ភ្នំពេញៈ តាមរយៈការប្រកួតប្រជែងយ៉ាងស្វិតស្វាញ ៣ ថ្ងៃពេញ ព្រឹត្តិការណ៍ប្រកួតកីឡាចំបាប់ជ្រើសរើសជើងឯកថ្នាក់ជាតិ ឆ្នាំ ២០១៨ បានបញ្ចប់កាលពីល្ងាចថ្ងៃពុធ ហើយលទ្ធផលដែលទទួលបាន គឺក្រុមយុវជនមកពីតាម បណ្តាខេត្ត បានបង្ហាញឲ្យឃើញពីសមត្ថភាពប្រកួតគួរឲ្យចាប់អារម្មណ៍ ដើម្បីធ្វើឲ្យការប្រកួតនេះ បានបញ្ចប់ដោយជោគជ័យ ខណៈក្លិបក្រសួងសេដ្ឋកិច្ច និងហិរញ្ញវត្ថុ និងសមាគមក្រសួងមហាផ្ទៃ ឈ្នះបានមេដាយមាសច្រើនជាងគេ។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា និងជាប្រធានគ្រប់គ្រងការប្រកួតនេះ បានធ្វើការវាយតម្លៃខ្ពស់ ចំពោះលទ្ធផលដែលទទួលបាន សម្រាប់ការប្រកួតថ្នាក់ជាតិ ក្នុងឆ្នាំ ២០១៨ នេះ ពិសេសសមត្ថភាព និងទេពកោសល្យប្រកួតរបស់ក្រុមយុវជនមកពីតាមខេត្ត ដែលស្តែងឲ្យឃើញពីការរីកចម្រើនជាងឆ្នាំមុន។
លោកបានប្រាប់ភ្នំពេញ ប៉ុស្តិ៍ថា៖ «តាមរយៈការប្រកួតថ្នាក់ជាតិ នៅឆ្នាំនេះ យើងមើលឃើញថា មានលក្ខណៈប្លែក និងគួរឲ្យចាប់អារម្មណ៍ ព្រោះក្រុមយុវជនពី ៧០ ទៅ ៧៥ ភាគរយ ដែលភាគច្រើនមកពីតាមបណ្តាខេត្តនោះ គឺពួកគេមានសមត្ថភាពរីកចម្រើនទាំងលើការប្រកួតចំបាប់បុរាណ និងចំបាប់សម័យសេរី»។
លោក ធិន វិចិត្រ បានបន្ថែមថា៖ «ជ័យជម្នះធំមួយទៀត គឺក្រុមកីឡាការិនីវ័យក្មេងមកពីខេត្តប្រមាណ ១៥ ភាគរយ មានការរីកចម្រើនលើបច្ចេកទេសប្រកួត ដែលមានលក្ខណៈប្លែកពីឆ្នាំមុនៗ ព្រោះពួកគេ អាចយកឈ្នះក្រុមចំបាប់ មានមូលដ្ឋាននៅភ្នំពេញ ហើយអ្នកមកពីខេត្ត ក៏មានការយល់ដឹងបានច្រើន ទៅលើច្បាប់ និងបទបញ្ជាប្រកួតថ្មីមួយចំនួន ដែលយើងបានយកមកអនុវត្ត នៅក្នុងការប្រកួតនេះផងដែរ»។
យ៉ាងណាក៏ដោយ លោក ធិន វិចិត្រ បានទទួលស្គាល់ថា នៅមានចំណុចខ្វះខាតប្រមាណ ២០ ភាគរយ ដែលត្រូវពង្រឹងបន្ថែម ប៉ុន្តែលោកបានសរសើរទៅដល់ក្រុមយុវជនថ្នាលជម្រើសជាតិ ដែលបង្ហាញការប្រកួតយ៉ាងល្អ ដើម្បីរក្សាបានឱកាស ក្នុងការប្រមូលផ្តុំ នៅឆ្នាំក្រោយជាបន្តទៀត។ ចំណែកក្រុមធំជម្រើសជាតិ ទាំង ១៥ នាក់ ក៏នៅតែមានសមត្ថភាពល្អដែរ តែដោយសារអ្នកខ្លះមានអាយុច្រើន អ៊ីចឹងការប្រកួតផ្តុំឆ្នាំក្រោយ អាចមានការរុះរើចេញខ្លះ។
ចំណែកលោក Casey Barnett អនុប្រធានសហព័ន្ធកីឡាចំបាប់កម្ពុជា ដែលបានចំណាយថវិការផ្ទាល់ខ្លួនជាង ២៤ លានរៀល បន្ថែមលើកញ្ចប់ថវិកា ៣៦ លានរៀលរបស់ក្រសួងអប់រំ សម្រាប់ចំណាយលើការប្រកួត នេះបានថ្លែងថា៖ «ការប្រកួតថ្នាក់ជាតិ នៅឆ្នាំនេះ ទទួលបានជោគជ័យជាងឆ្នាំមុនៗ ព្រោះឆ្នាំនេះយើងបានបង្ហាត់ក្រុមថ្នាល ១៥ នាក់ ហើយថ្ងៃនេះ យើងឃើញពួកគេបញ្ចេញសមត្ថភាពបានល្អ ហើយការលើកទឹកចិត្តដល់ពួកគេក៏បានល្អដែរ»។
គួរបញ្ជាក់ថា ការប្រកួតកីឡាចំបាប់ជ្រើសរើសជើងឯកថ្នាក់ជាតិ ឆ្នាំ ២០១៨ នេះ មានកីឡាករ ៨៨ នាក់ និងកីឡាការិនី ២០ នាក់ បានចូលរួម ដោយពួកគេត្រូវលេងតំណាងឲ្យក្លិបចំនួន ៨ ហើយតាមរយៈការប្រកួតទាំង ១៥ វិញ្ញាសានេះ ក្លិបក្រសួងសេដ្ឋកិច្ច និងហិរញ្ញវត្ថុ បានឈរនៅលេខ ១ ដោយឈ្នះបានមេដាយមាស ៦ ប្រាក់ ៥ សំរឹទ្ធ ២ តាមពីក្រោយដោយក្រសួងមហាផ្ទៃ ឈ្នះបានមាស ៦ ប្រាក់ ៤ សំរឹទ្ធ ៣ និងលេខ ៣ ក្លិបបារមីម៉ឺនឯក ខេត្តកណ្តាល ដោយឈ្នះបានមេដាយមាស ១ ប្រាក់ ២ និងសំរឹទ្ធ ៧។
ចំណែកក្រុមអត្តពលិករបស់ក្លិបយាយព្រីងមានរិទ្ធ បានឈ្នះមេដាយមាស ១ ប្រាក់១ សំរឹទ្ធ៤ ដើម្បីឈរនៅលេខ ៤ តាមពីក្រោយដោយក្លិបរិទ្ធីសែនខេត្តកំពង់ឆ្នាំង ឈ្នះបានមាស ១ សំរឹទ្ធ ២ ក្លិបខេត្តព្រៃវែង ឈ្នះបានប្រាក់ ៣ សំរឹទ្ធ ៥ ក្លិបឃ្លាំងមឿងខេត្តពោធិ៍សាត់ បានមេដាយសំរឹទ្ធ ២ និងក្លិបប្រយ៉ាបមានរិទ្ធិ បានមេដាយសំរឹទ្ធ ១៕