ភ្នំពេញ៖ សហព័ន្ធកីឡាប្រដាល់គុនខ្មែរ បានផ្តល់ទំនុកចិត្តទៅលើលោក ហេង ប៊ុនឃីម តាមរយៈការជ្រើសរើសគ្រូបង្វឹកមកពីខេត្តបន្ទាយមានជ័យរូបនេះឱ្យធ្វើគ្រូធំ ព្រមទាំងបានជ្រើសរើសអតីតជើងខ្លាំងមានឈ្មោះបោះសំឡេង ឡៅ ស៊ីណាត, ឃុន ឌីម៉ា (ឃីម ឌីម៉ា) សេន ប៊ុនថេន និងលោក ទេព ស៊ីវុត្ថា ឱ្យធ្វើជាក្រុមជំនួយសម្រាប់បង្វឹកក្រុមជម្រើសជាតិគុនខ្មែរ ឆ្នាំ ២០២១ ដែលបានផ្តល់ជូនដល់កីឡាករបានឈ្នះជើងឯកថ្នាក់ជាតិ ឆ្នាំ ២០២០ សឹង ៩០ ភាគរយ និងបន្ថែមក្រុមមកពីថ្នាលចំនួន ៥ នាក់ទៀត។
ជុំវិញការជ្រើសរើសគ្រូបង្គោល និងគ្រូជំនួយនេះ លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានប្រាប់ ភ្នំពេញ ប៉ុស្តិ៍ថា៖ «គ្រូបង្វឹកក្រុមជម្រើសជាតិកីឡាប្រដាល់គុនខ្មែរទាំង ៥ នាក់នេះ ត្រូវបានជ្រើសរើស ដោយគណៈកម្មការជ្រើសរើសគ្រូបង្វឹក និងកីឡាកររបស់ខ្លួនយ៉ាងត្រឹមត្រូវ ក្នុងស្មារតីទទួលខុសត្រូវខ្ពស់ ចំពោះមុខមាត់ប្រទេសជាតិ ក្នុងនោះមានបេក្ខជនជាច្រើនរូបបានឈរឈ្មោះរួមទាំងអតីតគ្រូបង្វឹកជម្រើសជាតិ (២ រូប) ឆ្នាំចាស់ ២០២០ ផងដែរ ប៉ុន្តែមិនគ្រប់លក្ខខណ្ឌត្រូវជាប់»។
លោកបានបន្តថា គ្រូធំលោក ហេង ប៊ុនឃីម ព្រមទាំងគ្រូជំនួយ ឡៅ ស៊ីណាត, សេន ប៊ុនថេន លោក ទេព ស៊ីវុត្ថា និងម្ចាស់មេដាយមាសស៊ីហ្គេម ឃីម ឌីម៉ា នឹងផ្តោតខ្លាំងទៅលើការបង្វឹកក្រុមជម្រើសជាតិគុនខ្មែរឱ្យមានសមត្ថភាពខ្លាំង ដើម្បីចូលរួមការប្រកួតស៊ីហ្គេមលើកទី៣១ នៅវៀតណាម ចុងឆ្នាំ ២០២១ នេះឱ្យទទួលបានលទ្ធផលល្អ។
ចំណែកកីឡាករជម្រើសជាតិគុនខ្មែរ ឆ្នាំ ២០២១នេះ មានចំនួន ១៣ នាក់ រួមមានកីឡាករ ភុន ពិសិដ្ឋ ទម្ងន់ ៤៥ គ.ក្រ ខាំ ខ្លានាង ទម្ងន់ ៥១ គ.ក្រ កាន់ ម៉េងហុង ទម្ងន់ ៥៤ គ.ក្រ ប៊ុន គន្ធា (ប៊ុន សុធា) ទម្ងន់ ៥៧ គ.ក្រ ឃីម បូរ៉ា ទម្ងន់ ៦០ គ.ក្រ សោម ពិសិដ្ឋ ទម្ងន់ ៦៣,៥ គ.ក្រ ប៉ោ ភារិទ្ធ (យ៉េន ឌីណា) ទម្ងន់ ៦៣,៥ គ.ក្រ លន បញ្ញា ទម្ងន់ ៦៧ គ.ក្រ និង ឡៅ ចន្ទ្រា ទម្ងន់ ៧១ គ.ក្រ ដែលអ្នកទាំងនេះ សុទ្ធតែបានឈ្នះមេដាយមាស ការប្រកួតជើងឯកថ្នាក់ជាតិឆ្នាំ ២០២០។
ចំពោះបេក្ខភាពជម្រើសជាតិ ៥ នាក់ទៀត មានកីឡាករ សៃនី សៃណេត ទម្ងន់ ៤៨ គ.ក្រ រិន ដាវីត ទម្ងន់ ៥៤ គ.ក្រ ជាក្រុមជម្រើសជាតិថ្នាលឆ្នាំ ២០២០ ឡៅ ចិត្រ្តា ទម្ងន់ ៦៧ គ.ក្រ ជាម្ចាស់មេដាយសំរឹទ្ធស៊ីហ្គេមទំាង ២ លើក និង លី សុជាតិ ទម្ងន់ ៥៧ គ.ក្រ ជាម្ចាស់មេដាយប្រាក់ ការប្រកួតថ្នាក់ជាតិ ឆ្នាំ ២០២០។
លោក ហេង ប៊ុនឃីម ដែលធ្លាប់ជាគ្រូបង្វឹកក្រុមជម្រើសជាតិកន្លងមក និងជាឪពុកបង្កើតរបស់ម្ចាស់មេដាយមាស ឃុន ឌីម៉ា និងជើងខ្លាំង ឃីម បូរ៉ា នោះ បាននិយាយថា៖ «ខ្ញុំជាប់ជាគ្រូជម្រើសជាតិលើកនេះ មិនសប្បាយរីករាយទេ គឺមានការព្រួយបារម្ភទៅវិញទេ ពីព្រោះការងារនេះធ្ងន់ណាស់ ហេតុនេះខ្ញុំព្រួយខ្លាច បំពេញកាតព្វកិច្ចនេះ មិនបានល្អជូនជាតិ»។
លោកបានបន្តថា៖ «ទោះជាយ៉ាងណា ខ្ញុំនៅតែខិតខំប្រឹង ព្រោះថ្នាក់លើប្រគល់ភារកិច្ចនេះ ហើយខ្ញុំមានគ្រូជំនួយចំនួន ៤ រូប ដែលមានកម្លាំងល្អ អាចធ្វើការជាក្រុមបាន ព្រោះពួកគេស្គាល់ច្បាស់នូវការងារហ្វឹកហាត់ និងឡើងសង្វៀន ដែលមានបទពិសោធល្អ ដូចជា ឃុន ឌីម៉ា, សេន ប៊ុនថេន, ឡៅ ស៊ីណាត និង ទេព ស៊ីវុត្ថា»។
គួររំឭកថា លោក ហេង ប៊ុនឃីម ជាម្ចាស់ក្លិបរស្មីភូមិគាបខេត្តបន្ទាយមានជ័យ ហើយបានបង្វឹកកូនៗចំនួន ៣ នាក់ ឱ្យក្លាយជាអ្នកប្រដាល់ឆ្នើម រួមមាន ឃុន ឌីម៉ា ដណ្តើមបានមេដាយមាស ស៊ីហ្គេម ឆ្នាំ ២០១៧ ឃីម បូរ៉ា ឈ្នះបានខ្សែក្រវាត់ ២ និងពានជាច្រើនទៀត ព្រមទាំងកូនពៅ ឃីម ឌីម៉ៃ កំពុងតែល្អ គ្មានគូប្រៀប ក្នុងទម្ងន់ស្រាល ចំណែកការជាប់ជម្រើសជាតិទាំងឪពុក និងកូនលើកនេះ គឺកើតចេញពីសមត្ថភាពពិតមិនមែនតាមខ្សែរយៈ ឬបក្ខពួកនោះទេ៕