ក្រុងឡុងដ៍: លោក Maurizio Sarri គូបង្វឹកក្រុម Chelsea បានទទួលស្គាល់ថា លោកមានការព្រួយបារម្ភទៅលើទម្រង់លេងរបស់ក្រុមតោខៀវមួយនេះ បន្ទាប់ពីពួកគេបានចាញ់ ២-០ ក្នុងទឹកដីក្រុម Everton ហើយលទ្ធផលនេះ បានបំផ្លាញក្ដីសង្ឃឹមរបស់ Chelsea ក្នុងការប្រជែងយកតំបន់ ៤ ក្រុមចុងក្រោយ (Top4) ក្នុងក្របខ័ណ្ឌ Premier League។
កីឡាករ Richarlison និងកីឡាករ Gylfi Sigurdsson បានស៊ុតបាល់បញ្ចូលទីក្នុងតង់ទី ២ ដូចគ្នានៅពហុកីឡដ្ឋាន Goodison Park កាលពីថ្ងៃអាទិត្យ ដើម្បីយកឈ្នះក្រុម Chelsea បរាជ័យដ៏មិនគួរឲ្យចង់ជឿ ហើយនេះជាជ័យជម្នះជាលើកដំបូងរបស់ Everton លើគូប្រជែងខ្លាំងទាំង ៦ ក្នុងការប្រកួតចំនួន ២៦ លើកចាប់ពីខែមករាកាលឆ្នាំ ២០១៧។
តាមពិតទៅនៅតង់ទី ១ ក្រុម Chelsea មានឱកាសស៊ុតបញ្ចូលទីច្រើនជាងក្រុម Everton ប៉ុន្តែមិនអាចគេចផុតពីការសង្គ្រោះរបស់អ្នកចាំទី Jordan Pickford ហើយការដួលជាបន្តបន្ទាប់របស់ក្រុម Chelsea បានធ្វើឲ្យមានការព្រួយបារម្ភយ៉ាងខ្លាំងចំពោះលោក Maurizio Sarri។
លោក Sarri បាននិយាយថា៖ «ខ្ញុំមានការព្រួយបារម្ភចំពោះទម្រង់លេងរបស់យើង នៅពេលខ្ញុំឃើញការប្រកួតបែបនេះ។ យើងប្រហែលជាលេងបានល្អបំផុតត្រឹមរយៈពេល ៤៥ នាទីនៅក្នុងតង់ទី ១ ប៉ុន្តែយើងមិនបានលេងល្អបែបនេះនៅដើមតង់ទី ២ ទេ ហើយខ្ញុំក៏មិនដឹងថាមកពីមូលហេតុអ្វីដែរ»។
គ្រូបង្វឹកជនជាតិអ៊ីតាលីរូបនេះបានបន្ថែមថា៖ «យើងពិតជាលេងបានល្អណាស់រហូតដល់នាទីចុងក្រោយនៃតង់ទី ១ ប៉ុន្តែយើងលេងមិនបានល្អទេ នៅនាទីដំបូងសម្រាប់តង់ទី ២។ វាពិបាកខ្លាំងណាស់សម្រាប់កីឡាករក្នុងការពន្យល់ប្រាប់ខ្ញុំពីការផ្លាស់ប្ដូរបែបនេះ ហើយខ្ញុំក៏ពិបាកនឹងពន្យល់ប្រាប់អ្នកពីការផ្លាស់ប្ដូរនេះផងដេរ តែខ្ញុំគិតថាវាប្រហែលជាមកពីផ្នត់គំនិតរបស់ពួកគេ»។
លោក Sarri បានបន្ថែមថា៖ «នៅពេលនេះវាជាកំហុសរបស់យើង ហើយខ្ញុំគិតថា ប្រសិនបើយើងអាចលេងល្អដូចនៅក្នុងតង់ទី ១ បន្តជាប់រហូត ខ្ញុំគិតថា យើងនឹងបានឡើងទៅកាន់ Top4 ប៉ុន្តែយើងមានបញ្ហានៅត្រង់នេះឯង ហេតុនេះយើងត្រូវខិតខំការពារឱកាសទាំងនោះ»។
ចំណែកអ្នកចាត់ការក្រុម Everton លោក Marco Silva ដែលមិនធ្លាប់នាំដឹកនាំក្រុមឲ្យទទួលជ័យជម្នះលើក្រុមខ្លាំងក្នុងក្របខណ្ឌ Premier League ជាយូរមកហើយនោះបាននិយាយថា៖ «និយាយឲ្យត្រង់ទៅនៅមុនពេលប្រកួត ខ្ញុំមិនរំពឹងថាបានលទ្ធផលល្អបែបនេះទេ។ សម្រាប់ក្រុមដូចពួកយើងនេះ វាមិនមែនជារឿងធម្មតានោះទេ ព្រោះជោគជ័យទៅលើក្រុមខ្លាំងៗមិនមែនមានច្រើននោះឡើយ»។
លោកបានបន្ថែមថា៖ «ប៉ុន្តែបើនិយាយពីគុណភាពរបស់យើងក្នុងនាមជាក្លិបមួយ តើយើងជាក្លិបធំប៉ុនណា? ជ័យជម្នះបែបនេះមិនមែនចេះតែកើតឡើងនោះទេ គឺវាអាស្រ័យលើយើងធ្វើការរួមគ្នា ដើម្បីឲ្យកាន់តែមានលក្ខណៈសាមញ្ញសម្រាប់យើងក្នុងការយកឈ្នះលើក្រុមខ្លាំងៗបែបនេះ»៕ SN