យើងក៏បែបនោះដែរ។ យើងត្រូវតែបង្កើនទម្រង់លេងជាការពិត ប៉ុន្តែជាមួយស្មារតីនោះ យើងអាចឡើងទៅវគ្គបន្តទៀត»។
ក្រុមទាំង ២ នេះ ឥឡូវមាន ៧ ពិន្ទុ ដូចគ្នា និងឈរនៅលើកំពូលតារាងនៃពូល H ហើយក្រុម Valencia ក៏មាន ៧ ពិន្ទុដែរ ប៉ុន្តែឈរនៅលេខ ៣ នៅក្នុងពូលនេះ។
គ្រូបង្វឹករូបនេះបានបន្ថែមទៀតថា៖ «ខ្ញុំតែងមានអារម្មណ៍ថា ពូលនេះអាចជាពូលតឹងតែងមួយ ហើយយើងក៏ស្ថិតនៅក្នុងពូលនេះផងដែរដូច្នេះហើយយើងពិតជាមានការងារជាច្រើនដែលត្រូវធ្វើ»។
ចំណែកគ្រូបង្វឹកក្រុម Ajax លោក Erik Ten Hag បាននិយាយថា៖ «យើងកំពុងពិនិត្យមើលការប្រកួតនេះ បន្ទាប់មកក្នុងរយៈពេលតែមួយភ្លែតសោះ អ្វីៗបានប្រែប្រួល»។
គ្រូបង្វឹករូបនេះបានបន្ថែមទៀតថា៖ «ជុំវិញទម្រង់លេងរបស់យើង គឺយើងសមតែនឹងឈ្នះនៅរាត្រីនេះ ប៉ុន្តែយើងនៅសល់គ្នាតែ ៩ នាក់ ប៉ុន្តែយើងនៅតែមានអារម្មណ៍ល្អនៅពេលយើងមានទម្រង់លេងបែបវិជ្ជមានដូច្នេះ»៕ AFP/SN