.jpg)
ឆាង ឈាវហួយ (មុខគេ) ពេលចូលរួមការប្រកួតជើងឯកយុវជនអាស៊ី នៅប្រទេស ហ្វីលីពីន។ សហការី
ភ្នំពេញៈ កីឡាការិនីវ័យក្មេងតូចច្រមក់ ឆាង ឈាវហួយ ដែលមានប្រភពពីក្មេងកំព្រាក្រីក្រតោកយ៉ាក និងគ្មានទីពឹង ដោយមានស្រុកកំណើតនៅភូមិក្តុល ឃុំលំចង់ ស្រុកសំរោង ខេត្តតាកែវនោះ បានកែប្រែខ្សែជីវិតរបស់ខ្លួន ពីអ្នករើសគ្រាប់បាល់សូហ្វតិន្នីស រហូតក្លាយជាកីឡាការិនីឆ្នើម មានវ័យក្មេងជាងគេ និងទទួលបានឱកាសចេញទៅប្រកួតនៅក្រៅប្រទេសជាលើកដំបូង។
លោកស្រី ស្តើង សុខុម ត្រូវជាអ៊ំ ឈាវហួយ បានប្រាប់ថា៖ «ឆាង ឈាវហួយ ជាក្មេងកំព្រា ដោយសារឪពុកម្តាយរបស់គេ បានបែកបាក់គ្នា ហើយក្នុងនាមខ្ញុំជាម្តាយធំ បានយករូបគេ មកសុំអង្គការផ្កាយសមុទ្រ ឲ្យបានចូលរៀន និងបន្ទាប់មកសុំមកហ្វឹកហាត់កីឡាសូហ្វតិន្នីសនៅក្នុងស្តាតអូឡាំពិក ដោយទទួលបានការអាណិតអាសូពីឯកឧត្តម ជា ប៊ុនហេង ជាប្រធានអង្គភាពកីឡាក្រសួងមហាផ្ទៃ ដោយលោកបានជួយជ្រោមជ្រែង ទើប ឆាង ឈាវហួយ ទទួលបានលទ្ធផលឆ្នើមមកដល់ពេលនេះ»។
លោកស្រី ស្តើង សុខុម បានចាត់ទុកថា ជាសំណាងមួយរបស់ ឆាង ឈាវហួយ ហៅ ក្អួយ ដែលបានចូលសាលារៀន ហើយត្រូវបានអង្គការផ្កាយសមុទ្រ ផ្តល់អាហារសម្លៀកបំពាក់សម្ភារសិក្សា ហើយទទួលបានការហ្វឹកហាត់កីឡាទទួលបានលទ្ធផលល្អបែបនេះ ព្រោះពីដំបូងឡើយ ឈាវហួយ គ្រាន់តែជាអ្នករើសគ្រាប់បាល់សូហ្វតិន្នីស នៅទីលានសហព័ន្ធដើម្បីបានប្រាក់ខ្លះពីអ្នកលេងតាមទឹកចិត្តអាណិតអាសូរ ប៉ុន្តែដោយសារឃើញ ឈាវហួយ មានភាពវៃឆ្លាត និងខិតខំឆ្លៀតយកពេល ទំនេរហ្វឹកហាត់ដោយខ្លួនឯងនោះ ទើបធ្វើឲ្យលោក ជា ប៊ុនហេង ជួយឲ្យបានហ្វឹកហាត់ពេញលេញតែម្តង។
តាមរយៈការខិតខំហ្វឹកហាត់ជិត ២ ឆ្នាំ ឈាវហួយ បានក្លាយជាកីឡាការិនីវ័យក្មេង មានរូបរាងតូចជាងគេ ដែលមានសមត្ថភាពលេងសូហ្វតិន្នីសបានល្អ ហើយការរីកចម្រើននេះ ឈាវហួយ ត្រូវបានសហព័ន្ធកីឡាសូហ្វតិន្នីសកម្ពុជា ផ្តល់ឱកាសឲ្យចេញទៅប្រកួតកីឡាសូហ្វតិន្នីសជើងឯកយុវជនអាស៊ី (The 1st Asian Junior Soft Tennis Championship 2019) នៅប្រទេស ហ្វីលីពីន ជាលើកដំបូង។
ឆាង ឈាវហួយ បានធ្វើដំណើរទៅចូលរួមការប្រកួតជើងឯកយុវជនអាស៊ីនេះ ជាមួយក្រុមយុវជនសូហ្វតិន្នីសកម្ពុជាចំនួន ១២ នាក់ទៀត ក្រោមការដឹកនាំរបស់លោក ជា ប៊ុនហេង អនុប្រធានទី១ សហព័ន្ធកីឡាសូហ្វតិន្នីសកម្ពុជា គ្រូបង្គោលលោក ជា សែនវិស្សុត ព្រមទាំងគ្រូជំនួយ លោក យី សារិន និងលោក ឆាយ បញ្ញាវុធ គឺប្រតិភូកីឡាតំណាងឲ្យកម្ពុជាមួយក្រុមនេះ បានចាកចេញពីមាតុប្រទេសកាលពីយប់ថ្ងៃចន្ទ នឹងត្រូវត្រឡប់មកវិញ នៅថ្ងៃទី ៣១ ខែ សីហា។
លោក ជា សែនវិស្សុត ដែលជាអគ្គលេខាធិការសហព័ន្ធផងនោះ បាននិយាយថា៖ «ឆាង ឈាវហួយ ប្រកួតឈ្នះដៃគូជាច្រើន ហើយមានទេពកោសល្យល្អ និងមានចរិតស្លូតបូត ទើបទទួលបានឱកាសចេញទៅប្រកួតនៅលើឆាកអន្តរជាតិ ជាលើកទី១ ក្នុងឆាកជីវិតរបស់នាង លើកនេះ ហើយបើ ឈាវហួយ បានលទ្ធផលល្អនោះ គឺអនាគតរបស់កីឡាសូហ្វតិន្នីស នឹងមានកីឡាការិនីឆ្នើមបន្ថែមទៀត»។
កីឡាការិនីវ័យ ១២ ឆ្នាំ ឆាង ឈាវហួយ និយាយថា៖ «សព្វថ្ងៃខ្ញុំនៅជាមួយអ៊ំស្រី ហើយខ្ញុំបានចូលរៀននៅសាលាអង្គការផ្កាយសមុទ្រ ថ្នាក់ទី៣ ដោយសាលាបានជួយអង្ករ ១ ខែ ២០ គីឡូក្រាម និងសម្ភារសិក្សាមួយចប់ ហើយអ៊ំខាងកីឡា ជួយឲ្យហាត់រៀងរាល់ល្ងាចនៅស្តាត»។
ចំណែកម្តាយបង្កើតរបស់ ឆាង ឈាវហួយ ឈ្មោះ ដើង គៀង អាយុ ៤០ ឆ្នាំ ដែលមានលំនៅស្រុកសំរោង ខេត្តតាកែវ បានបង្ហាញអារម្មណ៍សប្បាយខ្លាំង នៅពេលទទួលបានដំណឹងថា កូនស្រីរបស់ខ្លួនទទួលបានឱកាសទៅប្រកួតនៅក្រៅប្រទេសនោះ។
លោកស្រីបាននិយាយទាំងអួលដើមកថា៖ «មិននឹកស្មានថា កូនស្រីខ្ញុំ ដែលខ្ញុំគ្មានសមត្ថភាពចិញ្ចឹម និងមើលថែនោះ មានវាសនាយ៉ាងនេះសោះ។ ខ្ញុំសូមអរគុណដល់អង្គការផ្កាយសមុទ្រដែលជួយកូនខ្ញុំបានចូលរៀន និងអរគុណដល់ឯកឧត្តម ជា ប៊ុនហេង បានជួយកូនខ្ញុំឲ្យលេងកីឡាបានល្អយ៉ាងនេះ»៕
