.jpg)
ក្រុងតូក្យូ: អភិបាលក្រុងតូក្យូ អ្នកស្រី Yuriko Koike បានមានប្រសាសន៍នៅថ្ងៃព្រហស្បតិ៍នេះថា វាប្រហែលជាចាំបាច់ឲ្យមានដំណាក់កាលមួយ ដែលនឹងផ្ដល់ភាពងាយស្រួលសម្រាប់ការប្រកួតប្រជែង ក្នុងព្រឹត្តិការណ៍អូឡាំពិកឆ្នាំក្រោយ ដោយសារផលវិបាកនៃការរាតត្បាតពីជំងឺកូវីដ ១៩ ហើយថា ក្រុមអ្នករៀបចំ បានពិភាក្សារួចហើយពីការកែប្រែដែលអាចនឹងមាន។
ការលើកឡើងរបស់អ្នកស្រី Koike កើតមានក្រោយកាសែតនៅជប៉ុន Yomiuri បានធ្វើការចុះផ្សាយថា ជម្រើសនានា ដូចជាការតម្រូវឲ្យធ្វើតេស្តរកវីរុសកូរ៉ូណា នឹងការអនុញ្ញាតិឲ្យមានទស្សនិកជនតិចតួចជាដើម កំពុងត្រូវបានយកមកពិភាក្សាដោយគណៈកម្មការរៀបចំ។
ប្រធានក្រុមត្រួតពិនិត្យរបស់គណៈកម្មាធិការអូឡាំពិកអន្តរជាតិ(IOC) សម្រាប់ព្រឹត្តិការណ៍ ដែលនឹងកើតឡើងនៅក្រុងតូក្យូ លោក John Coates បានថ្លែងថា កង្វះខាតការការពារទល់នឹងវីរុសកូរ៉ូណាថ្មី បានគំរាមកំហែងដល់កម្មវិធីប្រកួតប្រជែង និងក្រុមអ្នករៀបចំ ដែលត្រូវតែចាប់ផ្ដើមមានផែនការសម្រាប់អ្វី ដែលអាចមានការប្រកួតកីឡាអូឡាំពិកមួយប្លែកយ៉ាងពិតប្រាកដ ប្រសិនបើគ្មានសញ្ញានៃការរលាយបាត់របស់ជំងឺកូវីដ ១៩ ទេ។
កាសែត Yomiuri ដែលបានស្រង់សម្ដីពីប្រភពរបស់រដ្ឋាភិបាល និងក្រុមអ្នករៀបចំ បានឲ្យដឹងថា ការធ្វើតេស្ដតាមបច្ចេកទេសកំណត់លំដាប់ DNA (PCR) ដែលចាំបាច់ត្រូវមានចំពោះទស្សនិកជន បន្ថែមពីលើអត្តពលិក និងបុគ្គលិកទាំងអស់ ហើយការកម្រិតការចេញចូល ក្នុងភូមិអត្តពលិក គឺស្ថិតក្នុងចំណោមជម្រើស ដែលប្រទេសជប៉ុន នឹងលើកយកមកពិភាក្សាជាមួយ IOC។ សម្រាប់បញ្ហានេះ អ្នកស្រីអភិបាលក្រុង មិនបានធ្វើការលម្អិតនៅឡើយទេ គ្រាន់តែបា្រប់ថា ការពិភាក្សា គឺជារឿងចាំបាច់មិនអាចខ្វះបាន។
អ្នកស្រី Koike បានថ្លែងប្រាប់អ្នកសារព័ត៌មានថា៖ «ការរៀបចំការប្រកួតប្រជែងកីឡាអូឡាំពិក និងប៉ារ៉ាឡាំពិក តម្រូវឲ្យមានការយល់ចិត្តយល់ថ្លើមពីអ្នកក្រុងតូក្យូ និងប្រជាជនជប៉ុនទាំងអស់។ សម្រាប់បញ្ហានោះ យើងត្រូវការផ្ដល់ហេតុសមរម្យនូវអ្វី ដែលត្រូវការឲ្យមានភាពសមរម្យ និងត្រូវការពន្យល់ងាយៗនូវអ្វី ដែលត្រូវការឲ្យមានភាពងាយស្រួល»។
IOC និងរដ្ឋាភិបាលជប៉ុនកាលពីខែមីនា បានធ្វើការសម្រេចដែលមិនធ្លាប់មានពីមុនក្នុងការពន្យារពេលការប្រកួតប្រជែងព្រឹត្តិការណ៍កីឡាដ៏ធំ ដែលគ្រោងនឹងចាប់ផ្ដើមក្នុងខែកក្កដា ឆ្នាំនេះ រយៈពេល ១ ឆ្នាំ ដោយសារតែការផ្ទុះឡើងនូវវីរុសកូរ៉ូណា៕ AFP/VN
