ភ្នំពេញ៖ មន្ត្រីជំនាញរបស់គណៈកម្មាធិការជាតិ រៀបចំការប្រកួតកីឡាអាស៊ីអាគ្នេយ៍ លើកទី ៣២ ឆ្នាំ ២០២៣ (CAMSOC) បានបញ្ជាក់ជាថ្មីថា សម្ព័ន្ធមិត្តចិន បាន សម្រេចជ្រើសរើស យកប្រភេទកីឡាចំនួន ១២ របស់កម្ពុជា ឱ្យ ទៅហ្វឹកហាត់រយៈពេលវែង នៅប្រទេសរបស់ខ្លួន ដើម្បីពង្រឹង សមត្ថភាព ត្រៀមទាំងការប្រកួតស៊ីហ្គេម នៅវៀតណាម ចុងឆ្នាំនេះ ពិសេសនៅពេលកម្ពុជា ធ្វើ ជាម្ចាស់ផ្ទះ ស៊ីហ្គេម នៅឆ្នាំ ២០២៣។
ប្រភេទកីឡាទាំង ១២ របស់កម្ពុជា ដែលប្រទេសចិនបានជ្រើសរើស សម្រាប់យកទៅហ្វឹកហាត់រយៈពេលវែង រួមមានកីឡាកាយសម្ព័ន្ធ វាយសី វូស៊ូ បាល់ទាត់ស្ត្រី ហែលទឹក អត្តពលកម្ម បាល់បោះ បាញ់កាំភ្លើង ចំបាប់ វាយកូនឃ្លីលើតុ លើកទម្ងន់ និងបាល់ទះ ដោយសរុបមានក្រុមអត្តពលិកចំនួន ១៣៥ នាក់។
បើទោះបីជា គម្រោងបញ្ជូនក្រុមអត្តពលិកទៅហ្វឹកហាត់រយៈពេលវែងនៅប្រទេសចិន ត្រូវបានពន្យារពេល និងលើកពេលម្តងហើយម្តងទៀត ដោយសារតែការផ្ទុះឡើងខ្លាំងនៃជំងឺកូវីដ ប៉ុន្តែនៅក្នុងឆ្នាំ ២០២១ នេះ កម្ពុជាមានគោលការណ៍ថ្មីថា នឹងស្វែងរកការសម្របសម្រួលបញ្ជូនក្រុមអត្តពលិកទៅហ្វឹកហាត់ឱ្យបាន ព្រោះកីឡាស៊ីហ្គេមលើកទី ៣២ ដែលកម្ពុជាត្រៀមធ្វើម្ចាស់ផ្ទះកាន់តែខិតជិតមកដល់ហើយ។
លោក វ៉ាត់ ចំរើន អគ្គលេខាធិការ CAMSOC បានថ្លែងប្រាប់ថា៖ «ថ្ងៃទី ១៧ ខែឧសភា ខាងមុខនេះ ជាពេលវេលាចុងក្រោយសម្រាប់គម្រោងមុន ដែលយើងថានឹងបញ្ជូនក្រុមអត្តពលិកឱ្យទៅហ្វឹកហាត់នៅចិន ប៉ុន្តែយើងនៅតែមិនទាន់អាចធ្វើទៅបាន។ តែទោះបីជាយ៉ាងណា គម្រោងបញ្ជូនក្រុមអត្តពលិកទៅហាត់នៅប្រទេសចិននេះ ត្រូវតែធ្វើឱ្យបាននៅឆ្នាំ ២០២១ នេះ ហើយយើងចង់ធ្វើឱ្យបានមុនខែវិច្ឆិកា ឬមុនការប្រកួតស៊ីហ្គេមនៅប្រទេសវៀតណាម ដើម្បីត្រៀមការប្រកួតនេះផងដែរ»។
លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ផងនោះបានបន្តថា៖ «គម្រោងបញ្ជូនក្រុមអត្តពលិកទៅហ្វឹកហាត់នេះ គឺធ្វើតាមកិច្ចព្រមព្រៀងរវាងរាជរដ្ឋាភិបាលកម្ពុជា និងសាធារណរដ្ឋប្រជាមានិតចិន។ ជាមួយគ្នានេះ យើងត្រៀមកីឡាករកីឡាការិនីចំនួន ១៣៥ នាក់ មកពី ១២ ប្រភេទកីឡា និងមានគ្រូបង្វឹកជាអ្នកដឹកនាំចំនួន ១១ នាក់ ព្រមទាំងស្ត្រីចំនួន ៥ នាក់ ដែលជាអ្នកបកប្រែភាសាក្នុងការសម្រួលទំនាក់ទំនងដល់ការហ្វឹកហាត់»។
ក្រៅពីផែនការបញ្ជូនក្រុមអត្តពលិកកម្ពុជាទៅហ្វឹកហាត់រយៈពេលវែង នៅប្រទេសចិននេះ លោក វ៉ាត់ ចំរើន បានអះអាងថា កម្ពុជាក៏មានទំនាក់ទំនងបញ្ជូនប្រភេទកីឡាខ្លះទៀត ឱ្យទៅហ្វឹកហាត់នៅតាមប្រទេសមួយចំនួនទៀតផងដែរ ដូចជាកូរ៉េខាងត្បូង វៀតណាម ថៃ និងអឺរ៉ុប ជាដើម ព្រោះការហ្វឹកហាត់នៅក្រៅប្រទេសពិតជាសំខាន់ណាស់។
អគ្គលេខាធិការ CAMSOC លោក ចំរើន បានបញ្ជាក់ថា ៖ «ការហ្វឹកហាត់នៅក្រៅប្រទេសជាចំណុចខ្លាំង ដោយសារកត្តា គ្រូជំនាញល្អ ពេលវេលាគ្រប់គ្រាន់ សម្ភារទំនើប និងការហូបចុកស្នាក់នៅកម្រិតស្តង់ដាអន្តរជាតិ ហើយបន្ថែមពីលើនេះ គឺគោរពវិន័យ តឹងតែងបានល្អតែម្តង។ ហេតុនេះ ការហ្វឹកហាត់នៅក្រៅប្រទេស ពិតជាបានផលល្អ ដើម្បីឆ្លើយតប និងការត្រៀមហ្គេម ឆ្នាំ ២០២៣ ដែលធ្វើឡើងក្នុងនាមម្ចាស់ផ្ទះ ជាប្រវត្តិសាស្ត្រ នៅក្នុងប្រទេសកម្ពុជា»៕