.jpg)
ឡៅ ចិត្ត្រា ឬ លន បញ្ញា ក្លាយជាម្ចាស់ខ្សែក្រវាត់មាស អមជាមួយប្រាក់រង្វាន់១ម៉ឺនដុល្លារ នៅសង្វៀនPNN?។ រូប ឈន ណន
ភ្នំពេញ៖ កីឡាករជើងខ្លាំង ឡៅ ចិត្ត្រា និង លន បញ្ញ សុទ្ធតែមានទំនុកចិត្ត និងប្តេជ្ញាស្វែងរកជ័យជម្នះរៀងៗខ្លួន ដើម្បីក្លាយជាម្ចាស់ខ្សែក្រវាត់មាស ទម្ងន់ ៦០ គីឡូក្រាម និងប្រាក់រង្វាន់ចំនួន ១ ម៉ឺនដុល្លារ ខណៈអ្នកទាំង ២ ត្រូវប្រឈមមុខដាក់គ្នាក្នុងការប្រកួតវគ្គផ្តាច់ព្រ័ត្រនៅលើសង្វៀន PNN នារសៀលថ្ងៃអាទិត្យនេះ។
ទាំង ឡៅ ចិត្ត្រា និង លន បញ្ញា សុទ្ធតែបោះបង់ចោលការប្រកួតកីឡា ប្រដាល់គុនខ្មែរជ្រើសរើសជើងឯកថ្នាក់ជាតិ ឆ្នាំ ២០១៩ ដើម្បីទុកពេលបង្កើនការហ្វឹកហាត់ និងថែទាំសុខភាព ត្រៀមការប្រកួតផ្តាច់ព្រ័ត្រនេះ ព្រោះអ្នកទាំង ២ ចង់ក្លាយជាម្ចាស់ខ្សែក្រវាត់ និងប្រាក់រង្វាន់ ១ ម៉ឺនដុល្លារដូចគ្នា គឺមិនចង់បានត្រឹម ២ ពាន់ដុល្លារ ក្នុងនាមជាអ្នកចាញ់នោះឡើយ។
យ៉ាងណាក៏ដោយ អតីតកីឡាករជើងខ្លាំង ឡៅ ស៊ីណាត ដែលជាបងប្រុសបង្កើត និងជាអ្នកបង្វឹក ឡៅ ចិត្ត្រា ដោយផ្ទាល់ដៃនោះ បានប្រាប់កាលពីម្សិលមិញថា៖ «យើងមានសង្ឃឹមឈ្នះច្រើន ដោយសារសមត្ថភាពរបស់យើងលើជាង។ លន បញ្ញា ល្អដែរ តែការវាយចេញរបស់គេ រាងយឺតបន្តិច គឺផ្ទុយពី ចិត្ត្រា ដែលវាយចេញបានល្អ ហេតុនេះខ្ញុំរំពឹងឈ្នះ ៨០ ភាគរយ»។
ឡៅ ស៊ីណាត បានបញ្ជាក់ថា៖ «ខ្ញុំមានការបារម្ភតែមួយប៉ុណ្ណោះទេ គឺខ្លាច ចិត្ត្រា ភ្លាត់ស្លៀត ប៉ុន្តែបើគ្មានករណីនេះកើតឡើងទេ គឺ ឡៅ ចិត្រ្តា មិនអាចចាញ់បានឡើយ ព្រោះយើងសុខចិត្តមិនចូលរួមការប្រកួតជើងឯកថ្នាក់ជាតិ ដើម្បីទុកពេលឲ្យ ចិត្ត្រា ហ្វឹកហាត់ និងថែទាំសុខភាពបានពេញលេញសម្រាប់ការប្រកួតផ្តាច់ព្រ័ត្រនេះ ព្រោះមហិច្ឆតារបស់យើង គឺត្រូវដណ្តើមយកខ្សែក្រវាត់មាសនេះ និងយកប្រាក់រង្វាន់ចំនួន ១ ម៉ឺនដុល្លារ ឲ្យបាន»។
គួររំឭកថា នៅមុនការឡើងមកដល់វគ្គផ្តាច់ព្រ័ត្រដណ្តើមខ្សែក្រវាត់មាសនេះ ឡៅ ចិត្ត្រា បានផ្តួលគូប្រកួតឲ្យសន្លប់ មិនលើស ២ ទឹកនោះទេ សម្រាប់ការប្រកួតជម្រុះ ២ លើកកន្លងមក ហើយនៅក្នុងការប្រកួតវគ្គពាក់កណ្តាលផ្តាច់ព្រ័ត្រ ចិត្ត្រា បានម៉ាត់ឲ្យ ឡុង ជិន សន្លប់ត្រឹមរយៈពេល ១ នាទី។
ជាមួយសមត្ថភាពប្រកួតដ៏លេចធ្លោនេះ ត្រូវបានគេមើលឃើញថា ឡៅ ចិត្ត្រា នឹងអាចបន្តយកឈ្នះ លន បញ្ញា ដើម្បីក្លាយជាម្ចាស់ខ្សែក្រវាត់មាសក្នុងរដូវកាលទី ១ នេះ ព្រោះបច្ចេកទេស និងសមត្ថភាពប្រកួតរបស់ លន បញ្ញា ហាក់ស្ថិតនៅក្រោម ចិត្ត្រា ហើយការប្រកួតវគ្គពាក់កណ្តាលផ្តាច់ព្រ័ត្រកន្លងមកនេះ លន បញ្ញា ត្រូវបានចៅក្រមកាត់ក្តីឲ្យឈ្នះ សុខ សាវិន ៣-២ ទាំងចម្រូងចម្រាស និងមានការប្តឹងតវ៉ាពីភាគី សុខ សាវិន ផងដែរ។
យ៉ាងណាក៏ដោយ លន បញ្ញា បានប្រាប់ថា គេគ្មានការញញើត ឡៅ ចិត្ត្រា នោះទេ ហើយរូបគេក៏បានត្រៀមទិចនិកថ្មីៗមួយចំនួនដើម្បីទប់ទល់ជាមួយ ចិត្ត្រា ផងដែរ។ លន បញ្ញា បានប្រាប់កាលពីថ្ងៃព្រហស្បតិ៍ថា៖ «២ សប្តាហ៍មកនេះ ខ្ញុំបានហ្វឹកហាត់ពេញលេញល្អណាស់ ហើយខ្ញុំនឹងធ្វើឲ្យបានល្អ ដោយសង្ឃឹមឈ្នះ ៧០ ភាគរយ»។
សិស្សគណសមាគមកីឡាប្រដាល់ក្រសួងការពារជាតិ លន បញ្ញា បានបញ្ជាក់ថា៖ «ខ្ញុំគ្មានការបារម្ភ ឬភ័យខ្លាចទៅនឹងភាពល្បី និងភាពខ្លាំងរបស់ ឡៅ ចិត្ត្រា នោះទេ ព្រោះខ្ញុំត្រៀមខ្លួនបានល្អ ហើយខ្ញុំក៏ប្តូរនូវទិចនិក និងបច្ចេកទេសប្រកួតមួយចំនួនផងដែរ។ ខ្ញុំបានព្យាយាមខ្លាំង សម្រាប់ត្រៀមការប្រកួតនេះ ព្រោះខ្ញុំចង់ឈ្នះបានខ្សែក្រវាត់ និងប្រាក់រង្វាន់ ១ ម៉ឺនដុល្លារ»៕
