.jpg)
ឡៅ ចន្ទ្រា បានម៉ាត់ទៅលើ Noeng Trakan ក្នុងការប្រកួតនៅសង្វៀន CNC កាលពីថ្ងៃអាទិត្យ។ ផា លីណា
ភ្នំពេញៈ អ្នកប្រដាល់ ឡៅ ចន្ទ្រា បានសម្រេចការសងសឹកលើជើងខ្លាំងរបស់ថៃ Noeng Trakan ហើយ ដើម្បីបញ្ចប់ការប្រកួតជម្រុះវិលជុំដណ្តើមពានអន្តរជាតិកំពូកអ្នកប្រដាល់កណ្តាប់ដៃដែក ISI Palm ជាមួយការឈ្នះទាំង ៤ ប្រកួត។រីឯ សួន ចាន់នី បានក្លាយជាម្ចាស់ប្រាក់លាន ក្នុងទម្ងន់ ៦០ គីឡូក្រាម។
សម្រាប់ការប្រកួត នៅលើសង្វៀន CNC កាលពីថ្ងៃអាទិត្យ នោះ ឡៅ ចន្ទ្រា ដែលធ្លាប់ចាញ់ពិន្ទុ Noeng Trakan កាលពីថ្ងៃទី ២៣ ខែកញ្ញា ឆ្នាំ ២០១៧ បានជួបការលំបាកច្រើន ក្នុងការយកឈ្នះ Noeng Trakan លើកនេះ ព្រោះថៃម្នាក់នេះ បានព្យាយាមវាយទប់ និងរំដោះខ្លួន ភាគច្រើន គឺគេមិនសូវហ៊ានប្តូរជាមួយ ចន្ទ្រា នោះទេ។
ការប្រកួតនៅក្នុងទឹកទី ១ និងទឹកទី ២ ឡៅ ចន្ទ្រា មិនអាចធ្វើអ្វី Noeng Trakan បាននោះទេ ព្រោះអ្នកទាំង ២ នេះ បានវាយបកសងគ្នាទៅវិញទៅមកប្រហាក់ប្រហែលគ្នា។
យ៉ាងណាក៏ដោយ នៅទឹកទី ៣ ឡៅ ចន្ទ្រា បានយកប្រៀបតាមរយៈការម៉ាត់ចូលពេញៗបាន ៣ ទៅ ៤ ដៃ និងថែមដោយជង្គង់បានខ្លះទៀត បើទោះបីជាការព្យាយាមចេញកែងរបស់គេ ត្រូវបាន Noeng Trakan បិទជាប់រហូតក៏ដោយ។
កណ្តាប់ដៃរបស់ ឡៅ ចន្ទ្រា បានបង្ខំឲ្យ Noeng Trakan ខំវាយរំដោះខ្លួន ប៉ុន្តែ ចន្ទ្រា រឹតតែបង្កើនការតាមវាយសង្គ្រប់ ហើយនៅទឹកទី ៤ ចន្ទ្រា បានវាយកែង និងរូសកែងខ្លីៗចូលពេញ ៣ ទៅ ៤ លើក ដើម្បីបន្តយកប្រៀប និងឈ្នះក្នុងការប្រកួតដ៏តានតឹងមួយនេះ។
ជ័យជម្នះជាលើកទី ៤ បន្ថែមទៅលើការបានផ្តួល Chhan Chhai ឲ្យសន្លប់នៅទឹកទី ៣ វ៉ៃកែងឲ្យ Rong Nakpha សន្លប់ទឹកទី ៤ និងបុកជង្គង់ Phan Chhai ឲ្យសន្លប់នៅទឹកទី ៣ កន្លងមកនេះ បានជួយឲ្យ ឡៅ ចន្ទ្រា ទទួលបានលេខ ១ ខណៈ Noeng Trakan ឈរនៅលេខ ២ ដោយឈ្នះ ៣ និងចាញ់ ១ ហើយ Rong Nakpha ឈរនៅលេខ ៣ ដោយឈ្នះ ៣ និងចាញ់ ១ ដែរ។ ចំណែក ពុទ្ធ ឆាយរិទ្ធី ឈរនៅលេខ ៤ ដោយឈ្នះ ២ និងចាញ់ ២ ប្រកួត ហើយអ្នកទាំង ៤ នេះ ត្រូវឡើងទៅប្រកួតបន្តនៅវគ្គពាក់កណ្តាលផ្តាច់ព្រ័ត្រ។
ចំណែក មាស សុជាតិ ដែលបានចាញ់ ៣ ប្រកួតជាប់គ្នាកន្លងមកនេះ បានបុកកែងបណ្តាលឲ្យថៃ Phan Chhai បែកក្រោមភ្នែកស្តាំតាំងពីទឹកទី ២ ហើយនៅទឹកទី ៣ សុជាតិ បានទាត់ Phan Chhai ឲ្យខូចជើងឆ្វេង និងបោះបង់ការប្រកួតតែម្តង តែអ្នកទាំង ២ ត្រូវធ្លាក់ចេញពីការប្រកួតនេះដូច ឆៃ សារ៉ា ដែរ។
ដោយឡែកកីឡាករ សួន ចាន់នី ដែលគេស្គាល់ច្បាស់ថាសូត្រ ប៊ុនធី នោះបានវាយកែងផ្តួលថៃ Phitnoy ឲ្យសន្លប់ទឹកទី ២ ក្នុងការប្រកួតផ្តាច់ព្រ័ត្រ កាលពីយប់ថ្ងៃសៅរ៍ នៅសង្វៀន CNC នេះដែរ ដើម្បីក្លាយជាម្ចាស់ប្រាក់លានចំនួន ៤ លានរៀល ខណៈការប្រកួតវគ្គជម្រុះ ចាន់នី បានផ្តួលថៃ Phayaldeth ត្រឹមទឹកទី ១ ហើយ Phitnoy ឈ្នះ ឃីម បូរ៉ា ដោយពិន្ទុទាំងលំបាក៕
