.jpg)
ធន់ ចាន់តាក់ និង សុខ សាវិន ទទួលបានប្រាក់រង្វាន់ ១,៨ លានរៀល ស្មើគ្នា ក្រោយគ្មានអ្នកឈ្នះ។ សហការី
ភ្នំពេញ៖ កីឡាករជំនាញប្រើកណ្តាប់ដៃ ធន់ ចាន់តាក់ បានសរសើរពីភាពរឹងមាំរបស់ សុខ សាវិន ដែលមិនព្រមទន់ជ្រាយ និងសន្លប់ក្រោមការវាយប្រហាររបស់ខ្លួន ធ្វើឲ្យការប្រកួតម៉ារ៉ាតុងដណ្តើមប្រាក់លានទម្ងន់ ៦៣,៥ គីឡូក្រាម ក្នុងកម្មវិធី Mas Fight Cambodia នៅលើសង្វៀនថោន ប្រចាំសប្តាហ៍ទី ៩ នេះ រកមិនឃើញម្ចាស់ជើងឯក ដែលត្រូវឈ្នះប្រាក់លាន ប៉ុន្តែ សៀវ ង៉ុយ បានទាត់ ថា សារុន ឲ្យខូចជើង ដោយប្រើពេលត្រឹម ២ នាទី ដើម្បីយកប្រាក់ឧបត្ថម្ភបន្ថែមរហូតដល់ ១,៦ លានរៀល។
សម្រាប់ការប្រកួតកាលពីថ្ងៃអាទិត្យកន្លងមកនេះ ធន់ ចាន់តាក់ និង សុខ សាវិន សុទ្ធតែប្រើក្បាច់ជំនាញផ្តួលគូប្រកួតឲ្យសន្លប់រៀងៗខ្លួននៅក្នុងការប្រកួតវគ្គជម្រុះ ដែលមានត្រឹម ៣ ទឹក ដោយក្នុងនោះ ចាន់តាក់ បានម៉ាត់ឲ្យ ផាន រះ សន្លប់ ត្រឹមទឹកទី ១ ហើយ សាវិន បានបុកជង្គង់ឲ្យ កូយ ឡាយ សន្លប់នៅទឹកទី ១ ដូចគ្នា។
យ៉ាងណាក៏ដោយទាំង ធន់ ចាន់តាក់ និង សុខ សាវិន ដែលសុទ្ធតែរំពឹងឈ្នះបានប្រាក់លាននៅសប្តាហ៍នេះ គឺមិនអាចផ្តួលគ្នាឲ្យសន្លប់បាននោះទេ បើទោះបីជាអ្នកទាំង ២ នេះ បានវាយប្តូរគ្នាទៅវិញទៅតាមយ៉ាងរន្ថាន់ និងគួរឲ្យជក់ចិត្តក៏ដោយ ហើយការស្មើគ្នាតាមច្បាប់ Mas Fight ក្នុងការប្រកួត ៩ នាទីពេញ នៅវគ្គផ្តាច់ព្រ័ត្រនេះ ធ្វើឲ្យអ្នកទាំង ២ ត្រូវចែកប្រាក់រង្វាន់ជា ២ ផ្នែក ដោយម្នាក់ៗទទួលបាន ១,៨ លានរៀល។
កីឡាករ ធន់ ចាន់តាក់ ដែលព្យាយាមម៉ាត់ទៅលើដើមទ្រូង និងពោះរបស់ សុខ សាវិន ក្នុងបំណងឲ្យសន្លប់នោះបាននិយាយថា៖ «ខ្ញុំខំព្យាយាមវាយចូលពោះគាត់ច្រើន ដើម្បីឲ្យសន្លប់ ប៉ុន្តែគាត់នៅតែរក្សាជំហររឹងមាំបានមិនសន្លប់។ ខ្ញុំធ្លាប់បានជួបគាត់ច្រើនដងមកហើយ តែពេលនេះឃើញថា គាត់ល្អជាងមុនច្រើន ព្រោះខ្ញុំបានប្រឹងប្រែងវាយអស់ពីសមត្ថភាពរបស់ខ្ញុំហើយ តែលទ្ធផលបានត្រឹមស្មើពិន្ទុគ្នា»។
ចំណែក សុខ សាវិន ហាក់មានការពេញចិត្តនឹងលទ្ធផលស្មើគ្នានេះ ដោយរូបគេបាននិយាយ ក្រោយការប្រកួតថា៖ «លទ្ធផលនេះ មិនអីទេ ព្រោះគេល្អ នឹងរឹងមាំ ធ្វើឲ្យខ្ញុំមិនសូវហ៊ានចូលប្តូរប៉ុន្មានទេ។ យ៉ាងណាក៏ដោយ ខ្ញុំបានប្រឹងប្រែងអស់ពីសមត្ថភាពហើយ តែបានត្រឹមស្មើគ្នា»។
ជាមួយគ្នានេះ លោក ធន់ សុភា គ្រូបង្វឹក ធន់ ចាន់តាក់ បាននិយាយថា៖ «ពួកគេហាត់បានល្អ មានកម្លាំងរឹងមាំ និងស៊ូទៅនឹងការវាយលុកដូចគ្នា។ ពួកគេសុទ្ធតែមានបទពិសោធប្រកួតច្រើន មានស្នៀតវាយលុក និងស្នៀតការពារបានល្អដូចគ្នា ហេតុនេះមិនអាចមានអ្នកណាវាយផ្តួលឲ្យសន្លប់បាននោះទេ។ ទោះយ៉ាងណា បើគិតពីពិន្ទុដូចការប្រកួតគុនខ្មែរវិញ ធន់ ចាន់តាក់ មានប្រៀបឈ្នះដាច់ ប៉ុន្តែច្បាប់នៃការប្រកួត Mas Fight នេះ គឺមិនសន្លប់ ត្រូវតែបានលទ្ធផលស្មើគ្នា»។
ទន្ទឹមជាមួយគ្នានេះ លោក គឹម ស្រ៊ុនកុសល នាយកគ្រប់គ្រងកម្មវិធីប្រកួត Mas Fight Cambodia បានបង្ហាញពីមោទនភាពនៃកម្មវិធីនេះ ដែលមានអ្នកគាំទ្រច្រើន។ លោកបាននិយាយថា៖ «សង្វៀនថោន បានបើកប្រកួតក្រោយសង្វៀនដទៃ ដោយយើងប្រកួតបាន ៣០ សប្តាហ៍ ហើយការរៀបចំប្រកួតម៉ារ៉ាតុងដណ្តើមប្រាក់លានចំនួន ៩ សប្តាហ៍នេះ គឺយើងធ្វើបានល្អទទួលបានការគាំទ្រខ្លាំងពីអ្នកទស្សនា និងខាងដៃគូឧបត្ថម្ភ ព្រោះការច្របាច់បញ្ចូលគ្នានៃច្បាប់ប្រកួតគុនខ្មែរមាន ៣ ទឹក នៅវគ្គជម្រុះ និងច្បាប់ Mas Fight ដែលត្រូវវ៉ៃ ៩ នាទីពេញគ្មានឈប់ នៅវគ្គផ្តាច់ព្រ័ត្រ កំពុងតែធ្វើឲ្យកម្មវិធីនេះមានការពេញនិយមខ្លាំង»៕
