ភ្នំពេញ៖ ក្រុមកីឡាករ កីឡាការិនីឃ្មុំមាសកំពង់ធំ បានរកឃើញនូវជ័យជម្នះដ៏គួរឲ្យកត់សម្គាល់មួយ ដើម្បីក្លាយជាម្ចាស់ជើងឯក ការប្រកួតជើងឯកបាល់បោះជិះរទេះជនពិការ លើកទី ១ ឆ្នាំ ២០១៩ ខណៈកម្រិតបច្ចេកទេសពិសេសក្រុមនារី ដែលបានចូលរួមប្រជែង ក្នុងព្រឹត្តិការណ៍នេះ ត្រូវបានថ្នាក់ដឹកនាំគណៈកម្មាធិការជាតិប៉ារ៉ាឡាំពិកកម្ពុជា (NPCC) វាយតម្លៃថា មានការរីកចម្រើនខ្លាំង ដែលអាចនឹងឈានទៅដណ្តើមបានមេដាយមាស ឬប្រាក់ ក្នុងការប្រកួតអាស៊ានប៉ារ៉ាហ្គេម នៅប្រទេស ហ្វីលីពីន នាដើមឆ្នាំ ២០២០។
តាមរយៈការប្រកួតផ្តាច់ព្រ័ត្រនៅទីលាន Premium Sport Club ក្នុងខណ្ឌទួលគោក ដែលបានបញ្ចប់កាលពីវេលាម៉ោង ១១:៣០ កាលពីថ្ងៃព្រហស្បតិ៍ ម្សិលមិញនោះ ក្រុមឃ្មុំមាសកំពង់ធំ បានបង្ហាញការលេងយ៉ាងស្វាហាប់ ក្នុងការវាយបកយកឈ្នះក្រុមឪម៉ាល់មានរឹទ្ធបាត់ដំបង ជាមួយពិន្ទុ ៤១-៣២ ដើម្បីលើកពានយ៉ាងស័ក្តិសមបំផុត។
ចំណែកក្រុមអង្គរបាជ័យកំពង់ចាម បានយកឈ្នះក្រុមរ៉ៃមាសឧត្តរមានជ័យ ៣៦-១៦ ដើម្បីទទួលបានលេខ ៣ ខណៈពិធីប្រគល់ពាន ត្រូវបានធ្វើឡើងក្រោមអធិបតីភាពលោក តែម ម៉ឺន អគ្គលេខាធិការរងគណៈកម្មាធិការជាតិអូឡាំពិកកម្ពុជា ព្រមទាំងអ្នកជំនាញ និងគ្រូបង្វឹកមកពីក្រៅប្រទេស ជាច្រើនរូបទៀត។
លោក យី វាសនា អគ្គលេខាធិការ NPCC បានថ្លែងក្រោយការប្រកួតថា៖ «ក្រុមបាល់បោះជិះរទេះផ្នែកនារីរបស់យើង នឹងទៅចូលរួមការប្រកួតជើងឯកពិភពលោក នៅថៃ នាថ្ងៃទី ២៧ ខែវិច្ឆិកានេះ។ បន្ថែមលើនេះ ពួកយើងក៏នឹងត្រូវទៅចូលរួមការប្រកួតអាស៊ានប៉ារ៉ាហ្គេម លើកទី ១០ នៅហ្វីលីពីន ពីថ្ងៃទី ១៨ ដល់ទី ២៥ ខែ មករា ឆ្នាំ ២០២០ ផងដែរ ហើយតាមរយៈការហ្វឹកហាត់ និងការប្រកួតនេះ យើងមើលឃើញថា គុណផល និងកម្រិតបច្ចេកទេសរបស់ពួកគាត់មានសក្តានុពលខ្ពស់ណាស់»។
អគ្គលេខាធិការរូបនេះ បានបន្តថា៖ «គ្រូបង្វឹកមកពីបរទេស ដែលបានអង្គុយមើលការប្រកួតនេះ គាត់មានការកោតសរសើរដល់ក្រុមបាល់បោះជិះរទេះនារីរបស់យើង ដោយគាត់បានវាយតម្លៃថា ទៅថ្ងៃអនាគតពួកគេនឹងក្លាយជាជើងឯក នៅអាស៊ីនឹងអាចទៅដណ្តើមបានមេដាយពិភពលោកបានទៀត។
លោកបានបញ្ជាក់ថា៖ «ខ្ញុំវាយតម្លៃខ្ពស់ថា សម្រាប់ការប្រកួតអាស៊ានប៉ារ៉ាហ្គេម លើកទី ១០ នេះ គឺបើសិនយើងអាចយកឈ្នះថៃ យើងនឹងដណ្តើមបានមេដាយមាស ព្រោះឥឡូវនេះគូប្រកួតរបស់យើង នៅក្នុងតំបន់អាស៊ាននេះ មានតែថៃមួយទេ ដែលយើងគិតថា អាចស៊ីយើងបាន ប៉ុន្តែក្រៅពីនេះនៅឆ្ងាយពីកម្ពុជាអ៊ីចឹងកម្ពុជា បើមិនបានមេដាយមាស គឺមេដាយប្រាក់ លើវិញ្ញាសាបាល់បោះជិះរទេះនារីនេះ»៕