ភ្នំពេញៈ ក្រុមជម្រើសជាតិកម្ពុជាអាយុក្រោម ២២ ឆ្នាំមិនអាចប្រើបទពិសោធបែបក្មេងខ្ចីរបស់ខ្លួនដើម្បីយកឈ្នះក្រុមជម្រើសជាតិបង់ក្លាដែសបាននោះទេ សម្រាប់ការប្រកួតមិត្តភាពក្រៅផ្លូវការនៅពហុកីឡដ្ឋានជាតិកាលពីយប់ថ្ងៃសៅរ៍ ប៉ុន្តែគ្រូបង្វឹកជនជាតិអាហ្សង់ទីនលោក Felix Dalmas មានការពេញចិត្តទៅលើការខិតខំប្រឹងប្រែងរបស់ក្រុមទាំងមូល និងទម្រង់លេងបែបការពាររបស់ក្រុមកម្ពុជា។
លោក Felix Dalmas គ្រូបង្វឹកក្រុមជម្រើសជាតិកម្ពុជាបាននិយាយក្រោយការប្រកួតថា៖ «ខ្ញុំសូមអរគុណដល់អ្នកគាំទ្រដែលបានចូលរួមលើកទឹកចិត្តពួកយើងផ្ទាល់ ទោះបីជាយើងមិនទទួលបានលទ្ធផលល្អនៅថ្ងៃនេះមែន ប៉ុន្តែខ្ញុំពិតជាពេញចិត្តនឹងការខិតខំប្រឹងប្រែងរបស់កីឡាករទាំងអស់គ្នា»។
សម្រាប់ការប្រកួតកាលពីយប់ថ្ងៃសៅរ៍នោះក្រុមជម្រើសជាតិកម្ពុជាបានផ្តោតខ្លាំងទៅលើការលេងបែបការពារ ខណៈក្រុមជម្រើសជាតិបង់ក្លាដែសបានធ្វើការដាក់សម្ពាធតាមរយៈការវាយលុកមកលើពួកគេជាបន្តបន្ទាប់នោះ។ យ៉ាងណាក៏ដោយនៅតង់ទី ១ បង់ក្លាដែសមិនអាចបំបែកក្បួនការពារយ៉ាងមមាញឹករបស់កម្ពុជានោះទេ ហើយការលើកបាល់រំលងខ្សែការពារយ៉ាងល្អរបស់ ប្រាក់ ធីវ៉ា ទៅលើ សេត រ៉ូស៊ីបនៅនាទីទី ៣ ត្រូវបានអ្នកចាំទីក្រុមបង់ក្លាដែសចេញមកសង្គ្រោះទាន់ពេលដូចគ្នា។
នៅក្នុងតង់ទី ២ ក្រុមកម្ពុជានៅតែរក្សាលេងបែបការពារភាគច្រើនដើម្បីរក្សាស្ថានភាពការប្រកួតពីការបន្តដាក់សម្ពាធរបស់ក្រុមបង់ក្លាដែស ប៉ុន្តែការអូសបាល់យ៉ាងលឿនរបស់ខ្សែប្រយុទ្ធទើបដាក់ឲ្យចូលលេង Mahbubur Rahman Sufil និងការបញ្ជូនបាល់យ៉ាងស្អាតរបស់គេបានផ្តល់ឱកាសឲ្យខ្សែបម្រើ Robiul Hasan អាចស៊ុតបាល់នោះបញ្ចូលទីយ៉ាងល្អនៅនាទីទី ៨៣។
ជាមួយគ្រាប់បាល់ដែលកើតមានឡើងនៅចុងម៉ោងនេះបានជួយឲ្យក្រុមជម្រើសជាតិបង់ក្លាដែសបន្តយកឈ្នះក្រុមកម្ពុជា ១-០ បន្ថែមទៅលើការការឈ្នះ ២-១ នាជំនួបក្នុងពាន AFC Challeng Cup 2006 ព្រមទាំងស្មើគ្នា ១-១ ក្នុងការប្រកួតពាន Nehru Cup 2007 និងការឈ្នះក្រុមកម្ពុជា ១-០ នាជំនួបចុងក្រោយក្នុងការប្រកួតមិត្តភាពកាលពីថ្ងៃទី ២៦ ខែមេសា ឆ្នាំ ២០០៩។
យ៉ាងណាក៏ដោយការប្រើប្រាស់ក្រុម U22 កម្ពុជាដើម្បីប្រកួតជាមួយក្រុមជម្រើសជាតិបង់ក្លាដែសលើកនេះទទួលបានការគាំទ្រច្រើនពីអ្នកគាំទ្រ ព្រោះលោក Felix Dalmas មានបំណងប្រើការប្រកួតនេះ ដើម្បីបន្ថែមនៅលើបទពិសោធថ្មីៗបន្ថែមទៀតទៅដល់ក្រុមយុវជនរបស់កម្ពុជាទាំងនេះ ដើម្បីត្រៀមធ្វើជាម្ចាស់ផ្ទះការប្រកួតប្រចាំពូល H នៃពាន AFC U23 Championship ដែលនឹងចាប់ផ្តើមនៅថ្ងៃទី ២២ ខែមីនាខាងមុខនេះ ខណៈពូលនេះមានក្រុមកូរ៉េខាងត្បូង អូស្ត្រាលី និងក្រុម Chinese Taipei។
លោក Felix Dalmas បានប្រាប់បន្ថែមថា៖ «សម្រាប់ការប្រកួតជាមួយក្រុមបង់ក្លាដែសលើកនេះ យើងការពារបានល្អសម្រាប់រយៈពេល ៨៥ នាទី ប៉ុន្តែយើងនៅមានរឿងជាច្រើនទៀតដែលត្រូវកែតម្រូវបន្ថែម ដើម្បីធ្វើឲ្យក្រុមកម្ពុជាមានសមត្ថភាពគ្រប់គ្រាន់ក្នុងការរកបានគ្រាប់បាល់ និងរកបានលទ្ធផលល្អសម្រាប់ការប្រកួតក្រោយៗទៀតគឺយើងនឹងខិតខំបន្ថែមទៀត សម្រាប់ការប្រកួតបាន AFC U23 Chapionship ដែលកាន់តែខិតជិតមកដល់ហើយ»៕