ភ្នំពេញ៖ អ្នកប្រដាល់ចាស់វស្សា ឆៃ សារ៉ា ដែលធ្លាប់ឈ្នះប្រាក់លានពីសង្វៀនថោនម្តងហើយនោះ បានបង្ហាញមហិច្ឆតាខ្ពស់ ដោយចង់ឈ្នះប្រាក់រង្វាន់ចំនួន ៣,៤ លានរៀលជាថ្មី សម្រាប់ការប្រកួតក្នុងទម្ងន់ ៦៧ គីឡូក្រាម នៅថ្ងៃអាទិត្យនេះ ប៉ុន្តែបានបារម្ភពីបេក្ខភាពជើងខ្លាំងចាស់វស្សាដូចគ្នាគឺ មុត ខ្លឹមខ្មៅ និង គឹម វាសនា ខណៈ មាស សុជាតិ មិនមែនជាឧបសគ្គ។
ក្នុងអាជីពជាអ្នកប្រដាល់រយៈពេលជាង ១០ ឆ្នាំ នៅលើសង្វៀនដោយបញ្ចេញញើស និងពេលខ្លះស្រក់ឈាមផងនោះ ឆៃ សារ៉ា នៅមានជីវភាពបានត្រឹមហូបចុកទាំងលំបាក ខណៈដែលបន្ទុកធ្ងន់ គឺមានកូន ៤ នាក់ ដែលពុំទាន់មានប្រាក់ចំណូលអ្វីក្រៅពីប្រដាល់នោះឡើយ។ ហេតុនេះ រូបគេ ពិតជាចង់ឈ្នះប្រាក់លានលើកនេះ ដើម្បីយកទៅដោះបំណុល ក្រោយពីកូនៗបានឈឺ រួចបានជំពាក់ថ្លៃព្យាបាល។
ទាក់ទងនឹងការប្រកួតនេះ ឆៃ សារ៉ា បាននិយាយថា៖ «ក្នុងចំណោមកីឡាករទាំង ៣ នាក់ ដែលត្រៀមជាប់ឆ្នោតប្រកួតលើកនេះ គឺកីឡាករដែលលំបាកយកឈ្នះនោះ មាន គឹម វាសនា និង មុត ខ្លឹមខ្មៅ ចំណែក មាស សុជាតិ មិនជាឧបសគ្គធំក្នុងការយកឈ្នះនោះឡើយ»។
សារ៉ា បានបន្តថា៖ «កាលមុន ខ្ញុំធ្លាប់ឈ្នះប្រាក់ពីកម្មវិធីនេះម្តង បន្ទាប់ពីឈ្នះ កែវ សំរិទ្ធ នៅវគ្គជម្រុះ និងឈ្នះ គឹម វាសនា នៅវគ្គផ្តាច់ព្រ័ត្រ ហើយទទួលបានប្រាក់ មកដោះស្រាយជីវភាពបានមួយកម្រិត។ ខ្ញុំបានឈ្នះ គឹម វាសនា ក្នុងលក្ខណៈលំបាកតឹងតែងណាស់ ចំណែក មុត ខ្លឹមខ្មៅ ធ្លាប់ប៉ះគ្នា ៥ លើក ចាញ់ ៣ និងឈ្នះ ២ សុទ្ធបែកឈាមទាំងអស់ ប៉ុន្តែទោះជាឧបសគ្គធំយ៉ាងណា គឺតាមការប្រឹងប្រែងហ្វឹកហាត់ និងតាំងចិត្តប្រកួត ខ្ញុំរំពឹងឈ្នះ ៦០ ភាគរយដែរ»។
ចំណែក មុត ខ្លឹមខ្មៅ មានរំពឹងខ្ពស់ជាង ឆៃ សារ៉ា ទៅទៀត ដោយនិយាយថា៖ «ខ្ញុំមានសង្ឃឹមឈ្នះ ៨០ ភាគរយ ដោយក្នុងចំណោម ៣ នាក់នេះ មាស សុជាតិ អាចស៊ីផុយ ព្រោះខ្ញុំធ្លាប់វ៉ៃឱ្យសន្លប់ ២ លើកហើយ ចំណែក ឆៃ សារ៉ា ខ្ញុំធ្លាប់ឈ្នះ ៣ និងចាញ់ ២ ដង ខណៈ គឹម វាសនា ខ្ញុំវ៉ៃឈ្នះ ១ និងចាញ់ ២ ដង»។ ខ្លឹមខ្មៅបានបញ្ជាក់ថា៖ «ឧបសគ្គធំសម្រាប់ខ្ញុំ មិនមែន មាស សុជាតិ និង ឆៃ សារ៉ា នោះទេ គឺ គឹម វាសនា នេះតែម្តង»។
ចំពោះ គឹម វាសនា ដែលដៃគូខាងលើសុទ្ធតែញញើតនោះ គឺមិនបញ្ចេញទស្សនៈអ្វីឡើយ ដោយគេនិយាយខ្លីថា៖ «ខ្ញុំមិនហ៊ានទស្សន៍ទាយទេ ប៉ុន្តែធានាវ៉ៃឱ្យអស់ពីលទ្ធភាព និងចង់ឈ្នះរង្វាន់ដូចគ្នា»។
តាមប្រវត្តិប្រកួត ដែលក្រុមការងារបច្ចេកទេសស្រង់បាន គឺ ឆៃ សារ៉ា, មុត ខ្លឹមខ្មៅ និង មាស សុជាតិ សុទ្ធតែធ្លាប់ប្រកួតច្រើនជាង ១០០ ដង គឺមានតែ គឹម វាសនា តិចជាងគេ ដោយប្រកួតបាន ៧២ លើក ប៉ុន្តែជើងខ្លាំងទាំង ២ សុទ្ធតែញញើតដូចគ្នា។
លោក ជួប វុត្ថា អ្នកគ្រប់គ្រង និងសម្របសម្រួលកីឡាករប្រកួតប្រចាំសង្វៀនថោនបានប្រាប់ថា៖ «អ្នកប្រដាល់ទាំង ៤ នេះ ពិតជាមានសមត្ថភាពប្រហាក់ប្រហែលគ្នា ហើយលទ្ធផលនៃការប្រកួត ពិតជាលំបាកព្យាករថា នរណាមានប្រៀបជាងអ្នកណាណាស់ គឺអាស្រ័យនៅលើសង្វៀនផ្ទាល់តែម្តង»៕