.jpg)
ចាន់ រតនា បានទាត់ទៅលើកីឡាករគុយបា Gustavo Balart ក្នុងការប្រកួត ONE កន្លងមក។ សហការី
ភ្នំពេញ៖ ស្របពេលដែលអង្គភាពរៀបចំការប្រកួតក្បាច់គុនចម្រុះ ONE Championship ចេះតែពន្យារការប្រកួតរបស់ខ្លួនជាបន្តបន្ទាប់ ដោយវិបត្តិជំងឺកូវីដ ១៩ ហើយមិនទាន់បានកំណត់កាលបរិច្ឆេទប្រកួតជាថ្មី ឲ្យបានច្បាស់លាស់នោះ បានធ្វើឲ្យកីឡាករលំដាប់ល្អរបស់កម្ពុជា ចាន់ រតនា អន្ទះសាចង់ឡើងប្រកួត ដើម្បីបង្ហាញភាពអស្ចារ្យជាថ្មី ខណៈជីវភាពគ្រួសាររបស់គេក៏បានជួបបញ្ហាលំបាកក្នុងគ្រាមានវិបត្តិជាសកលនេះផងដែរ។
យ៉ាងណាក៏ដោយ ចាន់ រតនា ដែលសាងបានភាពល្បីខ្លាំងនៅក្នុងការប្រកួត ONE នេះ មិនបានផ្តេកផ្តួល ឬអស់សង្ឃឹមទៅនឹងការរង់ចាំនេះនោះទេ គឺរូបគេនៅតែបន្តព្យាយាមខំហ្វឹកហាត់ត្រៀមប្រកួត មិនថមថយឡើយ គឺប្រឹងជាប្រចាំ បើទោះបីជាពេលនេះ ក្លិបប្រដាល់របស់គេ (ក្លិបសិល្បៈគុនខ្មែរ) ដែលធ្លាប់តែមានជនបរទេស និងក្មេងៗជំនាន់ក្រោយ មកហ្វឹកហាត់ជាហូរហែ ស្ទើរតែត្រូវបិទទ្វារ ដោយសារវិបត្តិជំងឺកូវីដ ១៩ ក៏ដោយ។
ចាន់ រតនា បានប្រាប់ថា៖ «ខ្ញុំនៅតែរង់ចាំការប្រកួតដ៏ធំនេះជានិច្ច បើទោះបីជាកម្មវិធី ONE Championship នៅតែលើក និងពន្យារពេលប្រកួតក៏ដោយ។ ដើម្បីទទួលបានលទ្ធផលល្អ ក្នុងរយៈពេលជំងឺកូវីដ ១៩ នេះ គឺខ្ញុំមិនភ្លេចហ្វឹកហាត់ត្រៀមនោះទេ ដើម្បីទន្ទឹងរង់ចាំការប្រកួតមួយដ៏អស្ចារ្យ ជាមួយកីឡាករលំដាប់ល្បីរបស់ជប៉ុន Yoya Wakamatsu ព្រោះនេះជាការប្រកួតលំដាប់អន្តរជាតិមួយ ដែលនាំខ្ញុំឲ្យមានភាពល្បីល្បាញខ្លាំង និងបានតម្លៃខ្លួនច្រើនណាស់ បើសិនខ្ញុំប្រកួតឈ្នះនោះ»។
កីឡាករមានជំនាញទាំងប្រដាល់គុនខ្មែរ ល្បុក្កតោ ការ៉ាតេ យុទ្ធគុនខម យូដូ តេក្វាន់ដូ និងវ៉ូវីណាម ចាន់ រតនា ត្រូវបានគេទទួលស្គាល់ថា ជាកីឡាករកម្ពុជាតែម្នាក់គត់ ដែលទទួលបានជោគជ័យខ្លាំងក្នុងការប្រកួត ONE ដោយរូបគេចាប់ផ្តើមប្រកួតតាំងពីមានប្រាក់តម្លៃខ្លួន ១ ពាន់ដុល្លារ រហូតបាន ៣ ពាន់ដុល្លារ ខណៈ ចាន់ រតនា បានឈ្នះ ៣ លើកជាប់ៗគ្នានោះ គឺឈ្នះ Abrou Fernandes, Rudy Agustian និងឈ្នះ Gustavo Balart កាលពីខែសីហា ឆ្នាំ ២០១៩។
ការទទួលបានជោគជ័យនេះ បានធ្វើឲ្យ ចាន់ រតនា ទទួលបានកុងត្រាថ្មីជាមួយ ONE ដោយរូបគេនឹងត្រូវប្រកួត ៦ លើក នៅក្នុងឆ្នាំ ២០២០ នេះ ហើយការប្រកួតលើកទី១ ប្រចាំឆ្នាំនេះរបស់ រតនា គឺការជួបអ្នកប្រយុទ្ធរបស់ជប៉ុន Yoya Wakamatsu នេះតែម្តង ខណៈជំនួបនេះ គ្រោងរៀបចំតាំងពីខែមេសា ប៉ុន្តែត្រូវបានពន្យារពេលដោយសារវិបត្តិជំងឺកូវីដ ១៩ រហូតមកដល់ពេលនេះ។
«ប្រសិនគ្មានបញ្ហាកូវីដ ១៩ រាតត្បាតទេ ការប្រកួតបានរួចរាល់បាត់ទៅហើយ ប៉ុន្តែរឿងនេះ ខ្ញុំមិនដែលបោះបង់ការហ្វឹកហាត់ម្តងណាឡើយ ដើម្បីរង់ចាំការបើកឲ្យមានប្រកួត ONE ជាថ្មី ដោយគ្មានធ្វេសប្រហែសទេ ហើយខ្ញុំនៅតែសង្ឃឹមយ៉ាងមុតមាំថា ការហ្វឹកហាត់ត្រៀមរបស់ខ្ញុំ ក្នុងការប្រកួតជាមួយ Yoya Wakamatsu គឺខ្ញុំនឹងនាំមកនូវជ័យជម្នះពាន និងប្រាក់យ៉ាងច្រើនជាទីគាប់ចិត្ត»។
ចាន់ រតនា បានបញ្ជាក់ថា៖ «Yoya Wakamatsu មានសមត្ថភាពខ្លាំង ប៉ុន្តែខ្ញុំបានសិក្សាពីបច្ចេកទេសវាយរបស់គេតាមរយៈវីដេអូ ដើម្បីយកឈ្នះបាន ហេតុនេះនៅពេលកម្មវិធី ONE បើកភ្លាម ទោះជានៅក្នុងខែណាមួយ នៃចុងឆ្នាំ ២០២០ នេះ គឺខ្ញុំនៅតែធានាបាននូវសុខភាព និងកម្លាំងកាយរឹងមាំបច្ចេកទេសល្អ ដើម្បីឡើងទៅយកឈ្នះជប៉ុនរូបនេះឲ្យបាន»៕
