.jpg)
លោក Frank Zgoznik (មុខ) ពេលចូលរួមការប្រណាំងកង់ភ្នំពេញ ជុំទី ៥ ផ្តាច់ព្រ័ត្រនៅគិរីរម្យចុងឆ្នាំ ២០១៨។ រូបថត ឈន ណន
ភ្នំពេញៈ អតីតកីឡាករប្រណាំងកង់អាជីពរបស់អូស្ត្រាលីលោក Frank Zgoznik បានចាត់ការប្រណាំងកង់ដូចគ្នាទៅនឹងការលេងបាល់ទាត់ជាក្រុមអ៊ីចឹងដែរ គឺក្រុមថ្នាលជម្រើសជាតិប្រណាំងកង់ទាំងអស់ត្រូវតែមានការសហការគ្នា ពិសេសចេះសាមគ្គីជាក្រុមឲ្យបានល្អ ទើបអាចឈានដល់ការឈ្នះបានមេដាយនៅពេលកម្ពុជាធ្វើជាម្ចាស់ផ្ទះស៊ីហ្គេម ឆ្នាំ ២០២៣។
លោក Frank Zgoznik ដែលបានមកធ្វើជាគ្រូបង្វឹកស្ម័គ្រចិត្តរបស់ក្រុមថ្នាលជម្រើសជាតិប្រណាំងកង់កម្ពុជាជិត ២ ឆ្នាំមកហើយនោះមានការពេញចិត្តកាន់តែខ្លាំងទៅលើការខិតខំប្រឹងប្រែងរបស់ក្រុមថ្នាលជម្រើសជាតិប្រណាំងកង់កម្ពុជា។ «ខ្ញុំសប្បាយរីករាយនៅពេលឃើញការវិវឌ្ឍរបស់ក្រុមថ្នាលដែលខ្ញុំបានបង្ហាត់កន្លងមកនេះហើយអ្វីដែលគួរឲ្យចាប់អារម្មណ៍នោះគឺពួកក្រុមថ្នាលមានភាពស្វះស្វែងចង់ចេះ ចង់ដឹង និងខំប្រឹងហ្វឹកហាត់អស់ពីសមត្ថភាព»។
លោកបានបន្តថា៖ «ក្រុមថ្នាលត្រូវតែបន្តអនុវត្តនូវមេរៀនក៏ដូចជាទិចនិក ដែលខ្ញុំបានប្រាប់ពួកគេជាប្រចាំ និងរៀងរាល់ឆ្នាំគឺរហូតដល់ការប្រកួតស៊ីហ្គេមឆ្នាំ ២០២៣ ហើយខ្ញុំគិតថាឲ្យតែពួកគេខំហ្វឹកហាត់ទៅតាមផែនការច្បាស់លាស់ និងមានទំនុកចិត្តប្រកបដោយអត្តចរិតថ្លៃថ្នូរគឺនៅក្នុងចំណោមក្រុមថ្នាលរបស់យើងនឹងមានអ្នកអាចឈានទៅឈ្នះបានមេដាយនៅស៊ីហ្គេម ឆ្នាំ ២០២៣ ជាមិនខាន»។
យ៉ាងណាក៏ដោយលោក Frank Zgoznik ដែលធ្លាប់ជាកីឡាករអាជីពរបស់ប្រទេសអូស្ត្រាលី ១ រូបនោះបានលើកទឹកចិត្តឲ្យក្រុមកង់ត្រូវជិះឲ្យបានឆ្ងាយក្នុង ១ ថ្ងៃៗដោយ ១ សប្តាហ៍ធ្វើឲ្យបាន ៦ ថ្ងៃហើយក្នុងនោះលោកបានបញ្ជាក់ថាសម្រាប់ក្រុមជម្រើសជាតិត្រូវដាក់គោលដៅជិះឲ្យបាន ២ ទៅ ៣ ម៉ឺនគីឡូម៉ែត្រក្នុង ១ ឆ្នាំហើយក្រុមថ្នាលត្រូវជិះឲ្យបាន ១ ទៅ ១,៥ ម៉ឺនគីឡូម៉ែត្រក្នុង ១ ឆ្នាំ។
បន្ថែមលើនេះលោក Frank បានជំរុញឲ្យក្រុមថ្នាលជម្រើសជាតិប្រណាំងកង់ ទៅចូលរួមលេងកីឡាករផ្សេងៗទៀតដូចជាការរត់ប្រណាំង លេងបាល់ទះ បាល់ទាត់ ជាដើម ពិសេសចូលហ្វឹកហាត់នៅគ្រឹះស្ថានហាត់ប្រាណឲ្យបានញឹកញាប់ ដើម្បីធ្វើឲ្យកាយសម្បទាមានភាពរឹងមាំគឺមិនអាចហ្វឹកហាត់ តែលើការជិះកង់មួយមុខនោះទេ។
លោកបាននិយាយថា៖ «យើងមិនអាចហាត់តែការជិះកង់មួយមុខនោះទេ គឺយើងត្រូវហាត់កីឡាមួយចំនួនទៀត ដើម្បីឲ្យកាយសម្បទារបស់យើងកាន់តែមានភាពរឹងមាំ។ អ្នកជិះកង់ត្រូវហាត់ឲ្យបានខ្លាំង ប៉ុន្តែក្រោយពេលហាត់ ត្រូវមានរបបអាហារហូបចុកឲ្យបានត្រឹមត្រូវ និងសម្រាកឲ្យបានគ្រប់គ្រាន់ ដើម្បីឲ្យរាងកាយរបស់យើងមានថាមពលគ្រប់គ្រាន់ឡើងវិញ គឺយើងមិនអាចខំតែហាត់ហើយ ហាត់ទៀតដោយគ្មានការហូបចុក និងសម្រាកគ្រប់គ្រាន់នោះទេ ព្រោះវាធ្វើឲ្យការវិវឌ្ឍរបស់យើងមិនបានឡើងដល់កម្រិតកំពូល»។
បន្ថែមទៅលើការអនុវត្តនៃមូលដ្ឋានហ្វឹកហាត់ ដើម្បីវិវឌ្ឍខ្លួនឲ្យក្លាយជាកីឡាករអាជីពមានសក្តានុពលនេះលោក Frank Zgoznik សុំឲ្យក្រុមធំ និងក្រុមថ្នាលជម្រើសជាតិប្រណាំងកង់កម្ពុជាត្រូវចេះសហការគ្នាជាក្រុមឲ្យបានល្អគឺដូចគ្នាទៅនឹងការលេងបាល់ទាត់ដែលមានគ្នា ១១ នាក់នៅលើទីលានអ៊ីចឹងដែរទើបអាចឈានទៅរកការឈ្នះបានមេដាយនៅពេលប្រកួត។
លោកបញ្ជាក់ថា៖ «នៅក្នុងការលេងបាល់ទាត់គេមើលឃើញតែកីឡាករស៊ុតបាល់បញ្ជូលទីតែយើងត្រូវដឹងថាសមាជិកក្នុងក្រុម ១០ នាក់ផ្សេងទៀត បានរួមចំណែកយ៉ាងសំខាន់ក្នុងការជួយរកបានគ្រាប់បាល់នោះ ចំណែកប្រណាំងកង់ដូចគ្នាគឺអត្តពលិកម្នាក់អាចឈ្នះក្នុងការប្រកួតតែកុំភ្លេចថាសមាជិកក្នុងក្រុមផ្សេងទៀត ជាអ្នកជួយឲ្យម្នាក់នោះឲ្យឈ្នះក្នុងការប្រកួតផងដែរ ហេតុនេះក្រុមកង់របស់យើងត្រូវចេះសហការគ្នាជាក្រុម ដើម្បីអាចឈ្នះបានមេដាយនៅស៊ីហ្គេមឆ្នាំ ២០២៣»។
ជាមួយគ្នានេះលោក Frank ក៏គ្រោងនឹងបន្តជួយក្រុមជម្រើសជាតិថ្នាលប្រណាំងកង់កម្ពុជារហូតដល់ការប្រកួតស៊ីហ្គេមឆ្នាំ ២០២៣ ផងដែរ ប៉ុន្តែលោកក៏សុំឲ្យក្រសួងអប់រំ យុវជន និងកីឡាមានការផ្តល់ជាកញ្ចប់ថវិកា សម្រាប់ដោះស្រាយការរស់នៅប្រចាំថ្ងៃរបស់គាត់នៅកម្ពុជាផងដែរ គឺគាត់មិនអាចធ្វើជាគ្រូបង្វឹកស្ម័គ្រចិត្តរហូតបែបនេះបានទេ។
ចំណែកលោក ឧកញ៉ា វង្ស ខាន់ពៅ អគ្គលេខាធិការសហព័ន្ធខ្មែរកីឡាទោចក្រយានបានសរសើរទៅលើសមត្ថភាពបង្ហាត់បង្ហាញរបស់លោក Frank Zgoznik។ លោកថ្លែងថា៖ «កីឡាករអាជីពកម្រិតខ្ពស់ដូចគ្នាមិនប្រាកដថា អាចក្លាយជាគ្រូល្អទាំងអស់នោះទេ ប៉ុន្តែចំពោះលោក Frank Zgoznik គឺគាត់មានទាំងបទពិសោធខ្ពស់ និងរបៀបរបបនៃការបង្ហាត់សិស្ស ហើយខ្ញុំសង្ឃឹមថាក្រោមការបង្ហាត់បង្ហាញរបស់គាត់នឹងជួយឲ្យក្រុមថ្នាលរបស់យើងអាចដណ្តើមបានមេដាយនៅស៊ីហ្គេម ឆ្នាំ ២០២៣»៕
