.jpg)
កីឡាករថៃ Rong Napha អាចនឹងសន្លប់ក្រោមផ្លែកែងរបស់ ឆៃ សារ៉ា ឬយ៉ាងណា? រូបថត សហការី
ភ្នំពេញ៖ ការប្រកួតជម្រុះខ្សែក្រវាត់ជើងឯកអ្នកប្រយុទ្ធកំពូលថាមពលឆេមពានរបស់សង្វៀនអាស៊ីអាគ្នេយ៍ បានឈានដល់ជុំទី ៣ ហើយ នារាត្រីថ្ងៃអាទិត្យនេះ ដោយក្នុងនោះ ឆៃ សារ៉ា របស់សមាគមកីឡាប្រដាល់ក្រសួងការពារជាតិ ត្រូវប៉ះថៃ Rong Napha ខណៈ ពុទ្ធ ឆាយរិទ្ធី ក្លិបពុទ្ធសេរីវង្ស ត្រូវជួបថៃ Phat Oubun ហើយសម្រាប់ជំនួបនេះ ភាគីកីឡាករកម្ពុជាទាំង ២ រូប សុទ្ធតែរំពឹងខ្ពស់ក្នុងការឈ្នះបាន ៣ ពិន្ទុ។
យ៉ាងណាក៏ដោយ បើទោះបីជាលទ្ធផលរបស់កីឡាករកម្ពុជារំពឹងឈ្នះថៃខ្ពស់បំផុត ប៉ុន្តែទាំង ឆៃ សារ៉ា និង ឆាយរិទ្ធី សុទ្ធតែប្រឈមទៅនឹងការធ្លាក់ចេញ ឬអាចនិយាយថា មានឱកាសតិចតួចបំផុត ព្រោះនៅក្នុងពូលកម្ពុជា ជាមួយគ្នានេះ កីឡាករ ឡុង សុភី និង វង្ស វិឆ័យ កំពុងមានពិន្ទុនៅបាំងពីលើ ដោយឈ្នះទាំង ២ ប្រកួត មាន ៦ ពិន្ទុ ដូចគ្នា ផ្ទុយពីនេះ ឆៃ សារ៉ា និង ឆាយរិទ្ធី បានឈ្នះ ១ និងចាញ់ ១ ប្រកួត មាន ៤ ពិន្ទុដូចគ្នា។
លោក ធន់ សុភា គ្រូបង្វឹក ឆៃ សារ៉ា និយាយថា៖ «សប្តាហ៍នេះ ឆៃ សារ៉ា ហ្វឹកហាត់បានល្អ ធានាវ៉ៃឈ្នះកីឡាករថៃ Rong Napha គឺសង្ឃឹម ៩០ ភាគរយ។ តាមខ្ញុំវាយតម្លៃតាមបច្ចេកទេសក្បាច់គុន ឆៃ សារ៉ា នឹងវ៉ៃឈ្នះ ព្រោះស្នៀតកែងជង្គង់ និងទាត់ មានប្រៀបជាងពិសេសក្បាច់កែងមុខកាណូត អាចនឹងធ្វើឲ្យកីឡាករ Rong Napha សន្លប់ក្នុងទឹកណាមួយក៏ថាបានដែរ។
ទោះជាយ៉ាងណា នៅពេលសួរពីឱកាសប្រជែងឡើងទៅវគ្គផ្តាច់ព្រ័ត្ររបស់ ឆៃ សារ៉ា នោះ លោក ធន់ សុភា បានឆ្លើយតបថា៖ «តាមរូបមន្តប្រកួត ដែលក្នុង ១ ពូល យកតែកីឡាករ ២ រូបឡើងទៅវគ្គផ្តាច់ព្រ័ត្រនោះ គឺឱកាសបានឡើងរបស់ ឆៃ សារ៉ា ពិតជាតិចតួចណាស់ ព្រោះពេលនេះមានជើងខ្លាំងនៅពីលើដល់ទៅ ២ នាក់ឯណោះ»។
ស្រដៀងគ្នានេះដែរ លោក ណន រិទ្ធ គ្រូបង្វឹក ពុទ្ធ ឆាយរិទ្ធី បានអះអាងថា៖ «ខ្ញុំមានទំនុកចិត្តខ្ពស់ថា ឆាយ រិទ្ធី នឹងឈ្នះកីឡាករ Phat Oubun ព្រោះសមត្ថភាព និងបទពិសោធរបស់ ឆាយ រិទ្ធី មានប្រៀបជាង ហើយជាមួយគ្នានេះការហ្វឹកហាត់របស់ ឆាយរិទ្ធី គឺត្រៀមប្រកួតបានល្អ»។
ចំណែក លោក ថៃ អ៊ូ ប្រតិភូនាំកីឡាករថៃមកប្រកួតបានប្រាប់ថា៖ «និយាយការពិតទៅសមត្ថភាពរបស់កីឡាករថៃ Phat Oubun និង Rong Napha នៅមានកម្រិត មិនដល់កីឡាករខ្មែរទាំង ២ នេះមែន ហើយការប្រកួតវគ្គជម្រុះចំនួន ២ លើកកន្លងមក យើងទទួលស្គាល់ថា មិនទាន់បានឈ្នះនៅឡើយ។ ទោះជាយ៉ាងណា ការប្រកួតនេះ ខ្ញុំជំរុញឲ្យប្រកួតអស់ពីសមត្ថភាព គឺចាញ់ ឬឈ្នះ ក្នុងលក្ខណៈស្វិតស្វាញ ជាគូដែលជក់ចិត្ត សមជាគូដណ្តើមខ្សែក្រវាត់ មិនឲ្យអ្នកទស្សនារិះគន់ទេ»។
តាមរូបមន្តនៃការប្រកួតខ្សែក្រវាត់នេះ គឺតម្រូវយកកីឡាករតែ ១ នាក់ ក្នុងពូលនីមួយៗ ដើម្បីឡើងទៅប្រកួតនៅវគ្គផ្តាច់ព្រ័ត្រ ហើយតាមរយៈលទ្ធផលប្រកួត ២ លើកដូចគ្នា គឺកីឡាករជើងចាស់ ឡុង សុភី និងជើងថ្មី វង្ស វិឆ័យ មានភាគរយខ្ពស់បំផុតក្នុងការប្រជែងគ្នាដោយប្រយោល ដើម្បីយកម្នាក់ទៅប៉ះអ្នកលេខ ១ ពូលថៃ នៅវគ្គផ្តាច់ព្រ័ត្រ ខណៈឱកាសរបស់ ឆៃ សារ៉ា និងកីឡាករ ពុទ្ធ ឆាយរិទ្ធី ពិតជាមានផ្លូវតូចចង្អៀតណាស់៕
