.jpg)
លោកអាជ្ញាកណ្តាលបានរាប់ទៅលើ បាង កាយ៉ាក ពេលប្រកួតនៅសង្វៀន TV5។ សហការី
ភ្នំពេញៈ គ្រូពេទ្យប្រចាំសង្វៀនប្រដាល់បានទទូចសុំឲ្យគណៈកម្មការផ្គូផ្គង ពិនិត្យមើលកីឡាករដែលសន្លប់ផ្ទួនៗដូចជាករណី បាង កាយ៉ាក ឲ្យផ្អាកការប្រកួតសិន ហើយការលើកឡើងបែបនេះ បន្ទាប់ពី បាង កាយ៉ាក បានបន្តសន្លប់ក្រោមផ្លែកែងកីឡាករថៃ Kaothap ក្នុងការប្រកួតមិត្តភាពអន្តរជាតិនៅសង្វៀនប៉ុស្តិ៍លេខ ៥ កាលពីថ្ងៃសៅរ៍។
កីឡាករ បាង កាយ៉ាក ដែលបាត់មុខយូរមកហើយនោះទើបតែបានសន្លប់ក្រោមស្នាដៃជើងខ្លាំងមកពីអ៊ីរ៉ង់ Ghodratisraskan ត្រឹមទឹកទី ៣ សម្រាប់ការប្រកួតនៅសង្វៀន CNC កាលពីថ្ងៃសៅរ៍សប្តាហ៍មុន ហើយការវិលមកជួបថៃ Kaothap លើកនេះ កាយ៉ាក ចង់ឈ្នះខ្លាំងបំផុត ដើម្បីស្តារភាពល្បីរបស់គេឡើងវិញ ប៉ុន្តែគេបែរជាបន្តបរាជ័យយ៉ាងធ្ងន់ធ្ងរដោយត្រូវបាន Kaothap វាយឲ្យសន្លប់ត្រឹមទឹកទី ២ ប៉ុណ្ណោះ។
តាមលទ្ធផលនេះត្រូវបានគេមើលឃើញថា សមត្ថភាព និងកម្រិតវិជ្ជគុនរបស់ បាង កាយ៉ាក គឺបានធ្លាក់ចុះឆ្ងាយជាងមុន ខណៈដែលកម្លាំងកាយក៏គេមើលឃើញថា ធ្លាក់ចុះសឹងតែ ៥០ ភាគរយ បើប្រៀបធៀបទៅនឹងលើកមុនៗ ព្រោះកាលប៉ុន្មានឆ្នាំមុនក្នុងប្រភេទទម្ងន់ ៥៧ គីឡូក្រាម បាង កាយ៉ាក សឹងតែរកកីឡាករក្នុងស្រុកមានសមត្ថភាពប្រកួតជាមួយគេមិនបាន គឺមានតែកីឡាករមកពីថៃប៉ុណ្ណោះ ដែលស័ក្តិសមជាមួយគេ។
យ៉ាងណាមិញសម្រាប់ការប្រកួតលើកនេះ បាង កាយ៉ាក មិនសូវអស្ចារ្យឡើយ ដោយសារតែស្នៀតល្អប្រចាំកាយរបស់គេគឺក្បាច់ជង្គង់ហាក់បីដូចចេញមិនបានល្អ គឺសឹងតែគ្មានឱកាសសោះ។ មិនតែប៉ុណ្ណោះ កាយ៉ាក ត្រូវបានថៃ Kaothap វាយមួយកែងបណ្តាលឲ្យសន្លប់មុនស្នូរជួងបញ្ចប់ក្នុងទឹកទី ២ តែម្តង។
លទ្ធផលបរាជ័យឆាប់រហ័សបែបនេះអាចធ្វើឲ្យ បាង កាយ៉ាក កាន់តែឃ្លាតឆ្ងាយពីខ្សែភ្នែករបស់មន្ត្រីផ្គូផ្គង ហើយក៏លំបាកយឹតយោងឲ្យប្រកួតទៀត ព្រោះសូម្បីតែបទបញ្ជារបស់គ្រូពេទ្យប្រចាំសង្វៀនប្រដាល់ថ្មីៗនេះបានស្នើសុំទៅមន្ត្រីបច្ចេកទេសសហព័ន្ធសុំឲ្យផ្អាកការប្រកួតកីឡាករណាដែលចាញ់ដោយសន្លប់ផ្ទួនៗចំនួន ២ លើកធ្ងន់ធ្ងរបែបនេះឲ្យសម្រាក ២ សប្តាហ៍សិន។
លោក ជឹម ផល្លា គ្រូពេទ្យប្រចាំសង្វៀនបាននិយាយថា៖ «សូមឲ្យគណៈកម្មការផ្គូផ្គងគ្រប់សង្វៀន មេត្តាពិនិត្យកីឡាករដែលសន្លប់ផ្ទួនៗជាប់ៗគ្នាអ៊ីចឹង ដោយឲ្យផ្អាកប្រកួតសិន ហើយកីឡាករផ្ទាល់គួរតែមកពិនិត្យសុខភាពជាមួយគ្រូពេទ្យរបស់សហព័ន្ធដោយមិនគិតប្រាក់អ្វីទាំងអស់»។
ចំណែកលោកស្រី សាំង សុម៉ាលី ប្រពន្ធ អេ ភូថង ដែលជាគ្រូបង្វឹកបាននិយាយថា៖ «បាង កាយ៉ាក ខ្សោយជាងមុនមែន ព្រោះសព្វថ្ងៃវាមានប្រពន្ធ ហើយទើបតែវិលមកហ្វឹកហាត់ឡើងវិញមិនទាន់បានល្អទេ»។
ចំណែកការប្រកួតរវាងអ្នកប្រដាល់រួមជាតិគូឯកថ្នាក់ជាតិវិញនោះ អ្នកប្រដាល់ជើងចាស់ ឃឹម ពេជ្រចិន្តា របស់ក្លិបកុលបុត្រគុនខ្មែរបានចាញ់អ្នកប្រដាល់ជំនាន់ក្រោយ អេលីត ភក្ដី (ភារម្យ ភក្តី) ក្លិបឆ្មាសសែនសុខគុនខ្មែរ ដោយពិន្ទុ។ ពេជ្រចិន្តា ហាក់ដូចជាចង់អស់ថាមពលហើយ ព្រោះវ័យកាន់តែចាស់ ហើយមើលស្រាលគូប្រកួតទៀត។ ចំពោះកលល្បិចវ៉ៃរបស់គេហាក់ដូចគ្មានការរីកចម្រើន ព្រោះប្រកួត ៥ ទឹកពេញ អេលីត ភក្ដី មានប្រៀបលើ ពេជ្រចិន្ដា ស្ទើរគ្រប់ទឹក ពិសេសនៅ ២ ទឹកចុងក្រោយ អ្នកប្រដាល់ជើងចាស់រូបនេះស្ទើរតែគ្មានកម្លាំង ដើម្បីវ៉ៃឲ្យដល់ទឹកទៀតផងគឺស៊ូទាំងវេទនាភ្នែក៕
