.jpg)
លោក ភា សុភ័ក្ត្រា បង្ហាញពានសម្តេច ហ៊ុន សែន ដែលលោកបានដឹកនាំក្រុមទ័ពឲ្យឈ្នះឆ្នាំ ២០១៨។ រូប FFC
ភ្នំពេញ: គ្រូបង្វឹកវ័យក្មេងកំពុងដឹកនាំក្រុម Cambodia All Stars លោក ភា សុភ័ក្ត្រា បានឈានដល់ការចែកផ្លូវជាមួយក្លិបក្រសួងការពារជាតិ (ទ័ព) ខណៈក្លិបនៅលីកកំពូលកម្ពុជាមួយនេះបាននិងកំពុងជួបវិបត្តិហរិញ្ញវត្ថុ ក្រោយពេលលោក ខូវ ឆាយ ជាអគ្គលេខាធិការ និងជាអ្នកទ្រទ្រង់ដ៏សំខាន់របស់ក្លិបបានសម្រេចចិត្តដកខ្លួនចេញ ព្រោះមិនអាចទប់ទល់ទៅលើការចំណាយមិនចេះរីងស្ងូតលើក្រុមទ័ពទាំងមូលបាននោះ។
លោក ភា សុភ័ក្ត្រា បានប្រាប់ភ្នំពេញប៉ុស្តិ៍កាលពីថ្ងៃពុធថា៖ «មេ ឆាយ ជាអ្នកនាំខ្ញុំឲ្យចូលមកក្នុងលីកកំពូលកម្ពុជាជាថ្មីនៅក្នុងក្រុមក្រសួងការពារជាតិនេះ ហើយខ្ញុំទទួលបានប្រាក់ខែពីគាត់ផ្ទាល់ ប៉ុន្តែពេលនេះគាត់បានឈប់ហើយ អ៊ីចឹងខ្ញុំក៏មិនអាចបន្តនៅដែរ»។
គ្រូបង្វឹករូបនេះបន្ថែមថា៖ «ការដកខ្លួនរបស់មេ ឆាយ ធ្វើឲ្យក្លិបបានជួបនឹងវិបត្តិហរិញ្ញវត្ថុ ព្រោះគាត់ជាមនុស្សយ៉ាងសំខាន់ក្នុងការគ្រប់គ្រង់លើបញ្ហារកចំណូល និងចំណាយរបស់ក្លិប ហើយកន្លងមកគាត់បានចំណាយច្រើនណាស់ អ៊ីចឹងវិបត្តិហរិញ្ញវត្ថុនេះ បើយើងចង់ស្នើ ឬធ្វើអ្វី វាមិនអាចបំពេញតាមតម្រូវការយើងចង់បានទេ គឺវាមិនដូចពេលគាត់នៅដឹកនាំដែលយើងមានភាពកក់ក្តៅ ហើយការស្នើអីចេះតែបានក្នុងការជំរុញក្រុម និងអភិវឌ្ឍក្រុមឲ្យមានការរីកចម្រើន ហេតុនេះខ្ញុំមានតែសម្រេចចិត្តចាកចេញដែរ»។
យ៉ាងណាក៏ដោយ ភា សុភ័ក្ត្រា ហាក់មានការស្តាយស្រណោះចំពោះការបញ្ហាដែលកំពុងតែកើតមានឡើងចំពោះក្រុមទ័ពដែលបង្ខំឲ្យលោកត្រូវឈប់ និងបានឃ្លាតឆ្ងាយពីលីកកំពូល ខណៈលោកទើបតែបានចូលប្រឡូកជាថ្មីនឹងបានធ្វើជាគ្រូបង្គោលនៅក្លិបក្រសួងការពារជាតិតាមក្តីស្រមៃរបស់ខ្លួនកាលពីឆ្នាំ ២០១៨ ព្រោះកន្លងមកលោក សុភ័ក្ត្រា ធ្លាប់បានធ្វើត្រឹមគ្រូជំនួយ។
លោក ភា សុភ័ក្ត្រា បញ្ជាក់ថា៖ «វាជារឿងដ៏គួរឲ្យសោកស្តាយមួយដែលយើងកំពុងតែហ្វឹកហាត់ត្រៀមខ្លួនការប្រកួតរដូវកាលថ្មីស្រាប់តែវិបត្តិហរិញ្ញវត្ថុ បានកើតឡើង គឺវាមិនមែនជាការចាកចេញដោយទាក់ទងទៅនឹងលទ្ធផលប្រកួត ហើយខ្ញុំក៏ពិបាកក្នុងការទទួលយកផងដែរ ចំពោះហេតុការណ៍ដែលបានកើតឡើងភ្លាមៗបែបនេះ ព្រោះយើងមានការយល់ចិត្តគ្នាជាមួយកីឡាករ និងក្រុមការងារនៅក្នុងក្លិប អ៊ីចឹងការចាកចេញរបស់ខ្ញុំក៏ធ្វើឲ្យពួកគេមានការសោកស្តាយផងដែរ»។
ជាមួយនឹងការចាកចេញនេះលោក ភា សុភ័ក្ត្រា បានបដិសេធថា មិនមែនលោកចាកចេញពីក្រុមទ័ព ហើយទៅដឹកនាំក្លិបណាផ្សេងនោះទេ គឺពេលនេះលោកគ្មានការទាក់ទងនឹងក្លិបណាមួយទេ ប៉ុន្តែលោកស្វាគមន៍ចំពោះក្លិប ដែលចង់ទាក់ទងលោកទៅដឹកនាំ។
គ្រូបង្វឹករូបនេះបានបញ្ជាក់ថា៖ «ចំពោះក្លិបដែលចង់បានខ្ញុំ គឺវាអាស្រ័យទៅលើការចរចាគ្នា។ បើការចរចាគ្នាត្រូវ ខ្ញុំនឹងទៅដឹកនាំ ព្រោះយើងជាគ្រូស្រាប់ទៅហើយ រឿងអីធ្វើមិនបាន ប៉ុន្តែនៅក្នុងដំណាក់កាលនេះ ខ្ញុំនឹងឆ្លៀតពេល ៣ ថ្ងៃក្នុង ១ សប្តាហ៍ក្នុងការស្វែងរកការបង្ហាត់ដល់យុវជននៅខេត្តកណ្តាល ដើម្បីរក្សាកម្រិតសមត្ថភាពជាគ្រូបង្វឹកតាមរយៈការបង្ហាត់ក្មេងក៏ដូចជាជំរុញសកម្មភាពយុវជនតាមរយៈការលេងបាល់ទាត់នេះ»។
គួររំឭកថាក្នុងនាមជាគ្រូបង្វឹកបាល់ទាត់ម្នាក់លោក ភា សុភ័ក្ត្រា ធ្លាប់ធ្វើជាគ្រូជំនួយនៅក្លិបស្វាយរៀងបាន ១ ឆ្នាំកន្លះ និងធ្លាប់ជួយដឹកនាំក្រុមត្រាយអាស៊ី (អង្គរថាយហ្គឺរ) ពីការប្រកួតក្របខ័ណ្ឌក ១ ឲ្យឡើងមកលេងនៅលីកកំពូល។ ក្រោយមកលោកបានធ្វើជាគ្រូបង្គោលបណ្តោះអាសន្ននៅក្រុមវេស្ទើនបាន ៣ ប្រកួតមុននឹងមកធ្វើជាគ្រូជំនួយនៅក្រុមទ័ពនៅឆ្នាំ ២០១៧ ហើយនៅឆ្នាំ ២០១៨ លោកបានក្លាយជាគ្រូបង្គោលនឹងបានដឹកនាំក្រុមទ័ពឲ្យឈ្នះពានរង្វាន់សម្តេច ហ៊ុន សែន និងទទួលបានលេខ ៤ ក្នុងការប្រកួតលីកកំពូលកម្ពុជា៕
