The Phnom Penh Post Search

Search form




Logo of Phnom Penh Post newspaper Phnom Penh Post - ឃឹម​ ឌីម៉ា​ ផ្តួល​ជើង​ខ្លាំង​ថៃ​ត្រឹម​ទឹក​ទី​៣ ខណៈ​​គូ​ខ្សែ​ក្រ​វាត់ ខ្មែរ​ឈ្នះ​ទាំង​អស់​




ឃឹម​ ឌីម៉ា​ ផ្តួល​ជើង​ខ្លាំង​ថៃ​ត្រឹម​ទឹក​ទី​៣ ខណៈ​​គូ​ខ្សែ​ក្រ​វាត់ ខ្មែរ​ឈ្នះ​ទាំង​អស់​

Content image - Phnom Penh Post
កីឡាករ​ឃីម ឌីម៉ា (ឆ្វេង) របស់​កម្ពុជា បាន​យកឈ្នះ​លើ​ Phan Phayak ក្រោយ​ពី​​បង្ខំ​ឲ្យ​កីឡាករ​ថៃ​រូបនេះ ចាញ់​ក្នុង​ទឹក​ទី​៣​ យឺន ពន្លក

ឃឹម​ ឌីម៉ា​ ផ្តួល​ជើង​ខ្លាំង​ថៃ​ត្រឹម​ទឹក​ទី​៣ ខណៈ​​គូ​ខ្សែ​ក្រ​វាត់ ខ្មែរ​ឈ្នះ​ទាំង​អស់​

ភ្នំពេញ: កីឡាករ​ ឃីម​ ឌី​ម៉ា ​ជើង​ខ្លាំង​កម្ពុជា ​បាន​យក​ឈ្នះ​ជើង​ខ្លាំង​កីឡាករ​ថៃ​ Phan Phayak ត្រឹម​ទឹក​ទី ​៣​ ដោយ​ស្នៀត​កែង​ស្តាំ​យ៉ាង​មាន​ប្រ​សិទ្ធភាព​កាល​ពី​ព្រឹក​ថ្ងៃ​អាទិត្យ​ ទី​ ២៧​ ខែ​មករា​ ឆ្នាំ​ ២០១៩ ​នៅ​សង្វៀន​អាស៊ី​អាគ្នេយ៍​។​

ក្នុង​សង្វៀន​ជា​មួយ​គ្នា​នេះ ​កាល​ពី​ល្ងាច​ថ្ងៃ​សៅរ៍ ​គូ​ដណ្តើម​ខ្សែ​ក្រ​វាត់​ខារ៉ាបាវ​វគ្គ​ជម្រុះ​សន្សំ​ពិន្ទុ​រដូវ​កាល​ទី​៨​ សប្តាហ៍​ទី​៣ ​កីឡាករ​កម្ពុជា​ឈ្នះ​ទាំង​អស់​ទទួល​បាន​៣​ពិន្ទុ​បន្ថែម​ដូច​គ្នា ​ខណៈ​ដែល​កីឡាករ​ថៃ​ដែល​ចូល​រួម​ប្រ​កួត​ក្នុង​អំឡុង​ជម្រុះ​ខ្សែ​ក្រ​វាត់​នេះ បាន​ចាញ់​ទាំង​៣​សប្តាហ៍​។​

ក្រោយ​​ពី​ជ័យ​ជម្នះ​​នេះ លោក​ ហេង​ ប៊ុន​ឃីម ​ឪ​ពុក​​កីឡាករ​​ ឃីម​ ឌីម៉ា​ បាន​និយាយ​ថា​៖​ «ឌីម៉ា​ឈ្នះ​ក្នុង​លក្ខណៈ​អំណោយ​ផល​ល្អ​ ខណៈ​ដែល​កីឡាករ​ថៃ​ Phan Phayak​ ភ្លាត់​ស្នៀត​ទ្រេត​ខ្លួន​ទៅ​ម្ខាង​ ដែល​ជា​ឱ​កាស​មាស​របស់​ឌី​ម៉ា​ ព្រ​លែង​មួយ​កែង​ចំ​លើ​ភ្នែក​ពេញ​ទំហឹង​ដួល​សន្លប់​សុំ​ចុះ​ចាញ់​តែ​ម្តង​ត្រឹម​ទឹក​ទី​៣​​»​។ ​

លោក​ ហេង​ ប៊ុន​ឃីម ទទួល​ស្គាល់​ថា៖ «​កីឡាករ​ថៃ​ Phan​ Phayak​ ខ្លាំង​ពី​ព្រោះ​ការ​ប្រ​កួត​ចំនួន​២​ទឹក​ដំបូង​ បច្ចេកទេស​ប្រ​កួត​មាន​លក្ខណៈ​ប្រទាញ​ប្រទង់​ពិន្ទុ​គ្នា​នៅ​ឡើយ​ ហើយ​ការ​ប្រ​កួត​បាន​ឈាន​ចូល​ដើម​ទឹក​ទី ​៣​ ​កីឡាករ​ថៃ​​ Phan Phayak​ មាន​ប្រៀប​លើ​ឌី​ម៉ា​ផង​ដែរ​។​ ទោះ​ជា​យ៉ាង​ណា​ តាម​ការ​វាយ​ចេញ​យ៉ាង​ប្រុង​ប្រយ័ត្ន​បំផុត​នោះ​ បាន​ធ្វើ​ឲ្យ​ ឌី​ម៉ា​ ទទួល​បាន​ឱកាស​វាយ​ក្បាច់​កែង​ចូល​គោល​ដៅ​ល្អ​ និង​មាន​ប្រ​សិទ្ធភាព​បណ្តាល​ឲ្យ​កីឡាករ​ថៃ ​Phan Phayak ​ដួល​សន្លប់​តដៃ​លែង​បាន​តែ​ម្តង»​​។

កីឡាករ​ថៃ​ Phan ​Phayak បាន​​និយាយ​ក្រោ​ពេល​ប្រ​កួត​ថា​៖​ «ការ​ចាញ់​នេះ​មិន​អស់​ចិត្ត ​ពី​ព្រោះ​គេ​វ៉ៃ​កែង​លឿន​ពេក​គឺ​មិន​នឹក​ស្មាន​ដល់​ឡើយ​។​ បើ​មាន​ឱកាស​ ខ្ញុំ​ចង់​មក​ប្រ​កួត​សង​សឹក​ម្តង​ទៀត ​ពី​ព្រោះ​ក្រៅ​ពី​ក្បាច់​កែង​នោះ ឌីម៉ា​ ហាក់​ដូច​ជា​មិន​ខ្លាំង​ជាង​ខ្ញុំ​ទេ»​​។​

សម្រាប់​គូ​ដណ្តើម​ខ្សែ​ក្រ​វាត់​ខារ៉ាបាវ​ទម្ងន់​៥៧​គីឡូក្រាម​វិញ ​កីឡាករ​ថៃ​ចាញ់​ទាំង ​២​ គូរ​ ក្នុង​នោះ​ វ៉ាន់ ​វឿន មក​ពី​ក្លិប​ឃ្លាំង​មឿង​កីឡា​ខេត្ត​ពោធិ៍​សាត់​ បាន​ផ្តួល​​កីឡាករ​ថៃ ​Yort ​Vandy​ ត្រឹម​ទឹក​ទី​ ១​។​

ជ័យ​ជម្នះ​របស់ ​វ៉ាន់ ​វឿន បាន​នាំ​​ឲ្យ​គេ​​មាន​​ ៦ ​ពិន្ទុ​ក្នុង​ពូល​ A​ ខាង​កីឡាករ​កម្ពុជា​ ដោយ​មាន​លំដាប់​ឈរ​​លើ​កំពូល​តារាង​ បន្ទាប់​ពី​ឈ្នះ ​២​ ប្រ​កួត​ តាម​រយៈ​ការ​ផ្តួល​ដៃ​គូ​តស៊ូ​ឲ្យ​សន្លប់​ទឹក​ទី​៣​ម្នាក់​ និង​ទឹក​ទី​ ១ ​ម្នាក់​។ ​

Content image - Phnom Penh Post
កីឡាករ​ហេង សំរាំង (ឆ្វេង) របស់​កម្ពុជា ត្រូវ​បាន​សម្រេច​ឲ្យ​បាន​លទ្ធផល​ស្មើ​ជាមួយនឹង​កីឡាករ​អ៊ី​រ៉ង់ Matin។ យឺន ពន្លក

អ្នក​ស្រី​សុខា ​អ្នក​គ្រប់​គ្រង​កីឡាករ​​ វ៉ាន់ ​វឿន បាន​​ឲ្យ​ដឹង​ថា៖ «​​ក្រោយ​ផ្តួល​កីឡាករ​ថៃ​ វ៉ាន់​ វឿន​ និង​គ្រូ​បង្វឹក​កំពុង​ត្រៀម​ខ្លួន​ហ្វឹក​​ហាត់​ឲ្យ​បាន​ល្អ​ឈាន​ឆ្ពោះ​ទៅ​ដណ្តើម​យក​ខ្សែ​ក្រ​វាត់​ឲ្យ​បាន​ក្នុង​ពេល​ខាង​មុខ​ ពី​ព្រោះ​ក្នុង​ចំណោម​កីឡាករ​កម្ពុជា​ចំនួន​៤​រូប​ មាន​តែ ​វ៉ាន់​ វឿន ​នេះ ​កំពុង​មាន​ប្រៀប​នៅ​លើ​កំពូល​តារាង​បណ្តោះ​អាសន្ន​ដែល​កំពុង​តាម​ប្រជែង​ពី​ក្រោយ​នូវ​កីឡាករ​ខ្លាំងៗ​ចំនួន​ ៣​ នាក់​ទៀត​»។

​ជា​មួយ​គ្នា​នេះ​ដែរ​ កីឡាករ​ សេន កុសល គិត​ត្រឹម​សប្តាហ៍​នេះ ក៏​​មាន​ ៦​ ពិន្ទុ​ដែរ ដោយ​ឈរ​​ក្នុង​ចំណាត់​ថ្នាក់​លេខ ​​២ ​ក្នុង​ពូល​កីឡាករ​កម្ពុជា​បណ្តោះ​អាសន្ន​។​

ក្នុង​ការ​ប្រ​កួត​ជា​មួយ​កីឡាករ ​Deuk Ken ​សេន​ កុសល​ បាន​ឈ្នះ​បាន ​៣​ ពិន្ទុ​បន្ថែម ប៉ុន្តែ​ឆ្លង​កាត់​ការ​ប្រ​កួត​ស្វិត​ស្វាញ​ និង​តឹង​តែង​។​ ចំណែក​គូ​មិត្ត​ភាព​អន្តរជាតិ​យប់​ថ្ងៃ​សៅរ៍ ​ កីឡាករ​ហេង​ សំរាំង ​មក​ពី​ក្លិប​ព្រៃ​ទទឹង​ខេត្ត​បាត់​ដំបង បាន​​វាយ​ស្មើ​ជា​មួយ​កីឡាករ​មក​ពី​អ៊ី​រ៉ង់ ​Matin ក្នុង​ទម្ងន់ ​៧១​ គីឡូក្រាម​។​

កីឡាករ​ជើង​ថ្មី​វ័យ​ក្មេង ​រិទ្ធ ​ភូលូ​ មក​ពី​ក្លិប​អាណា​ចក្រ​គុន​ខ្មែរ​ បាន​ប្រ​កួត​ស្មើ​ជា​មួយ​ជើង​ខ្លាំង​របស់​ថៃ ​Loom Leng ក្នុង​ទម្ងន់​ ៦៣,៥​ គីឡូ​ក្រាម​៕​

អត្ថបទគួរចាប់អារម្មណ៍