ភ្នំពេញ៖ គ្រូបង្វឹកក្រុមជម្រើសជាតិប៉ាគីស្ថាន លោក José Antonio Nogueira បានបង្ហាញការសោកស្តាយខ្លាំង ខណៈក្រុមរបស់លោកបានមកចាញ់ក្រុមម្ចាស់ផ្ទះកម្ពុជា ២-០ ក្នុងការប្រកួតជើងទី១នៃវគ្គជម្រុះ World Cup 2022 និង Asian Cup 2023 ជុំទី១ ក្នុងតំបន់អាស៊ី នៅពហុកីឡដ្ឋានជាតិ កាលពីយប់ថ្ងៃព្រហស្បតិ៍ ប៉ុន្តែគ្រូកម្ពុជា លោក Felix Dalmas ក៏មិនទាន់ស្កប់ចិត្តនឹងជ័យជម្នះនេះប៉ុន្មានដែរ។
លោក José Antonio Nogueira បានមើលឃើញថា ក្រុមជម្រើសជាតិប៉ាគីស្ថាន សមនឹងទទួលបានជ័យជម្នះ នៅក្នុងការប្រកួតលើកនេះ ប៉ុន្តែលោកបានសរសើរទៅដល់អ្នកចាំទី កែវ សុខសិលា ដែលបានបំផ្លាញឱកាសមាស ក្នុងការរកបានគ្រាប់បាល់របស់ក្រុមប៉ាគីស្ថាន តាមរយៈការសង្រ្គោះបាល់បានយ៉ាងល្អរបស់គេ។
គ្រូបង្វឹករូបនេះ បាននិយាយនៅក្នុងសន្និសីទកាសែត ក្រោយការប្រកួតថា៖ «យើងបានវាយបកជាច្រើនលើក ហើយនៅតង់ទី២ យើងបានទទួលឱកាសមាសចំនួន២ដង ដែលសមនឹងរកបានគ្រាប់បាល់ ប៉ុន្តែអ្នកចាំទីរបស់ក្រុមកម្ពុជា បានជួយសង្រ្គោះបាល់នោះដ៏គួរឲ្យអស្ចារ្យ»។
លោក José Antonio Nogueira បានបន្ថែមថា៖ «រយៈពេល ១០ នាទី បន្ទាប់ពីអ្នកចាំទីសង្រ្គោះបាល់ដ៏អស្ចារ្យនោះមក ក្រុមកម្ពុជា ចាប់ផ្ដើមលេងបានកាន់តែល្អ តាមរយៈការយល់ដឹងលើការបញ្ជូនបាល់ និងទាត់បាល់បញ្ចូលទី ដែលជាគ្រាប់បាល់ដ៏ល្អ ស្របពេលយើងមានកំហុស នៅតំបន់ការពារនោះ។ យើងបានព្យាយាមរហូតដល់ទីបញ្ចប់ ប៉ុន្តែជាអកុសលយើងរបូត២គ្រាប់ នៅថ្ងៃនេះ»។
ជាមួយលទ្ធផលស្មើ ០-០ នៅក្នុងតង់ទី១ ក្រុមប៉ាគីស្ថាន បានបង្កើតឱកាសមាសចំនួន២លើក ដែលស្ថិតនៅក្នុងតំបន់គ្រោះថ្នាក់តែម្តង ប៉ុន្តែអ្នកចាំទីមកពីក្លិបវិសាខា កែវ សុខសិលា បានលោតចេញមកសង្រ្គោះបានទាំង២លើក ដ៏គួរឲ្យសរសើរបំផុត ហើយនៅនាទីទី៨១ សៀង ចន្ធា ដែលទើបបានដាក់ឲ្យចូលលេង បានស៊ុតបំប៉ោងសំណាញ់ក្រុមប៉ាគីស្ថាន យ៉ាងល្អ មុនពេលកីឡាករជើងចាស់ គួច សុកុម្ភៈ បានបន្ថែម១គ្រាប់ទៀត នៅនាទីទី៨៤។
ការយកឈ្នះក្រុមជម្រើសជាតិប៉ាគីស្ថាន ២-០ សម្រាប់ការប្រកួតជើងទី១ នៅក្នុងទឹកដីខ្លួនឯងនេះ បានធ្វើឲ្យអ្នកគាំទ្រ ដែលខំប្រឹងតាមដានការប្រកួតទាំងកណ្តាលភ្លៀងនោះ មានការសប្បាយចិត្តយ៉ាងខ្លាំង ហើយជ័យជម្នះនេះ ក៏បានលុបបំបាត់ចោល នូវការរិះគន់មួយចំនួនពីអ្នកគាំទ្រ ជុំវិញការជ្រើសរើសកីឡាករក្មេងៗឲ្យចូលរួមច្រើន សម្រាប់ការប្រមូលផ្តុំ លើកនេះផងដែរ។
លោក Felix Dalmas គ្រូបង្វឹកក្រុមជម្រើសជាតិកម្ពុជា នៅមិនទាន់ពេញចិត្តនឹងជ័យជម្នះនេះប៉ុន្មានទេ ព្រោះក្រុមកម្ពុជា ត្រូវទៅប្រកួតជើងទី២ ជាមួយក្រុមប៉ាគីស្ថាន នៅក្រៅទឹកដីវិញ នាថ្ងៃទី១១ ខែមិថុនា ខាងមុខនេះ។ លោកបាននិយាយ ក្នុងសន្និសីទកាសែត ក្រោយការប្រកួតថា៖ «ពួកយើងនៅមិនទាន់ពេញចិត្តនឹងលទ្ធផល នៅថ្ងៃនេះទេ គឺយើងចង់ឃើញ និងទទួលបានលទ្ធផលល្អៗបន្ថែមទៀត គឺយើងត្រូវធ្វើយ៉ាងម៉េច គ្រប់គ្រងស្ថានភាពនៃការប្រកួតក្រោយ ឲ្យដូចនឹងការប្រកួតនេះដែរ ព្រោះយើងតែងតែចង់បានលទ្ធផលល្អ សម្រាប់ប្រទេសកម្ពុជា»។
ទោះបីជាយ៉ាងណា គ្រូបង្វឹកជនជាតិអាហ្សង់ទីនលោក Felix Dalmas បានលើកឡើងថា ការឈ្នះ ២-០ នេះ នឹងធ្វើឲ្យអ្នកដែលបានរិះគន់មកលើការសម្រេចចិត្តរបស់លោកបានសប្បាយចិត្ត។ លោកបញ្ជាក់ថា៖ «បើទោះបីជាមានអ្នកគាំទ្រមួយចំនួនបានរិះគន់ទៅដល់ការសម្រេចចិត្តរបស់ខ្ញុំ ប៉ុន្តែការរិះគន់នេះ ដោយសារតែគាត់ខ្វល់ និងចង់ឲ្យក្រុមកម្ពុជា មានការរីកចម្រើន និងធ្វើបានល្អ ហេតុនេះ ខ្ញុំមិនផ្តោតសំខាន់ទៅលើការរិះគន់ទាំងនោះទេ ហើយខ្ញុំសង្ឃឹមថា អ្នកទាំងអស់នោះ នឹងសប្បាយរីករាយ នៅពេលដែលឃើញក្រុមកីឡាកររបស់យើងធ្វើបានល្អ និងទទួលបានជ័យជម្នះនៅថ្ងៃនេះ»៕