.jpg)
ឃីម បូរ៉ា និង ម៉ឺន មេឃា ពេលឡើងទទួលខ្សែក្រវាត់ និងពាន។ CNC
ភ្នំពេញ៖ អ្នកប្រដាល់មកពីជាយដែនខេត្តបន្ទាយមានជ័យ ឃីម បូរ៉ា បានរកឃើញនូវជ័យជម្នះយ៉ាងសំខាន់មួយទៀត គឺការដណ្តើមបានខ្សែក្រវាត់គោជល់ទម្ងន់ ៦០ គីឡូក្រាម អមជាមួយប្រាក់រង្វាន់ចំនួន ៥ ០០០ ដុល្លារ បន្ទាប់ពីរូបគេបានយកឈ្នះលើអ្នកប្រយុទ្ធ ម៉ឺន មេឃា ក្នុងការប្រកួតផ្តាច់ព្រ័ត្រនៅលើសង្វៀន CNC។
តាមរយៈការប្រកួតយ៉ាងស្វិតស្វាញចំនួន ៥ ទឹកពេញ កាលពីយប់ថ្ងៃសៅរ៍នោះ ឃីម បូរ៉ា ត្រូវបានចៅក្រមទាំង ៥ នាក់ ផ្តល់ពិន្ទុឱ្យឈ្នះ ម៉ឺន មេឃា ដោយពិន្ទុមិនឯកច្ឆន្ទ ៤-១ ហើយជ័យជម្នះនេះ វាជាពេលដែលរូបគេទទួលបានខ្សែក្រវាត់ដ៏ថ្មីសន្លាងមួយទៀត អមជាមួយប្រាក់រង្វាន់ ដើម្បីយកទៅផ្គត់ផ្គង់គ្រួសារ ដែល បូរ៉ា អះអាងថា មានភាពល្អប្រសើរ ដោយសារតែការឡើងប្រដាល់។
ឃីម បូរ៉ា បានប្រាប់ ភ្នំពេញ ប៉ុស្តិ៍ កាលពីថ្ងៃអាទិត្យថា៖ «គិតមកដល់ពេលនេះ ខ្ញុំទើបតែឈ្នះបានខ្សែក្រវាត់ចំនួន ២ ប៉ុណ្ណោះ គឺខ្សែក្រវាត់ស្រាបៀរកម្ពុជា និងខ្សែក្រវាត់គោលជល់នេះ ក្នុងទម្ងន់ ៦០ គ.ក្រដូចគ្នា តែនេះខ្ញុំនៅមិនទាន់គិតពីការឈ្នះពាន ឬប្រាក់រង្វាន់ផ្សេងៗនោះទេ»។
បូរ៉ា បន្ថែមថា៖ «ចំពោះប្រាក់រង្វាន់ ៥ ០០០ ដុល្លារ ដែលទទួលបានពេលនេះ ខ្ញុំនឹងយកមកដោះស្រាយជីវភាពក្នុងគ្រួសារខ្ញុំ ព្រោះខ្ញុំមានប្រពន្ធ និងកូនប្រុសអាយុ ៤ ឆ្នាំ ហើយពេលនេះ ប្រពន្ធខ្ញុំក៏កំពុងមានទម្ងន់ទៀត អ៊ីចឹងតាមរយមុខរបរប្រដាល់ ខ្ញុំកសាងបានគ្រួសារមួយ ដែលមានដី មានផ្ទះ មានម៉ូតូ និងរថយន្តប្រើប្រាស់ ព្រមទាំងមានជីវភាពល្អប្រសើរមិនជំពាក់គេនោះទេ។ ហេតុនេះសម្រាប់កម្មវិធីខាងមុខ ខ្ញុំនៅតែត្រៀមហ្វឹកហាត់ឱ្យល្អ ដើម្បីប្រកួតតាមកម្មវិធី ដែលលោកឪពុកខ្ញុំបានរៀបចំឱ្យ»។
នៅក្នុងត្រកូល «ឃីម» ដែលមានលោក ហេង ប៊ុនឃីម ជាឪពុក និងជាគ្រូបង្វឹកផ្ទាល់ ឃីម បូរ៉ា ជាកូនប្រុសទី២ នៅក្នុងចំណោមបងប្អូនប្រុស ២ នាក់ទៀត គឺប្រុសជាម្ចាស់មេដាយមាសស៊ីហ្គេម ឃីម ឌីម៉ា និងប្អូនប្រុស ឃីម ឌីម៉ៃ ដែលបានចាប់យកអាជីពប្រដាល់ និងបានក្លាយជាអ្នកប្រដាល់ជួរមុខមានទីផ្សារប្រកួតច្រើន ហើយអាចរកបានប្រាក់ចំណូលមកផ្គត់ផ្គង់ជីវភាពគ្រួសារបានសមរម្យ។
យ៉ាងណាក៏ដោយ បន្ទាប់ពីទទួលបានជោគជ័យ លើការឈ្នះបានខ្សែក្រវាត់ទី២ នេះ ឃីម បូរ៉ា បានប្រាប់រឿង ដែលខ្លួនគេមានការបារម្ភខ្លាំង នោះគឺការឡើងប្រកួតជាមួយជើងខ្លាំង អេលីត មកពីក្លិបនាយកដ្ឋានអង្គរក្សនៅសង្វៀនឯកភ្នំខេត្តបាត់ដំបងនាថ្ងៃទី ២៤ ខែ មករា ឆ្នាំ ២០២១ ខាងមុខនេះ។
សិស្សគណក្លិបរស្មីភូមិគាបខេត្តបន្ទាយមានជ័យ ឃីម បូរ៉ា បានបញ្ជាក់ថា៖ «ខ្ញុំបារម្ភខ្លាំងចំពោះកីឡាករ អេលីត ចំរើន ព្រោះគេខ្លាំង ហើយខ្ញុំក៏មិនធ្លាប់ជួបគ្នាកន្លងមកនោះដែរ។ បន្ថែមលើនេះ អេលីត ចំរើន ក៏ធ្លាប់គ្រប់គ្រងខ្សែក្រវាត់ចំនួន ៣ ផងដែរ តែទោះបីជាយ៉ាងណា ខ្ញុំត្រូវខំប្រឹងហ្វឹកហាត់ត្រៀមការប្រកួតនោះ និងត្រៀមប្រកួតក្នុងកម្មវិធីជាច្រើនទៀត ដែលខ្ញុំនៅមិនទាន់បានចុះកិច្ចសន្យា»៕
