ក្រុងឡុងដ៍៖ ក្រុមបិសាចក្រហម Man Utd និងក្រុម Sheffield United បានប្រកួតស្មើគ្នា ៣-៣ នៅកីឡដ្ឋាន Bramall Lane របស់ក្លិបម្ចាស់ផ្ទះ Sheffield ពីថ្ងៃអាទិត្យដោយក្រុមម្ចាស់ផ្ទះរកបានគ្រាប់បាល់ចុងក្រោយ ដើម្បីតាមស្មើវិញបន្ទាប់ពីក្រុមភ្ញៀវរកបានគ្រាប់ទី ៣ នៅរយៈពេលតែ ៧ នាទីមុនការបញ្ចប់។
ក្រុមរបស់លោក Ole Gunnar Solskjaer ត្រូវបានក្រុមម្ចាស់ផ្ទះនាំមុខ ២ គ្រាប់មុន ដែលរកបានដោយកីឡាករ John Fleck និងកីឡាករ Lys Mousset ប៉ុន្តែនៅនាទីទី ៧២ និងទី ៧៧ កីឡាករ Brandon Williams និង Mason Greenwood រកបានម្នាក់ ១ គ្រាប់ ដើម្បីលុបចោលការនាំមុខរបស់ក្រុមម្ចាស់ផ្ទះនោះមុនពេលកីឡាករ Rashford បានបន្ថែម ១ គ្រាប់ទៀត នៅនាទីទី ៧៩ ដើម្បីជួយឲ្យក្រុមភ្ញៀវនាំមុខក្រុមម្ចាស់ផ្ទះវិញម្ដង។
ប៉ុន្តែនៅនាទីទី ៩០ ក្រុមម្ចាស់ផ្ទះរកបាន ១ គ្រាប់ទៀត ដោយកីឡាករ Oliver McBurnie ដើម្បីជួយឲ្យម្ចាស់ផ្ទះតាមស្មើក្រុមភ្ញៀវវិញ ៣-៣។
លទ្ធផលនេះមានន័យថា ក្លិប Man Utd ស្ថិតនៅចំណាត់ថ្នាក់ទី ៩ នៃក្របខ័ណ្ឌ Premier League ដោយតាមពីក្រោយ ៩ ពិន្ទុ នៃក្រុម Chelsea ដែលឈរនៅលេខ ៤ ខណៈក្លិប Sheffield ស្ថិតនៅលេខ ៦ ដោយនាំមុខ ១ ពិន្ទុ។
លោក Solskjaer គ្រូបង្វឹកក្លិប Man Utd បានប្រាប់ Sky Sports ថា៖ «នៅពេលអ្នកតាមពីក្រោយ ២-០ អ្នកត្រូវប្រឹងប្រែងលេងរហូតតាមស្មើ ហើយអាយុមធ្យមនៃការរកបានគ្រាប់បាល់ គឺតិចជាង ២០ ឆ្នាំ ជាអ្វីដែលយើងមានមោទនភាពបំផុត»។
គ្រូបង្វឹករូបនេះបានបន្ថែមថា៖ «វាជាបទពិសោធន៍អស្ចារ្យមួយសម្រាប់យុវកីឡាករព្រោះវាមិនងាយស្រួលតាមស្មើនៅកន្លែងបែបនេះទេ»។
គ្រូបង្វឹករូបនេះបានបន្ថែមទៀតថា៖ «វាជាអារម្មណ៍ក្ដុកក្ដួល ហើយយើងពិតជាសប្បាយចិត្ត។ ទោះជាយើងលេងមិនបានល្អភាគច្រើនពិតមែនប៉ុន្តែយើងអាចទប់ទល់បាន និងបានបង្ហាញពីអ្វីដែលយើងអាចធ្វើបាន។ យើងត្រូវធ្វើវាឥឡូវនេះសម្រាប់ការប្រកួតទាំងស្រុង។ យើងដឹងថា យើងអាចធ្វើបាន ហើយយើងត្រូវតែបង្ហាញឲ្យគេឃើញ»។
នៅថ្ងៃអាទិត្យនោះដែរ ក្លិប Marseille បានវិលទៅឈរនៅលេខ ២ ម្ដងទៀត នៃក្របខ័ណ្ឌ Ligue 1 នៅពេលពួកគេបានឈ្នះក្រុម Toulouse ២-០ ដែលនៅសល់គ្នាតែ ១០ នាក់។
ក្នុងការប្រកួតនៅទីក្រុង Toulouse ប្រទេស បារាំង ក្រុមម្ចាស់ផ្ទះត្រូវបានកាត់បន្ថយសមាជិកនៅសល់គ្នាតែ ១០ នាក់ នៅពេលខ្សែបម្រើស្លាបស្ដាំ Steven Moreira បានបង្កកំហុសទៅលើកីឡាករ Bouna Sarr និងទទួលបានកាតក្រហមក្រោយពីអាជ្ញាកណ្ដាលបានពិនិត្យមើលវីដេអូជំនួយអាជ្ញាកណ្ដាលរួចហើយ។
ក្រុម Marseille បានគ្រប់គ្រងបាល់ភាគច្រើន ប៉ុន្តែទើបតែបំបែកបានទម្រង់លេងរបស់ក្លិប Toulouse នៅនាទីទី ៧៦ ដែលកីឡាករ Dario Benedetto រកបានគ្រាប់បាល់ទី ១ មុនពេលកីឡាករ Nemanja Radonjic បានបន្ថែម ១ គ្រាប់ទៀតនៅនាទីទី ៧៩ ធ្វើឲ្យក្រុមភ្ញៀវឈ្នះក្រុមម្ចាស់ផ្ទះ ២-០។
គ្រូបង្វឹកក្លិប Marseille លោក Andre Villas-Boas បាននិយាយថា៖ «យើងលេងបានល្អ ហើយជ័យជម្នះនេះ គឺស័ក្តិសមបំផុត»។
លោក Villas-Boas បានបន្ថែមទៀតថា៖ «យើងរក្សាបានចំណាត់ថ្នាក់លេខ ២ ហើយយើងត្រូវតែបន្តទៅមុខបែបនេះទៀត»៕ AFP/SN