ភ្នំពេញ៖ ក្រុមអគ្គិសនីកម្ពុជា ដែលធ្លាប់តែរងសម្ពាធខ្លាំងនៅលីកកំពូលកម្ពុជានោះ ហាក់មានការជឿជាក់ខ្លាំងថា ពួកគេអាចនឹងមានសមត្ថភាពទម្លាក់ក្រុមណាហ្គាវើល នៅក្នុងវគ្គជម្រុះ ១៦ ក្រុមថ្នាក់ជាតិ ពានរង្វាន់សម្តេច ហ៊ុន សែន លើកទី១៤ ឆ្នាំ ២០២០ ដើម្បីឡើងទៅវគ្គបន្ត ចំណែកក្រុមចំនួន ៨ ទៀត ក៏នឹងត្រូវប្រកួតប្រជែងគ្នា នៅជើងទី១ នាថ្ងៃពុធនេះផងដែរ។
គ្រូបង្វឹកក្រុមអគ្គិសនីកម្ពុជា លោក មាស សំអឿន បានទទួលស្គាល់ថា កូនក្រុមរបស់លោកពិតជាមានយ៉ាប់កម្លាំង ខណៈពួកគេទើបតែធ្វើការងារធ្ងន់ សម្រាប់ការទៅជួបក្រុមសូលទីឡូអង្គរ ក្នុងលីកកំពូលកាលពីថ្ងៃអាទិត្យ។
លោកប្រាប់ថា៖ «ការយកឈ្នះក្រុមសូលទីឡូអង្គរ ៣-២ កាលពីថ្ងៃអាទិត្យ គឺកូនក្រុមរបស់ខ្ញុំបានខំប្រឹងលេងដល់ថ្នាក់រមួលក្រពើ អ៊ីចឹងហើយខ្ញុំមិនសូវឲ្យពួកគាត់ហាត់ត្រៀមច្រើនទេ គឺយើងឲ្យពួកគាត់សម្រាកភាគច្រើន»។
យ៉ាងណាក៏ដោយ គ្រូបង្វឹកជើងចាស់រូបនេះ បន្ថែមថា៖ «ខ្ញុំគិតថា គុណភាពកម្លាំងរបស់ពួកគាត់បានប្រសើរវិញហើយ ហើយយើងក៏មិនបានចាត់ទុកថា ណាហ្គាវើល ជាក្រុមអន់នោះដែរ ប៉ុន្តែការប្រកួតពានសម្តេច ដែលប្រើប្រាស់កីឡាករខ្មែរសុទ្ធ គឺយើងជឿជាក់ច្រើន ព្រោះយើងបានលេងដោយប្រើប្រាស់កីឡាករក្នុងស្រុកសុទ្ធរហូតមកហើយ ហេតុនេះខ្ញុំគិតថា ការជួបក្រុមណាហ្គាវើល ក្នុងវគ្គជម្រុះ ១៦ ក្រុមនេះ យើងនឹងអាចឆ្លងផុត ដើម្បីឡើងទៅវគ្គបន្ត»។
ចំណែកក្រុមណាហ្គាវើល ដែលភាគច្រើនធ្វើបានល្អ និងជាក្រុម ដែលបានឡើងទៅដល់វគ្គផ្តាច់ព្រ័ត្ររហូតដល់ ៦ លើក (ឈ្នះជើងឯកបានម្តងនៅឆ្នាំ ២០១៣) ក្នុងពាននេះ មិនបានគិតថា ការបើកកីឡដ្ឋានស្តាតចាស់ ដើម្បីស្វាគមន៍ក្រុមអគ្គិសនីកម្ពុជានៅល្ងាចម៉ោង ៦ ថ្ងៃពុធ ជារឿងងាយស្រួលនោះទេ។
លោក មាស ចាន់ណា គ្រូបង្វឹកក្រុមណាហ្គាវើល បានប្រាប់ថា៖ «ក្រុមអគ្គិសនីកម្ពុជា មានយុវជនមកពីបាទីចូលរួមច្រើន ហើយក្រុមនេះបានលេងជាមួយគ្នា ដោយប្រើកីឡាករខ្មែរសុទ្ធរហូតមកហើយ ផ្ទុយពីនេះក្រុមខ្ញុំ ដែលត្រៀមលេងពានសម្តេចនេះ គឺយើងមិនទាន់បានលេងជាមួយគ្នានោះទេ ដោយយើងបានលេងជាមួយគ្នា តែក្នុងលីកកំពូល អ៊ីចឹងខ្ញុំគិតថា ការជួបអគ្គិសនីកម្ពុជាមានការលំបាកដែរ»។
នៅពេលសួរពីជម្រើស ១១ នាក់ដំបូង ដែលនឹងត្រូវដាក់ឲ្យលេងជាមួយក្រុមអគ្គិសនីកម្ពុជា លោក មាស ចាន់ណា បានបង្ហើបថា៖ «យើងនឹងមិនប្រើប្រាស់យុវជនច្រើននោះទេ សម្រាប់ការប្រកួតពានសម្តេចលើកនេះ ដោយសារគុណភាពលេងរបស់ពួកគាត់នៅមានកម្រិត ហេតុនេះយើងមិនអាចប្រថុយប្រឋានបានឡើយ គឺយើងត្រូវតែធ្វើឲ្យបានច្បាស់ ព្រោះវគ្គ ១៦ ក្រុមពានសម្តេចនេះ គឺចាញ់ធ្លាក់ៗ»។
ផ្ទុយពីនេះក្រុមអង្គរថាយហ្គឺរ ត្រូវបានគេមើលឃើញថា អាចនឹងទទួលបានជ័យជម្នះសម្រាប់ការបើកកីឡដ្ឋាន SRU ទទួលក្រុមជើងឯកថ្នាក់ខេត្ត ខេត្តព្រៃវែង នៅរសៀលម៉ោង ៣:៣០ ថ្ងៃពុធនេះ ប៉ុន្តែ លោក Oriol Segura មិនបានមើលរំលងពីការប្រកួតនេះទេ ព្រោះលោកបានដឹងរួចទៅថា ក្រុមដែលលេងតំណាងឲ្យខេត្តព្រៃវែង គឺជាក្រុមយុវជនរបស់ក្លិបវិសាខា។
លោក Oriol Segura គ្រូបង្វឹកក្រុមអង្គរថាយហ្គឺរ បាននិយាយថា៖ «យើងនឹងលេងទល់នឹងក្មេងៗ ក្នុងប្រទេសដែលមានទេពកោសល្យ ហើយយើងត្រូវចងចាំថា ពួកគេគឺជាចំណែកមួយនៃក្លិបវិសាខា ដូច្នេះមានន័យថា យុវជនទាំងនោះជាផ្នែកមួយនៃភាពជោគជ័យយ៉ាងធំធេង នៃគម្រោងវិនិយោគលើបាល់ទាត់របស់ពួកគេ។ ខ្ញុំរីករាយក្នុងការលេងជាមួយពួកគេ ហើយក្រុមព្រៃវែងនឹងក្លាយជាគូប្រកួតដ៏ល្អមួយ ដែលយើងត្រូវជួបក្នុងវគ្គ ១៦ ក្រុមនេះ»។
ដោយឡែកក្រុមអាស៊ីអឺរ៉ុប នឹងត្រូវប្រឈមជាមួយក្រុមសម្បូរធនធានវ័យក្មេង ភ្នំពេញក្រោននៅកីឡដ្ឋាន RSN នាល្ងាចម៉ោង ៦ ចំណែកក្រុមធ្លាប់ឈ្នះជើងឯក ៣ ដង កងយោធពលខេមរភូមិន្ទ ត្រូវជួបក្រុមខេត្តកែប នៅកីឡដ្ឋានស្តាតចាស់នារសៀលម៉ោង ៣:៣០ ហើយក្រុមគិរីវង់ ត្រូវស្វាគមន៍ក្រុមនគរបាលជាតិនៅកីឡដ្ឋានគិរីវង់សុខសែនជ័យ នារសៀលម៉ោង ៣:៣០ ថ្ងៃពុធនេះដូចគ្នា៕