ភ្នំពេញ: កីឡាករម៉ាជ សុខរ៉ា និងពុទ្ធ ឆាយរិទ្ធី បានបញ្ចប់ការប្រកួតវគ្គជម្រុះសន្សំពិន្ទុខ្សែក្រវាត់ Wurkz ទម្ងន់ ៦៧ គីឡូក្រាមនៃសង្វៀនអាស៊ីអាគ្នេយ៍ហើយកាលពីល្ងាចថ្ងៃអាទិត្យ ដោយទទួលបានលទ្ធផលល្អ ក្រោយពីបានផ្តួលដៃគូប្រកួតគឺកីឡាករថៃឲ្យសន្លប់បាន ៣ ពិន្ទុដូចគ្នា ក្នុងនោះពុទ្ធ ឆាយរិទ្ធី បានចំណាយពេលតែ ១០ វិនាទីប៉ុណ្ណោះក្នុងទឹកទី ១ ដើម្បីធ្វើឲ្យ Kao Ah សន្លប់ឈឹង។
ប៉ុន្តែ លទ្ធផលប្រកួតនៅវគ្គជម្រុះបញ្ចប់នេះ មិនអាចនាំសំណាងឲ្យពុទ្ធ ឆាយរិទ្ធី មានឱកាសទៅប្រជែងជាមួយម៉ាជ សុខរ៉ា និងរឿង សារ័ត្ន បានទេ ទោះកំពុងមានពិន្ទុស្មើគ្នាក៏ដោយ ពីព្រោះម៉ាជ សុខរ៉ា មានប្រៀបនាំមុខតាមរយៈការផ្តួលដៃគូប្រកួតឲ្យសន្លប់បាន ២ លើក។
ជាមួយគ្នានេះ ទោះបីការប្រកួតវគ្គជម្រុះរបស់ម៉ាជ សុខរ៉ា បានបញ្ចប់ទៅហើយ ដោយកីឡាកររូបនេះបានឈ្នះតាមរយៈការផ្តួលដៃគូឲ្យសន្លប់ចំនួន ២ លើក និងចាញ់កីឡាករថៃដោយពិន្ទុចំនួន ២ លើក មាន ១២ ពិន្ទុ ប៉ុន្តែមិនទាន់ច្បាស់ថា ត្រូវខ្ទាតចេញ ឬឡើងទៅវគ្គផ្តាច់ព្រ័ត្រជាមួយកីឡាករថៃនោះនៅឡើយទេ ដោយរង់ចាំលទ្ធផលប្រកួតមួយលើកទៀតរវាងកីឡាករកម្ពុជារឿង សារ័ត្ន ជាមួយកីឡាករថៃ Kang Kat សិន។
តាមការបូកសរុបពិន្ទុបណ្តោះអាសន្នពីគណៈកម្មការរៀបចំ ប្រកួតនៃសង្វៀនអាស៊ីអាគ្នេយ៍ អាចនឹងចេញលទ្ធផលចំនួន ២ គឺថា ប្រសិនបើរឿង សារ័ត្ន ប្រកួតនៅសប្តាហ៍ក្រោយដោយយកឈ្នះ Kang Kat រូបគេមានឱកាសបានឡើងទៅវគ្គផ្តាច់ព្រ័ត្រជាមួយកីឡាករថៃ Kong Kang Van ប៉ុន្តែប្រសិនបើរឿង សារ័ត្ន ប្រកួតចាញ់ កៅអីផ្តាច់ព្រ័ត្រនេះនឹងធ្លាក់ទៅលើកីឡាករម៉ាជ សុខរ៉ា ឡើងជំនួសវិញម្តងក្នុងវគ្គ ផ្តាច់ព្រ័ត្រជាមួយកីឡាករថៃ ដើម្បីដណ្តើមយកខ្សែក្រវាត់ និងទឹកប្រាក់រង្វាន់ចំនួន ៥០០០ ដុល្លារអាមេរិក។
លោកញាន សុធី ដែលជានាយកគ្រប់គ្រងកម្មវិធីប្រកួតប្រចាំសង្វៀនអាស៊ីអាគ្នេយ៍ បានប្រាប់ឲ្យដឹងថា៖ «ការប្រកួតវគ្គជម្រុះចុងក្រោយនេះជាការប្រកួតប្រជែងមួយដ៏ស្វិតស្វាញពីព្រោះលទ្ធផលយ៉ាងណាគ្មានអ្នកណាហ៊ានទស្សន៍ទាយ ឬព្យាករមុននោះឡើយ ដោយត្រូវរង់ចាំការប្រកួតរវាងរឿង សារ័ត្ន ជាមួយ Kang Kat ហើយលទ្ធផលដែលចេញពិតប្រាកដគឺសំណាងល្អ និងអត់សំណាងអាចនិយាយថា «មួយចានគោក មួយចានទឹក» ពីព្រោះរឿង សារ័ត្ន និង Kang Kat មានសមត្ថភាពប្រហាក់ប្រហែលគ្នា»។
អ្នកតាមដានប្រដាល់ម្នាក់ ដែលសុំមិនឲ្យបញ្ចេញឈ្មោះ បានប្រាប់ថា៖ «រវាងកីឡាករកម្ពុជា និងថៃមានអាថ៌កំបាំងក្រៅឆាកនៃសង្វៀនខ្លះ ដែលជារឿងគួរឲ្យខ្លាច ពីព្រោះកីឡាករថៃគេអាចវាយទម្លាក់ ឬដំឡើងគ្នាគេបានតាមការកំណត់ ឬណាត់គ្នាផ្ទៃក្នុង»។
ប្រភពបានបញ្ជាក់តាមរយៈការលើកជាឧទាហរណ៍ថា៖ «ប្រសិនបើកីឡាករ Kang Kat ឈ្នះ ឬចាញ់រឿង សារ័ត្ន ក៏គ្មានឱកាសបានឡើងទៅវគ្គផ្តាច់ព្រ័ត្រដែរ ដោយមានតែ Kong Kang Van ម្នាក់គត់ដែលឈរចាំ។ មានន័យថាប្រសិន Kang Kat ឈ្នះរឿង សារ័ត្នឱកាស Kong Kang Van អាចនឹងស៊ីម៉ាជ សុខរ៉ា ផុយដើម្បីយកខ្សែក្រវាត់ ដោយមិនលំបាក ពីព្រោះធ្លាប់ឈ្នះ សុខរ៉ារួចមកហើយ។ ចំណុចទី២ ប្រសិនបើកីឡាករ Kang Kat ចាញ់រឿង សារ័ត្ន វិញ ឱកាសរបស់ Kong Kang Van ជាមួយរឿង សារ័ត្ន ពិតជាលំបាកពីព្រោះកីឡាករថៃរូបនេះធ្លាប់ចាញ់រឿង សារ័ត្ន»៕