.jpg)
កីឡាករ Kreang Krai (ឆ្វេង) និងកីឡាករជឹម ចិត្ត្រា។ សហការី
ភ្នំពេញ: ការប្រកួតវគ្គផ្តាច់ព្រ័ត្រដណ្តើមខ្សែក្រវាត់ខារ៉ាបាវទម្ងន់ ៦៥ គីឡូក្រាមនៃសង្វៀនអាស៊ីអាគ្នេយ៍ នឹងឈានដល់វគ្គផ្តាច់ព្រ័ត្រនៅល្ងាចថ្ងៃសៅរ៍ ទី ២៨ ខែមេសា ឆ្នាំ ២០១៨ តាមកម្មវិធីដែលបានគ្រោងទុក។
បេក្ខភាពកីឡាករសម្រាប់ការប្រកួតវគ្គផ្តាច់ព្រ័ត្រគឺសំខាន់នេះនឹងធ្លាក់ទៅលើ ជឹម ចិត្ត្រា របស់កម្ពុជា មកពីក្លិបខ្លារខិនមានរិទ្ធ និង Kreang Krai របស់ថៃ ដើម្បីដណ្តើមខ្សែក្រវាត់ដែលអមដោយទឹកប្រាក់ចំនួន ៥០០០ ដុល្លារ ហើយអ្នកចាញ់ ដែលបានចំណាត់ថ្នាក់លេខ ២ នឹងទទួលបានប្រាក់ចំនួន ៣០០០ ដុល្លារផងដែរ។
ការប្រកួតនេះ គឺហាក់ដូចជាបង្ហាញឲ្យទស្សនិកជន និងអ្នកនិយមទស្សនាប្រដាល់ភាគច្រើនសម្តែងមតិយោបល់ ព្រមទាំងហ៊ានព្យាករពីលទ្ធផលថា ជឹម ចិត្ត្រា របស់កម្ពុជាមិនអាចតស៊ូប្រកួតឈ្នះជើងខ្លាំង Kre-ang Krai របស់ថៃបាននោះទេ។
ការព្យាករបែបនេះ ដោយសារតែការប្រកួតរបស់កីឡាករជឹម ចិត្ត្រា ភាគច្រើនចាញ់សន្លប់ ក្រោមស្នៀតកីឡាករថៃញឹកញាប់ ហើយបើគិតក្នុងអំឡុងប្រកួតខ្សែក្រវាត់ វគ្គជម្រុះចំនួន ៤ ប្រកួតនេះវិញ រូបគេ បានឈ្នះថៃតែ ២ លើក និងចាញ់សន្លប់ ២ ប្រកួត មុននឹងឡើងទៅវគ្គផ្តាច់ព្រ័ត្រដោយសារមឿន សុខហ៊ុច ចាញ់ថៃក្នុងថិរវេលាលឿនបំផុតក្នុងទឹកទី ១ ខណៈដែលពិន្ទុស្មើគ្នា។ ជុំវិញការប្រកួតផ្តាច់ព្រ័ត្រនេះ កីឡាករជឹម ចិត្ត្រា មិនត្រូវបានរំពឹងទុកថា អាចយកឈ្នះលើកីឡាករថៃ Kreang Krai បានទេ ហើយសូម្បីតែទប់ទល់ការពារ មិនឲ្យសន្លប់ ក៏គ្មានទំនុកចិត្តដែរ។
លោកសុផាត ដែលមានមុខរបរជាអ្នកភ្នាល់ប្រដាល់ម្នាក់ដ៏សកម្ម បាននិយាយថា៖ «ហាងឆេងភ្នាល់រវាងកីឡាករកីឡាករថៃ Kreang Krai និងជឹម ចិត្ត្រា មានតម្លៃទាបណាស់ ពោលគឺ ១០ ស៊ីតែ ១ ទេ ហើយភាគច្រើនមានតែអ្នកត ខណៈអ្នករងសឹងតែគ្មានដោយសារគេស្គាល់សមត្ថភាពខ្លាំងរបស់កីឡាករថៃ Kreang Krai ហើយក្នុងអំឡុងប្រកួតខ្សែក្រវាត់ ៤ ប្រកួតកន្លងមកនេះ ឈ្នះទាំង ៤ លើក ក្នុងនោះផ្តួលដៃគូឲ្យសន្លប់ចំនួន ៣ នាក់ឯណោះ»។
ប៉ុន្តែ អ្នកស្រីឡុង រ៉ាវី អ្នកគ្រប់គ្រងកីឡាករជឹម ចិត្ត្រា បានប្រតិកម្មថា៖ «ទោះបីការលើកឡើងរបស់អ្នកទស្សនា ឬពួកឈ្មួញប្រដាល់ដែលវាយតម្លៃជឹម ចិត្ត្រា ខ្សោយយ៉ាងណា ប៉ុន្តែសម្រាប់ខ្ញុំ ខ្ញុំគិតថា ការវ៉ៃគ្នាមិនអាចមើលងាយបានទេ ពីព្រោះអ្នកឯងទស្សន៍ទាយមិនមែនពិតនោះទេ ការប្រកួតជាក់ស្តែងនោះវាជាការពិត ដែលយើងកុំមើលស្រាលកណ្តាប់ដៃ កែង និងស្នៀតទាត់របស់ចិត្ត្រា ឲ្យសោះ»។
កីឡាករជឹម ចិត្ត្រា ផ្ទាល់បាននិយាយថា៖ «ការប្រកួតនេះធំណាស់។ វាជាឱកាសមាសដែលខ្ញុំមិនធ្លាប់ឈានមកដល់ ហើយខ្ញុំបានតាំងចិត្តថា មិនមែនមកស៊ីខ្ញុំផុយបានទេ ដោយការតាំងចិត្តវាយប្តូររបស់ខ្ញុំគឺសង្ឃឹមឈ្នះ ៦០ ភាគរយ»៕
