ភ្នំពេញ: គ្រូបង្វឹកក្រុមវិសាខា លោក ហុក ជីវ័ន មិនបានដាក់កំហិតទៅលើកូនក្រុមរបស់លោក ដើម្បីរារាំង ឬបិទក្រុមភ្នំពេញក្រោន កុំឲ្យរកបានគ្រាប់បាននោះទេ នៅពេលក្រុមទាំង ២ ត្រូវមកជួបគ្នាជាថ្មីនៅថ្ងៃអាទិត្យស្របពេលភ្នំពេញក្រោន បានប្តេជ្ញាដណ្តើមយក ៣ ពិន្ទុ បើទោះបីជាពួកគេបានបាត់បង់ខ្សែប្រយុទ្ធមាឌធំរបស់ប្រេស៊ីល Darlan Martins ក៏ដោយ។
សម្រាប់ការជួបគ្នាកាលឆ្នាំ ២០១៨ ក្រុមភ្នំពេញក្រោនបានត្រឹមស្មើ វិសាខា ០-០ នៅក្រៅទឹកដី និងបានចាញ់ ៣-១ នៅក្នុងទឹកដីខ្លួនឯង ខណៈពេលនេះ វិសាខា កំពុងឈរនៅលេខ ៤ មាន ៤ ពិន្ទុ ឯក្រុមភ្នំពេញក្រោនឈរនៅលេខ ៥ មាន ៣ ពិន្ទុ។
លោក ហុក សុជីវ័ន និយាយថា៖ «យើងត្រូវលេងក្រៅទឹកដីជាលើកដំបូង ដោយត្រូវជួបក្លិបមួយដែលជោគជ័យក្នុងវិស័យបាល់ទាត់ ហើយក៏ជាក្លិបមួយ មានការរៀបចំបានល្អក្នុងរដូវកាលនេះផងដែរ តែយើងក៏មានការផ្លាស់ប្តូរទៅតាមស្ថានភាពជាក់ស្តែងនៃគូប្រកួតរបស់យើងដែរ»។
យ៉ាងណាក៏ដោយលោក ជីវ័ន មិនបានដាក់កំហិតទៅលើកូនក្រុមរបស់លោក ក្នុងការបិទផ្លូវរកគ្រាប់បាល់របស់ភ្នំពេញក្រោននោះទេ។ លោកបញ្ជាក់ថា៖ «រឿងរបូតគ្រាប់បាល់គឺយើងមិនអាចកំណត់បានថា ដាច់ខាតមិនឲ្យគេទាត់ចូលនោះទេ ព្រោះបាល់ទាត់ បើយើងដាក់គោលដៅនេះមួយវាអាចប៉ះពាល់ដល់កីឡាករ ព្រោះគាត់អាចប្រឹងប្រែងជ្រុល និងចាប់អារម្មណ៍ការការពារជ្រុល អ៊ីចឹងវាធ្វើឲ្យការប្រយុទ្ធអាចនឹងធ្លាក់ចុះ ដូច្នេះយើងព្យាយាមនឹងកាត់ផ្ដាច់របៀបលេងរបស់គេ ហើយបើអាចយើងនឹងព្យាយាមធ្វើម៉េចឲ្យទទួលបានលទ្ធផលល្អគឺជោគជ័យ ដើម្បីឆ្លើយតបតាមគោលដៅក្លិបចង់បាន»។
ចំណែកក្រុមភ្នំពេញក្រោនក៏មានមហិច្ឆតាចង់បាន ៣ ពិន្ទុពីការប្រកួតនេះផងដែរ ប៉ុន្តែក្តីបារម្ភក៏បានកើតមានឡើងចំពោះក្រុមនេះផងដែរ ខណៈខ្សែប្រយុទ្ធមាឌធំ Darlan Martins ដែលជាក្តីសង្ឃឹមក្នុងការរកគ្រាប់បាល់ឲ្យក្រុមមានបញ្ហារបួសស្មា ហើយបានវិលទៅព្យាបាលរបួសនៅប្រទេសប្រេស៊ីលវិញនោះ។
អតីតកីឡាករដ៏មានបទពិសោធ កែវ សុខង៉ន ជាអ្នកចាត់ការទូទៅក្លិបភ្នំពេញក្រោន បានប្រាប់កាលពីម្សិលមិញថា៖ «សម្រាប់ខ្ញុំដាច់ខាតត្រូវការ ៣ ពិន្ទុជាចាំបាច់ ដើម្បីប្រជែងជាមួយក្រុមផ្សេងៗទៀតដែលយើងមើលឃើញថា សុទ្ធតែរៀបចំក្រុមបានល្អ ប៉ុន្តែលទ្ធផលទទួលបានជាក់ស្តែងយ៉ាងណានោះ ក៏យើងមិនទាន់ដឹងដែរ ព្រោះក្រុមវិសាខាអាចរៀបចំបានល្អជាងយើងក៏ថាបានដែរ ហើយបាល់ទាត់ចៀសមិនផុតទេ រឿងចាញ់ ឈ្នះ អ៊ីចឹងយើងនឹងប្រឹងប្រែងធ្វើឲ្យអស់លទ្ធភាព»។
ជុំវិញការបាត់បង់ខ្សែប្រយុទ្ធ Darlan Martins សុខង៉ន បានបញ្ជាក់ថា៖ «សម្រាប់ក្លិបពិតជាមានការប៉ះពាល់មែនទែន ព្រោះបច្ចុប្បន្ននេះយើងខ្វះខ្សែប្រយុទ្ធ ហើយការបញ្ចប់ទីរបស់យើងក៏នៅរាងខ្សោយ តែយើងក៏មិនដឹងធ្វើយ៉ាងម៉េចដែរ នៅពេលគាត់មានបញ្ហារបួសបែបនេះ ប៉ុន្តែយើងក៏សប្បាយចិត្តដែរ ពេលកីឡាករមានរបួសកន្លងមកដូចជា ម៉ៅ ពិសិដ្ឋ និង ពៅ ប៉ុនវុឌ្ឍី អាចវិលមកជួយក្រុមបានវិញនោះ»។
ដោយឡែកក្រុមកំពុងឈរនៅកំពូលតារាងមាន ៦ ពិន្ទុ ព្រះខ័នរាជស្វាយរៀង ត្រូវជួបក្រុមគិរីវង់សុខសែនជ័យ ហើយក្រុមឈរនៅលេខ ២ មាន ៤ ពិន្ទុ អង្គរថាយហ្គឺរ ត្រូវប៉ះក្រុមបឹងកេត ខណៈក្រសួងការពារជាតិ (ទ័ព) ដែលឈរនៅលេខ ៣ មាន ៤ ពិន្ទុ ត្រូវប៉ះក្រុមខេត្តកំពង់ចាម៕
កម្មវិធីប្រកួតនៅថ្ងៃសៅរ៍
-អាស៊ីអឺរ៉ុប v សូលទីឡូអង្គរ កីឡ.អាស៊ីអឺរ៉ុបស្ពតផាក ១៥:៣០
-ទ័ព v ខេត្តកំពង់ចាម កីឡដ្ឋានស្តាតចាស់ ១៨:០០
-អគ្គិសនីកម្ពុជា v សាលាបាល់ទាត់ជាតិ កីឡដ្ឋានអគ្គិសនីកម្ពុជា ១៥:៣០
៤ ប្រកួតនៅថ្ងៃអាទិត្យ
-គិរីវង់ v ព្រះខ័នរាជស្វាយរៀង កីឡដ្ឋានគិរីវង់ ១៥:៣០
-ណាហ្គាវើល v ប៉ូលិស កីឡដ្ឋានស្តាតចាស់ ១៨:០០
-អង្គរថាយហ្គឺរ v បឹងកេត កីឡដ្ឋានសៀមរាប ១៥:៣០
-វិសាខា v ភ្នំពេញក្រោន កីឡដ្ឋាន RSN ១៨:០០