ភ្នំពេញ៖ ប្រភេទកីឡាប្រយុទ្ធ Kick Boxing (ឃិកបុកស៊ិង) ដែលធ្លាប់ជ្រកនៅក្រោមសហព័ន្ធកីឡាប្រដាល់គុនខ្មែរ និងធ្លាប់ឈ្នះមេដាយស៊ីហ្គេម ឆ្នាំ ២០១៩ នៅហ្វីលីពីននោះ គឺបច្ចុប្បន្នបានផ្តាច់ខ្លួន និងបានបង្កើតជាសហព័ន្ធកីឡាប្រដាល់ឃិកបុកស៊ិងកម្ពុជា ដោយមានរចនាសម្ព័ន្ធថ្មី ប៉ុន្តែទាំងថ្នាក់ដឹកនាំ គ្រូបង្វឹក និងក្រុមអត្តពលិក នៅតែខ្ចីពីប្រដាល់គុនខ្មែរទាំងស្រុង។
ក្នុងកិច្ចសម្ភាសន៍តាមទូរស័ព្ទជាមួយ ភ្នំពេញ ប៉ុស្តិ៍ លោក ហេង សុឃន ដែលបច្ចុប្បន្នជាប្រធានសហព័ន្ធកីឡាប្រដាល់ឃិកបុកស៊ិងកម្ពុជា បានប្រាប់ថា សហព័ន្ធបានបង្កើតឡើង ដោយមានការទទួលស្គាល់ពីក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា ចំណែករចនាសម្ព័ន្ធនៃការដឹកនាំ សុទ្ធតែអ្នកមានជំនាញកីឡា ហើយយើងបានជ្រើសរើសគ្រូបង្វឹកវ័យក្មេងមានបទពិសោធល្អ និងអត្តពលិកមានសមត្ថភាព ដើម្បីត្រៀមទៅចូលរួមការប្រកួតស៊ីហ្គេមលើកទី៣១ នៅប្រទេសវៀតណាម ចុងឆ្នាំ ២០២១ នេះ។
លោក ហេង សុឃន បានបន្តថា៖ «សមាសភាពថ្នាក់ដឹកនាំរបស់សហព័ន្ធនេះ មានខ្ញុំជាប្រធានឯកឧត្តម តែម ម៉ឺន ជាប្រធានកិត្តិយស លោក ម៉ិល កាដូ និង លោក ប៉ែន កាក់ ជាអនុប្រធាន លោកស្រី កែវ ច័ន្ទមុន្នី ជាអគ្គលេខាធិការ លោកមេធាវី ផែង វណ្ណៈ ជាអគ្គលេខាធិការរង និងមានសមាជិកចំនួន ៥ នាក់ទៀត។ ចំណែកគ្រូបង្វឹក គឺគណៈកម្មការបានសម្រិតសម្រាំងយកចំនួន ៤ នាក់ មានលោក ជា រិទ្ធ អតីតគ្រូជម្រើសជាតិគុនខ្មែរ ឆ្នាំ ២០២០ ជាគ្រូធំ រួមទាំងមានអតីតកីឡាករ បឺត ខាំ, សៅ ប៊ុននឿន និងលោកគ្រូ សាន់ សៅយ៉ាន់ ជាគ្រូជំនួយ»។
ទាក់ទងទៅនឹងសមាសភាពក្រុមអត្តពលិកត្រៀមហ្វឹកហាត់ក្នុងក្រុមជម្រើសជាតិ លោក ហេង សុឃន បានប្រាប់ថា គណៈកម្មការបានសម្រេចជ្រើសរើសយ៉ាងត្រឹមត្រូវមានចំនួន ១២ នាក់ ក្នុងនោះមានកីឡាការិនីចំនួន ៤ នាក់ និងបម្រុង ២ នាក់ និងកីឡាករចំនួន ៦ នាក់ ប៉ុន្តែលោកបានបដិសេធមិនបង្ហាញឈ្មោះអ្នកទាំងនោះ ដោយហេតុនេះ សហព័ន្ធកំពុងរង់ចាំការទទួលស្គាល់ជាផ្លូវការពីក្រសួងអប់រំ យុវជន និងកីឡា សិន។ លោកបន្ថែមថា៖ «យើងមានទីតាំង និងសម្ភារហ្វឹកហាត់ល្អ គឺនៅក្នុងស្តាតចាស់តែម្តង ប៉ុន្តែដោយបញ្ហាកូវីដ ១៩ ផ្ទុះជាថ្មី យើងផ្អាកសិន»។
យ៉ាងណាក៏ដោយ កីឡាការិនីឆ្នើមជម្រើសជាតិប្រដាល់សកល នៅ ស្រីពៅ បានសម្រេចចិត្តឈប់ពីប្រដាល់សកលទៅហាត់ឃិកបុកស៊ិងវិញហើយ ដោយសង្ឃឹមថា អាចទទួលបានជ័យជម្នះនៅលើឆាកអន្តរជាតិ។ កីឡាការិនីធ្លាប់វាយដាក់ទ្រុង នៅ ស្រីពៅ បានប្រាប់ថា៖ «ខ្ញុំបានជាប់ជាជម្រើសជាតិប្រដាល់សកលចំនួន ៣ ឆ្នាំ ប៉ុន្តែពេលនេះ ខ្ញុំសម្រេចចិត្តចូលហាត់កីឡាឃិកបុកស៊ិងវិញ ដោយមើលឃើញថា មានលទ្ធភាពប្រកួតប្រជែងលើឆាកអន្តរជាតិបាន។ ខ្ញុំធ្លាប់វ៉ៃក្នុងកីឡាប្រយុទ្ធមានចេញដៃ ចេញជើង អ៊ីចឹងសង្ឃឹមថា ល្អជាងប្រដាល់សកល ហើយខ្ញុំបានសុំទៅមេ គឺគាត់បានអនុញ្ញាតរួចហើយ»។
ចំណែកលោក តែម ម៉ឺន ជាប្រធានសហព័ន្ធកីឡាប្រដាល់គុនខ្មែរ និងជាប្រធានកិត្តិយសសហព័ន្ធកីឡាប្រដាល់ឃិកបុកស៊ិងកម្ពុជាបានប្រាប់ថា៖ «កន្លងមកកីឡា Kick Boxing ត្រូវបានក្រសួងអប់រំ ដាក់ឱ្យនៅក្នុងប្រដាល់គុនខ្មែរ ដោយមានខ្ញុំជាអ្នកគ្រប់គ្រង ហើយពេលចេញទៅស៊ីហ្គេម កាលពីឆ្នាំ ២០១៩ នៅប្រទេសហ្វីលីពីន យើងដណ្តើមបានមេដាយសំរឹទ្ធច្រើន ហើយពេលនេះ ទោះមានសហព័ន្ធផ្សេងគ្នា ប៉ុន្តែយើងនៅតែសហការគ្នា ព្រោះរបៀបប្រកួតក្តី ធនធានកីឡាករក្តី គ្រូបង្វឹកក្តី មានប្រភពចេញពីប្រដាល់គុនខ្មែរ គ្រាន់តែក្បាច់ប្រកួតខុសគ្នាបន្តិចបន្តួចប៉ុណ្ណោះ»៕