.jpg)
លោក ហៅ សុជាតិ និងលោក Tunji Akeep Ayoyinka ចាប់ដៃស្វាគមន៍គ្នា នៅក្នុងសន្និសីទ។ CNCC
ភ្នំពេញៈ គ្រូបង្វឹកក្រុមបឹងកេត លោក ហៅ សុជាតិ បានចាត់ទុកការជួបក្រុមវិសាខាក្នុងការប្រកួតវគ្គពាក់កណ្តាលផ្តាច់ព្រ័ត្រពានរង្វាន់សម្តេច ហ៊ុន សែន ដែលនឹងត្រូវធ្វើនៅពហុកីឡដ្ឋានជាតិ ល្ងាចម៉ោង ៦ ថ្ងៃពុធនេះ គឺដូចគ្នាទៅនឹងការជួបក្រុមជម្រើសជាតិកម្ពុជាអ៊ីចឹងដែរ ដែលអាចនឹងមានភាពតានតឹងខ្លាំងចំពោះបឹងកេត។
លោក ហៅ សុជាតិ បានថ្លែងនៅក្នុងសន្និសីទកាសែតថា៖ «នេះជាការប្រកួតដ៏សំខាន់មួយរបស់បឹងកេត ហើយក៏ជាការប្រកួតដ៏តានតឹងមួយផងដែរ ព្រោះយើងដឹងស្រាប់ហើយថា វិសាខា ជាក្រុមមួយដែលសម្បូរដោយកីឡាករខ្មែរល្អៗ ហើយមកដល់ពេលនេះ ជម្រើសរើស ១១ នាក់ដំបូងរបស់គាត់ ចង់ជម្រើសជាតិទាំងអស់ទៅហើយ អ៊ីចឹងថ្ងៃពុធនេះ យើងដូចលេងជាមួយជម្រើសជាតិអ៊ីចឹង ហេតុនេះយើងនឹងព្យាយាមរៀបចំឲ្យបានល្អបំផុត»។
គួររឭកថា កីឡាកររបស់វិសាខា រហូតដល់ ១០ នាក់ ត្រូវបានកោះហៅឲ្យចូលរួមនឹងក្រុមជម្រើសជាតិកម្ពុជា មុនពេលជម្រុះចោល ៥ នាក់វិញ គឺសល់តែ ឆេង ម៉េង, កែន ច័ន្ទសុភ័ក្ត្រ, កែវ សុខផេង, កែវ សុខសិលា និង អ៊ុក សុវណ្ណ ដើម្បីប្រកួតជាមួយក្រុមហុងកុង និងក្រុមបារ៉ែន កាលពីពេលថ្មីៗនេះ ខណៈបឹងកេត នៅសល់តែសេត រ៉ូស៊ីប ម្នាក់ប៉ុណ្ណោះ បានជាប់ក្នុងបញ្ជី ២៣ នាក់ចុងក្រោយ បន្ទាប់ពីមិត្តរួមក្រុមរបស់គេ ៣ នាក់ ត្រូវបានជម្រុះចោលវិញនោះ។
ទាក់ទងទៅនឹងការជាប់ក្នុងក្រុមជម្រើសជាតិនេះ លោក ហៅ សុជាតិ បាននិយាយថា៖ «វិសាខា មានផលចំណេញច្រើនជាងយើង ដោយសារវិសាខា មានកីឡាករជម្រើសជាតិច្រើនជាង ហើយចំពោះយើងមានផលចំណេញតិចតួចមែនទែន ដោយសារយើងមានជម្រើសជាតិតែម្នាក់»។
យ៉ាងណាក៏ដោយ គ្រូបង្វឹករូបនេះបានបញ្ជាក់ថា៖ «យើងសង្កេតឃើញហើយថា កម្រិតនៃការលេងវាមានភាពប្រហាក់ប្រហែលគ្នា។ បឹងកេត មកដល់ពេលបច្ចុប្បន្ន កីឡាករមួយចំនួន គាត់មានវ័យកាន់តែចាស់ ហើយវិសាខាសម្បូរកីឡាករក្មេងៗ ប៉ុន្តែអ្វីដែលសំខាន់ ខ្ញុំគិតថា កីឡាករវ័យចាស់របស់ខ្ញុំ អាចនឹងបំពេញតួនាទីបានល្អ និងអាចមានឱកាសល្អ ទៅវគ្គផ្តាច់ព្រ័ត្រ តែចំពោះ លទ្ធផលយ៉ាងម៉េច យើងមិនអាចនិយាយបានមុនទេ គ្រាន់តែថា ការប្រើកីឡាករខ្មែរដូចគ្នា គឺការលេងប្រយុទ្ធ និងការការពារវាមិនគ្រោះថ្នាក់ខ្លាំងទេ សម្រាប់ក្រុមនីមួយៗ»។
ចំណែក លោក Tunji Akeep Ayoyinka គ្រូបង្គោលស្ដីទីក្លិបវិសាខា បានទទួលស្គាល់ថា ការមានកីឡាករជាប់ជម្រើសជាតិច្រើន និងជួយឲ្យក្រុមរបស់លោក ទទួលបានផលចំណេញច្រើន។
លោកបាននិយាយថា៖ «កីឡាករយើងមួយចំនួន បានជាប់កាតព្វកិច្ចជម្រើសជាតិ ដូច្នេះយើងគិតថា វាជាផលចំណេញមួយដែរ សម្រាប់ពួកយើង ព្រោះពួកគេបានហ្វឹកហាត់ក្នុងក្រុមជម្រើសជាតិ ទទួលបានបទពិសោធបន្ថែមកាន់តែល្អទៀត»។
គ្រូបង្វឹកជនជាតិនីហ្សេរីយ៉ារូបនេះ បានបន្ថែមថា៖ «ចំពោះកីឡាករដែលនៅនឹងក្លិប ក៏បានប្រឹងប្រែងយ៉ាងមុតមាំដែរ ហើយពេលអ្នកជាប់ជម្រើសជាតិ វិលមកក្លិបវិញ យើងឃើញថា ការលេងជាមួយគ្នា គឺចុះសម្រុងល្អមែនទែន ដូច្នេះអ្នករាល់គ្នាបានត្រៀមរួចរាល់ទាំងកម្លាំងកាយ និងកម្លាំងចិត្ត»។
យ៉ាងណាក៏ដោយខ្សែការពារជើងចាស់ ទៀន ទីនី ជាប្រធានក្រុមវិសាខា នៅតែមិនទាន់ជឿជាក់ខ្ពស់។ ទីនី បាននិយាយថា៖ «ទោះក្រុមវិសាខា មានកីឡាករជាប់ជម្រើសជាតិច្រើនមែន តែអារម្មណ៍កីឡាករមិនមែនល្អរហូតនោះទេ ជួនកាលកីឡាករយើងដែលមិនធ្លាប់បានលេងដល់វគ្គពាក់កណ្តាលផ្តាច់ព្រ័ត្រនេះ អាចនឹងសម្ពាធ អ៊ីចឹងយើងមិនអាចសន្មតបានថា ការសម្បូរកីឡាករជម្រើសជាតិ យើងអាចឈានទៅដល់ការឈ្នះគេបាននៅឡើយទេ»៕
