.jpg)
អ្នកប្រដាល់ ឃីម បូរ៉ា (កណ្ដាល) កំពុងទទួលសែកតំណាងប្រាក់រង្វាន់ចំនួន ៣ ៤០០ ០០០រៀល។ សហការី
ភ្នំពេញ៖ ឆ្នាំ ២០២០ នេះ អាចនិយាយបានថា ជាឆ្នាំដ៏ជោគជ័យសម្រាប់អ្នកប្រដាល់ ឃីម បូរ៉ា ដែលផ្ញើវាសនាលើសង្វៀនប្រដាល់គុនខ្មែរ រយៈពេល ១៤ ឆ្នាំហើយនោះ បន្ទាប់ពីទទួលបានលទ្ធផលជាទីគាប់ចិត្តមួយបន្ថែមទៀត គឺឈ្នះជើងឯកប្រាក់លានក្នុងកម្មវិធី Mas Fight Cambodia នៅសង្វៀនថោន កាលពីល្ងាចថ្ងៃអាទិត្យ ដោយការផ្តួលកីឡាករជើងចាស់ សៀវ ង៉ុយ ឲ្យសន្លប់នៅទឹកទី ២ មុននឹងបន្តទៅផ្តួលកីឡាករ សោម វិឆ័យ ដោយប្រើក្បាច់កណ្តាប់ដៃបន្ថែមជាមួយនឹងក្បាច់ជង្គង់ចូលពោះសន្លប់ ដោយប្រើពេលមិនដល់ ៣ នាទីផង។
ជ័យជម្នះនេះត្រូវបានអ្នកតាមដានក្នុងពិភពប្រដាល់គុនខ្មែរភ្ញាក់ផ្អើល និងកោតសរសើរយ៉ាងខ្លាំង ខណៈដែលកាលពីថ្ងៃទី ១៣ ខែ មិថុនា ឆ្នាំ ២០២០ កន្លងមកថ្មីៗ បានយកឈ្នះខ្សែក្រវាត់ Cambodia នៅសង្វៀន CNC ម្តងរួចទៅហើយ ជាមួយនឹងប្រាក់រង្វាន់់ព្រមទាំងខ្សែក្រវាត់ក្នុងទម្ងន់ ៦០ គីឡូក្រាម។
តាមការផ្គូផ្គងពីដំបូង ឃីម បូរ៉ា ត្រូវប៉ះជាមួយ តាញ់ មករា ឯណោះទេ តែជិតដល់ថ្ងៃប្រកួត តាញ់ មករា ស្រាប់តែមានរបួសជើង ដូច្នេះត្រូវបានដាក់ជំនួសដោយកីឡាករ សៀវ ង៉ុយ មកពីសមាគមប្រដាល់កងយោធពលខេមរភូមិន្ទជំនួសវិញ។ ក្នុងការប្រកួតចំនួន ៣ ទឹកតាមក្បាច់គុនខ្មែរនោះ ជើងចាស់ សៀវ ង៉ុយ ស៊ូជាមួយឃីម បូរ៉ា បានតែ ២ ទឹក ក៏ដួលសន្លប់ក្រោយមិនអាចទ្រាំទ្រនឹងក្បាច់ជង្គង់របស់ បូរ៉ា បាន។ រីឯអ្នកប្រដាល់ សោម វិឆ័យ បានផ្តួលកីឡាករជើងចាស់ គង់ ហូវ ដែលមកពីខេត្តសៀមរាប ឲ្យសន្លប់ក្នុងទឹកទី ២ ដោយក្បាច់ជង្គង់ដូចគ្នា។
សម្រាប់ការប្រកួតផ្តាច់ព្រ័ត្ររបស់កម្មវិធី Mas Fight Cambodia ដែលមានតែ ១ ទឹកចំនួន ៩ នាទីនោះ ឃីម បូរ៉ា បានប្រើពេលមិនដល់ ៣ នាទីពេញផង ដោយការបញ្ជូនកណ្តាប់ដៃចូលពោះ ជាមួយនឹងការបន្ថែមជង្គង់ឆ្វេងភ្លាមៗធ្វើឲ្យ សោម វិឆ័យ សន្លប់ធំតែម្តង ដើម្បីឈ្នះនូវជើងឯកប្រាក់លានចំនួន ៣ លាន ៤ សែនរៀល ខណៈដែល សោម វិឆ័យ ដែលចាញ់ទទួលបាន ១ លាន ៨ សែនរៀល។
រំឭកពីប្រវត្តិប្រកួតរបស់ ឃីម បូរ៉ា មានបទពិសោធរយៈពេល ១៤ ឆ្នាំ ជាមួយអាជីពជាអ្នកប្រដាល់ បានដើរឡើងសង្វៀនគ្រប់ច្រកល្ហកមិនថា ជនបទ ក្រុងភ្នំពេញ និងស្រុកថៃ។ គេបានឈានដល់វគ្គផ្តាច់ព្រ័ត្រក្នុងព្រឹត្តិការណ៍ធំៗ ៨ លើក តែទើបឈ្នះវគ្គផ្តាច់ព្រ័ត្រនៅឆ្នាំ ២០២០ ចំនួន ២ លើកនេះប៉ុណ្ណោះ។
លោក ហេង ប៊ុនឃីម ដែលជាគ្រូបង្វឹក និងជាឪពុកបង្កើតបានមានប្រសាសន៍ថា៖ «ខ្ញុំ និងកូន ប្រឹងប្រែងជាមួយគ្នាយូរហើយ ប៉ុន្តែលទ្ធផលមិនទទួលបានដូចយើងគិតនោះឡើយ ដោយអាចនិយាយបានថា វានៅលើសំណាង ឬមិនទាន់ដល់ពេលវេលា ដែលយើងទទួលផល។ ដូចជាកូនច្បងរបស់ខ្ញុំ ឃុន ឌីម៉ា មុននឹងទទួលបានភាពល្បីល្បាញដល់ពេលនេះ គឺឆ្លងកាត់ការហ្វឹកហាត់លំបាកខ្លាំងណាស់។ យ៉ាងណា ខ្ញុំសូមអរគុណដល់សហព័ន្ធ អ្នករៀបចំកម្មវិធីប្រកួតដូចជា Mas Fight Cambodia នៅសង្វៀនថោននេះ អ្នកទស្សនាដែលនិយមចូលចិត្តបំផុត ហើយពិសេសការសម្រេចសេចក្តីពេលប្រកួត គឺមានយុត្តិធម៌ល្អណាស់»។
សម្រាប់លោក ជួប វុត្ថា ដែលជាផលិតករ និងពិធីករប្រចាំនៅសង្វៀន Mas Fight Cambodia វិញ និយាយថា៖ «យើងចាប់បើកការប្រកួតនេះ រយៈពេល ៣៣ សប្តាហ៍មកហើយ ដោយទទួលបានការគាំទ្រខ្លាំងណាស់ ពិសេសខាងស្ពនស័រមកពីស្រាបៀរកម្ពុជា និងផលិតផលមកពីជីបម៉ុងគ្រុប ដែលបានសហការយ៉ាងល្អ ទើបធ្វើឲ្យសកម្មភាពប្រកួតកាន់តែមានភាពទាក់ទាញបែបនេះ»៕
