ក្រុងម៉ា្រឌីដ៖ គ្រូបង្វឹកក្លិប Real Madrid លោក Zinedine Zidane អាចជួបចរចាជាថ្មីម្ដងទៀតជាមួយនាយកកីឡានៅក្លិប PSG គឺលោក Leonardo ក្រោយប្រកាសពីការស្រឡាញ់របស់គាត់ចំពោះតារាខ្សែប្រយុទ្ធ Kylian Mbappe។
កីឡាករ Mbappe អាយុ ២០ ឆ្នាំ មានបំណងចេញពីក្លិបលេងនៅក្របខ័ណ្ឌបារាំង Ligue 1ដ៏ធំមួយនេះជាទីដែលរូបគេបានក្លាយជាតារាបាល់ទាត់តាំងពីទៅដល់ទីនោះនៅឆ្នាំ ២០១៧។
លោក Zidane គឺជាគ្រូបង្វឹកម្នាក់ដែលចង់បានខ្សែប្រយុទ្ធជម្រើសជាតិបារាំងរូបនេះជាយូរមកហើយ ដោយបាននិយាយពីខែមុនថា វាជាក្ដីសុបិនរបស់កីឡាករ Mbappe ចង់លេងនៅក្លិប Real Madrid។
ក្ដីសុបិននោះបានធ្វើឲ្យលោក Leonardo ឆ្លើយតបថា៖ «វាបានរំខានខ្ញុំបន្តិចហើយ។ នេះមិនមែនជាពេលដែលត្រូវជជែកគ្នាពីបញ្ហានេះទេព្រោះគាត់នៅជាប់កុងត្រាជាមួយយើងរយៈពេល ២ ឆ្នាំកន្លះទៀត។ វាដល់ពេលត្រូវបញ្ឈប់ហើយ»។
ដោយនិយាយនៅមុនពេលប្រកួតគ្នារវាងក្លិប Real និង PSG ក្នុងក្របខ័ណ្ឌ Champions League កាលពីថ្ងៃអង្គារ នោះ លោក Zidane បានបញ្ជាក់ជាថ្មីម្ដងទៀតពីការចង់បានរបស់គាត់ចំពោះអ្នកនាំជ័យជម្នះ World Cup រូបនេះ។
គ្រូបង្វឹករូបនេះបាននិយាយក្នុងសន្និសីទកាសែតថា៖ «អ្នកដឹងហើយថា ខ្ញុំបានស្គាល់គាត់ជាយូរមកហើយ។ ខ្ញុំពិតជាជាប់ស្នេហ៍នឹងគាត់ព្រោះគាត់បានមកធ្វើការសាកល្បងនៅទីនេះជាយូរមកហើយ»។
គ្រូបង្វឹក Zidane បានបន្ថែមថា៖ «នៅថ្ងៃអង្គារ គាត់មកក្នុងនាមជាគូប្រជែង ប៉ុន្តែអ្វីដែលសំខាន់ចំពោះខ្ញុំនោះ គឺជាអ្វីដែលយើងនឹងធ្វើ ហើយយើងនឹងរៀបចំសម្រាប់រឿងនេះ។ យើងស្គាល់កីឡាកររូបនេះ ហើយយើងត្រូវតែត្រៀមខ្លួនយកគេឲ្យបាន»។
កីឡាករ Mbappe អាចលេងជាមួយកីឡាករ Neymar នៅកីឡដ្ឋាន Santiago Bernabeu បន្ទាប់ពីកំពូលតារាប្រេស៊ីល Neymar បានបង្ហាញខ្លួនជាលើកដំបូងក្នុងរយៈពេលមួយខែក្នុងក្របខ័ណ្ឌ Ligue 1 ដោយឈ្នះក្រុម Lille ពីថ្ងៃសុក្រ។
លោក Zidane ជឿជាក់ថា កីឡាករទាំង ២ នេះនឹងត្រូវជាប់ឈ្មោះក្នុងការចាប់ផ្ដើមរបស់គ្រូបង្វឹកលោក Thomas Tuchel និងរំពឹងថា នឹងមានការធ្វើតេស្តដ៏ស្វិតស្វាញមួយនៅក្នុងពេលប្រកួតនឹងក្រុមមួយដែលគាត់បានដាក់ចំណាត់ថ្នាក់នៅក្នុងចំណោមក្លិបល្អបំផុតនៅលើពិភពលោក។
គ្រូបង្វឹកក្លិប Real រូបនេះបានពន្យល់ថា៖ «គ្មានអ្វីគួរឲ្យផ្លាស់ប្ដូរសម្រាប់ខ្ញុំទេ ពីព្រោះខ្ញុំគិតថា Neymar និង Mbappe នឹងចូលលេងរួមគ្នា។ យើងត្រៀមខ្លួនប្រកួតជាមួយក្រុមទាំងអស់ទោះជាស្ថិតនៅក្នុងករណីណាក៏ដោយ»៕ APF/SN