.jpg)
ខ្សែប្រយុទ្ធ Privat របស់ក្រុមស្វាយរៀង បានព្យាយាមឆ្កឹះបាល់ចេញពីការតាមបិទរបស់ក្រុមបឹងកេត កាលពីថ្ងៃសៅរ៍។ រូប CNCC
ភ្នំពេញៈ គ្រូបង្វឹកក្រុមព្រះខ័នរាជស្វាយរៀង បានចាត់ទុកការយកឈ្នះក្រុមបឹងកេត ជាការ «សាងប្រវត្តិសាស្រ្តថ្មី» សម្រាប់ក្លិបមួយនេះ ក្នុងការខិតកាន់តែកៀកទៅរកការឈ្នះពានលីកកំពូលកម្ពុជា ប្រចាំឆ្នាំ ២០១៩ ប៉ុន្តែក្រុមណាហ្គាវើល បានធ្លាក់ចេញពីលេខ២ ជាថ្មីម្តងទៀត ក្រោយពួកគេបានចាញ់ក្រុមម្ចាស់ផ្ទះ អង្គរថាយហ្គឺរ ចំណែកក្រុមក្រសួងការពារជាតិ កាន់តែបាត់បង់ឱកាស ក្នុងការសម្រេចគោលដៅ ខណៈពួកគេបានបន្តចាញ់ក្រុមគិរីវង់សុខសែនជ័យ នៅលើទឹកដីខ្លួនឯងនោះ។
លោក ជូ សារឿន គ្រូជំនួយក្រុមព្រះខ័នរាជស្វាយរៀង បានប្រាប់ភ្នំពេញប៉ុស្តិ៍ កាលពីថ្ងៃអាទិត្យថា៖ «ការយកឈ្នះបឹងកេតលើកនេះ វាដូចជាការបង្កើតប្រវត្តិសាស្រ្តមួយផងដែរសម្រាប់ក្លិបរបស់យើង ព្រោះការប្រកួតភាគច្រើនយើងបានចាញ់ និងបានត្រឹមស្មើបឹងកេត ហើយការឈ្នះបាន ៣ ពិន្ទុលើកនេះ បានធ្វើឲ្យយើងខិតទៅកៀកបំផុតក្នុងការលើកពាន គឺមានន័យថា បើយើងអាចយកឈ្នះណាហ្គាវើល ឬវិសាខា តែ ១ ប្រកួតទៀត យើងនឹងលើកពានដោយស្វ័យប្រវត្តិតែម្តង»។
យ៉ាងណាក៏ដោយគ្រូបង្វឹករូបនេះ ហាក់មិនសូវពេញចិត្តទៅលើលទ្ធផលនេះប៉ុន្មានឡើយ ហើយលោកបានចាត់ទុកការប្រកួតជាមួយបឹងកេតលើកនេះ ជាការប្រកួតដែល «គ្មានសាច់បាល់លេង» ព្រោះតាក់ទិចលេងរបស់កីឡាករ និងប្រព័ន្ធលេងរបស់ក្រុមស្វាយរៀង មិនអាចធ្វើទៅបានល្អ ដោយសារទីលានមានផ្ទៃដីមិនស្មើ និងមានស្មៅរេចៗ ពិបាកក្នុងការលេង។
លោក ជូ សារឿន បានបញ្ជាក់ថា៖ «ការយកឈ្នះលើបឹងកេត លើកនេះ វាមានការពិបាកណាស់ ព្រោះវាអត់មានសាច់បាល់លេង! តាក់ទិចរបស់កីឡាករ និងប្រព័ន្ធដែលយើងត្រូវលេង គឺអត់មានតែម្តង ដោយសារទីលាន មិនល្អសោះ អ៊ីចឹងយើងមានតែលេងដោយការទាត់បាល់បំផ្លោងឡើងទៅលើ និងរំពឹងទៅលើបាល់ជ្រុង និងហ៊្រ្វីឃីក ហើយជ័យជម្នះនេះវាកើតឡើងដោយការទាត់ហ៊្រ្វីឃីក របស់ នេន សុធារ័ត្ន»។
តាមរយៈការប្រកួតនៅកីឡដ្ឋានខេមបូឌាអ៊ែរវ៉េ កាលពីថ្ងៃសៅរ៍នោះ ក្រុមស្វាយរៀងមានភាគរយគ្រប់គ្រងបាល់បានច្រើនជាងក្រុមម្ចាស់ផ្ទះបឹងកេត ប៉ុន្តែខ្សែប្រយុទ្ធ Oiboh Julius បានស៊ុតបំប៉ោងសំណាញ់ទីក្រុមស្វាយរៀងបានមុន ដើម្បីជួយឲ្យបឹងកេតនាំមុខ ១-០ នៅត្រឹមនាទីទី៣០។
យ៉ាងណាក៏ដោយ ការទាត់បាល់បំផ្លោងឡើងទៅលើរបស់អ្នកចាំទី អាំ សុវណ្ណារ៉ាត់ បានធ្វើឲ្យខ្សែប្រយុទ្ធឆ្នើម Privat រត់ទៅគ្រប់គ្រងបាល់នោះ រួចអូសរំលងខ្សែការពារ ទេស សម្បត្តិ របស់បឹងកេត និងស៊ុតបញ្ជូលទីបានយ៉ាងល្អ នៅនាទីទី ៣២ ហើយនៅនាទីទី ៦៤ នេន សុធារ័ត្ន បានរកគ្រាប់បាល់ជ័យជម្នះឲ្យក្រុមស្វាយរៀង តាមរយៈការទាត់បាល់ហ៊្រ្វីឃីក ពីក្រៅតំបន់គំនូសស បញ្ចូលទីបានយ៉ាងល្អបំផុត។
ជ័យជម្នះនេះ បានជួយឲ្យក្រុមស្វាយរៀង នៅតែរក្សាបាននូវកំណត់ត្រាដ៏ល្អរបស់ខ្លួន គឺការឈ្នះ ១៧ និងស្មើ ៤ មាន ៥៥ ពិន្ទុដាច់ឆ្ងាយពីក្រុមលេខ ២ រហូតដល់ ៨ ពិន្ទុ ខណៈការប្រកួតនៅសល់ត្រឹម ៥ លើកទៀត នឹងត្រូវបញ្ចប់ហើយ។ ហេតុនេះក្រុមស្វាយរៀង មានភាគរយលើសពី ៩០ ភាគរយ ទៅហើយ ក្នុងការឈ្នះពាននៅឆ្នាំនេះ។
ចំណែកខ្សែប្រយុទ្ធ Da Crus រកបាន ៥ គ្រាប់តែម្នាក់ឯង នៅពេលក្រុមវិសាខា បានលត់ក្រុមសាលាកីឡាបាល់ទាត់ជាតិបាទី ៧-០ កាលពីថ្ងៃសៅរ៍នោះដែរ ហើយជ័យជម្នះបានជួយឲ្យ វិសាខា មាន ៤៧ ពិន្ទុ និងបានឡើងទៅឈរនៅលេខរៀងទី២ ជាថ្មីម្តងទៀត ខណៈក្រុមណាហ្គាវើល បានចាញ់ទៅចាញ់ក្រុមម្ចាស់ផ្ទះអង្គរថាយហ្គឺរ ១-០ កាលពីថ្ងៃអាទិត្យ ធ្វើឲ្យពួកគេ មានត្រឹម៤៤ពិន្ទុដដែលនោះ។
ការយកឈ្នះលើក្រុមណាហ្គាវើល នេះដែរ បានជួយឲ្យក្រុមអង្គរថាយហ្គឺរ បានឡើងមកឈរនៅលេខ៤វិញផងដែរ ដោយមាន៤២ពិន្ទុ ដោយបានទម្លាក់ក្រុមបឹងកេត ដែលមាន ៤១ ពិន្ទុដដែល ឲ្យទៅឈរនៅលេខ៥វិញ។ ចំណែកក្រុមភ្នំពេញក្រោន បានយកឈ្នះក្រុមសូលទីឡូអង្គរ ២-១ ដើម្បីសម្រេចការសងសឹកចំពោះការចាញ់ ១-០ កាលពីជើងទី១ និងបន្តឈរនៅលេខ ៦ ដោយមាន ៣៨ ពិន្ទុ។
ផ្ទុយពីនេះ ក្រុមក្រសួងការពារជាតិ (ទ័ព) មិនត្រឹមតែមិនអាចសងសឹកទៅលើក្រុមគិរីវង់សុខសែនជ័យ ចំពោះការចាញ់ ៤-១ កាលពីជើងទី១ បានប៉ុណ្ណោះទេ គឺពួកគេបានបន្តចាញ់គិរីវង់ ២-១ នៅលើទឹកដីខ្លួនឯងជាថ្មីម្តងទៀត កាលពីថ្ងៃសៅរ៍ ហើយលទ្ធផលនេះបានធ្វើឲ្យទ័ព ថមថយភាគរយកាន់តែខ្លាំងក្នុងការប្រជែងឡើងទៅតំបន់កំពូលតារាងទាំង ៤ ព្រោះពេលនេះពួកគេមាន ៣៥ ពិន្ទុដដែល និងកំពុងឈរនៅលេខរៀងទី៧៕
