.jpg)
សកម្មភាពការប្រកួតកីឡាចំបាប់ជ្រើសរើសជើងឯកថ្នាក់ជាតិ កាលពីឆ្នាំ ២០១៧ កន្លងមក។ ស្រេង ម៉េងស្រ៊ុន
ភ្នំពេញ: សហព័ន្ធកីឡាចំបាប់កម្ពុជានឹងនាំយកច្បាប់ និងបទបញ្ជាដែលទើបមានការកែប្រែថ្មីមួយចំនួនមកអនុវត្តក្នុងការប្រកួតកីឡាចំបាប់ជ្រើសរើសជើងឯកថ្នាក់ជាតិឆ្នាំ ២០១៨ ដែលនឹងចាប់ដំណើរការនៅសាលដំបូលទូកក្នុងពហុកីឡដ្ឋានជាតិនៅថ្ងៃចន្ទនេះ និងគ្រោងបញ្ចប់នៅថ្ងៃពុធ ដើម្បីធ្វើឲ្យការប្រកួតប្រជែងរកជើងខ្លាំងប្រចាំឆ្នាំនេះ ស្របទៅតាមការផ្លាស់ប្តូរនៃច្បាប់ និងបទបញ្ជាប្រកួតរបស់សហព័ន្ធកីឡាចំបាប់អន្តរជាតិ។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជាបានប្រាប់ភ្នំពេញ កាលពីថ្ងៃអាទិត្យថា៖ «ការប្រកួតកីឡាចំបាប់ជ្រើសរើសជើងឯកថ្នាក់ជាតិនៅឆ្នាំនេះ មានចំនួនក្លិប និងអត្តពលិកចូលរួមប្រហែលទៅនឹងឆ្នាំមុនដែរ ប៉ុន្តែលើកនេះ យើងនឹងមានការបន្ថែមនូវច្បាប់ និងបទបញ្ជាការប្រកួតថ្មីខ្លះ និងកាត់បទបញ្ជាចាស់ខ្លះចោល ហើយការធ្វើបែបនេះ ដើម្បី ធ្វើឲ្យការប្រកួតរបស់យើង ស្របទៅតាមការផ្លាស់ប្តូរនៃច្បាប់ និងបទបញ្ជាការប្រកួតមួយចំនួនរបស់សហព័ន្ធកីឡាចំបាប់អន្តរជាតិ ពិសេសធ្វើឲ្យការប្រកួតនេះ កាន់តែមានភាពស្វិតស្វាញ»។
ជាមួយនឹងការផ្លាស់ប្តូរច្បាប់ និងបទបញ្ជានៃការប្រកួតខ្លះៗនេះ សហព័ន្ធកីឡាចំបាប់កម្ពុជា បានកែប្រែរូបមន្តប្រកួត គឺបើក្នុង ១ វិញ្ញាសាមានអត្តពលិកចូលរួម ចាប់ពី ៦ នាក់ឡើង ត្រូវបែងចែកការប្រកួតជា ២ ពូល ដោយយកអ្នកបានលេខ ១ និងលេខ ២ តាមពូលទាំង ២ ឡើងទៅប្រកួតវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រប៉ុន្តែបើ ១ វិញ្ញាសា មានអ្នកចូលរួម ៥ នាក់ចុះក្រោម ត្រូវកំណត់ឲ្យប្រកួតវិលជុំ រួចកំណត់យកចំណាត់ថ្នាក់តែម្តង។
បន្ថែមលើនេះ នៅរាល់ការប្រកួតតាមថ្ងៃនីមួយៗ គឺត្រូវថ្លឹងទម្ងន់ពេលព្រឹក និងត្រូវប្រកួតនៅពេល រសៀល ហើយការកាត់បន្ថយម៉ោងថ្លឹងទម្ងន់ឲ្យកៀកទៅនឹង ម៉ោងប្រកួតបែបនេះ ត្រូវបាន លោក ធិន វិចិត្រ បញ្ជាក់ថា ដើម្បីកាត់បន្ថយការបញ្ចុះទម្ងន់ច្រើន ពេករបស់អត្តពលិកដែលនាំឲ្យមានការប៉ះពាល់ ឬគ្រោះថ្នាក់ ពេលពួកគេប្រកួតជាក់ស្តែង។
សម្រាប់ការប្រកួតកីឡាចំបាប់ថ្នាក់ជាតិឆ្នាំ ២០១៨ នេះ មានកីឡាករ ៨៨ នាក់ និងកីឡាការិនី ២០ នាក់ សរុបមាន ១១៩ នាក់ ដែលពួកគេត្រូវលេងតំណាងឲ្យក្លិបចំនួន ៨ ក្នុងនោះមានក្លិបក្រសួងសេដ្ឋកិច្ច និងហិរញ្ញវត្ថុ, ក្រសួងមហាផ្ទៃ, យាយព្រីងមានរិទ្ធិ, រិទ្ធីសែនខេត្តកំពង់ឆ្នាំង, ឃ្លាំងមឿងខេត្តពោធិ៍សាត់, ខេត្តព្រៃវែង, បារមីម៉ឺនឯក និងក្លិបប្រយ៉ាបមានរិទ្ធិ។
នៅក្នុងការប្រកួតនេះថ្នាក់ជាតិ ឆ្នាំ ២០១៨ នេះដែរ សហព័ន្ធកីឡាចំបាប់កម្ពុជា បានបន្ថែមវិញ្ញាសាប្រកួតចំបាប់សម័យនារី លើទម្ងន់ ៥៣ គីឡូក្រាម និងទម្ងន់សេរី (Open) ដែលធ្វើឲ្យការប្រកួត ទាំងចំបាប់បុរាណ (បុរស-នារី) ចំបាប់សម័យសេរី (បុរស-នារី) និងចំបាប់ក្រិចកូរ៉ូម៉ាំង (បុរស) នៅឆ្នាំនេះ មានចំនួនសរុប ១៨ វិញ្ញាសា។
ចំណែកអត្តពលិកចូលរួមនៅឆ្នាំនេះ មានយុវជនជាង ៧០ ភាគរយ ដែលស្របទៅតាមការចង់បានរបស់សហព័ន្ធ ព្រោះការប្រកួតនេះគឺដើម្បីជ្រើសរើសអត្តពលិកវ័យក្មេងមានទេពកោសល្យ ត្រៀមដាក់ឲ្យចូលហ្វឹកហាត់ក្នុងក្រុមជម្រើសជាតិ នៅឆ្នាំ ២០១៩។ យ៉ាងណាក៏ដោយ ចំពោះកញ្ចប់ថវិកាប្រកួតរបស់ក្រសួងអប់រំ យុវជន និងកីឡាមិនទាន់គ្រប់គ្រាន់ទៅលើការរៀបចំ និងការចំណាយក្នុងការប្រកួតជើងឯកថ្នាក់ជាតិនេះទេ។
ទាក់ទងនឹងបញ្ហានេះ លោក ធិន វិចិត្រ បានបញ្ជាក់ថា៖ «ការប្រកួតថ្នាក់ជាតិនេះ យើងត្រូវចំណាយអស់ចូល ៦០ លានរៀល តែកញ្ចប់ថវិការបស់ក្រសួងអប់រំ មានត្រឹម ៣៦ លានរៀលទេ អ៊ីចឹងការចំណាយបន្ថែមរៀងរាល់ឆ្នាំ គឺបានមកពីលោក Casey Barnett ដែលជាអនុប្រធានសហព័ន្ធ។ ជាមួយគ្នានេះ ក្រុមហ៊ុនខ្មែរប៊ែវើរីជីស (Khmer Beverages) តាមរយៈលោក Michael Sovann ក៏បានឧបត្ថម្ភភេសជ្ជៈចំនួន ៦០ កេស និងទឹកបរិសុទ្ធចំនួន ១០ កេសដល់ការប្រកួតថ្នាក់ជាតិនៅឆ្នាំនេះផងដែរ»៕
