The Phnom Penh Post Search

Search form




Logo of Phnom Penh Post newspaper Phnom Penh Post - ជម្រើសជាតិ​ វ៉ូវីណាម សែន រ៉ាដេត ចង់​វិល​មក​ប្រកួត​ប្រដាល់​ជាថ្មី

ជម្រើសជាតិ​ វ៉ូវីណាម សែន រ៉ាដេត ចង់​វិល​មក​ប្រកួត​ប្រដាល់​ជាថ្មី

Content image - Phnom Penh Post
សែន រ៉ាឌី (​ឆ្វេង​) និង​ សែន រ៉ាដេត បានបង្ហាញ​មេដាយ​កម្រិត​ពិភពលោក ដែល​ពួកគេ​ដណ្តើម​បាន​លើ​ជំនាញ​វ៉ូវីណាម​។ សហការី

ជម្រើសជាតិ​ វ៉ូវីណាម សែន រ៉ាដេត ចង់​វិល​មក​ប្រកួត​ប្រដាល់​ជាថ្មី

ភ្នំពេញៈ អ្នក​ប្រដាល់​មាឌ​ល្អិត​ចិត្តធំ​វាយ​ចេញ​ច្បាស់ សែន រ៉ាដេត ដែល​បាន​ឃ្លាតឆ្ងាយ​ពី​សង្វៀន​ប្រដាល់​គុន​ខ្មែរ​កាលពី​ឆ្នាំ​ ២០១៧ ហើយ​បច្ចុប្បន្ន​គឺជា​កីឡាករ​ប្រភេទ​ប្រយុទ្ធ​ម្នាក់​របស់​ក្រុម​ជម្រើសជាតិ​វ៉ូវីណាម​នោះ នៅតែ​ចិញ្ចឹម​ចិត្ត​ចង់​ឡើង​ប្រកួត​ប្រដាល់​គុន​ខ្មែរ​នៅ​តាម​សង្វៀន​ឯកជន​រាល់​ចុង​សប្តាហ៍ ដើម្បី​រកប្រាក់​ចំណូល​សម្រាប់​ជីវភាព និង​បំប៉ន​កម្លាំង​។

ចំពោះ​ការផ្អាក​ការប្រកួត​ប្រដាល់​ជិត​ ៣ ​ឆ្នាំ​នេះ​ត្រូវ​បាន សែន រ៉ាដេត ប្រាប់ថា ដោយសារ​រូបគេ​ជាប់​ជម្រើសជាតិ​វ៉ូវីណាម និង​មាន​ការមមាញឹក​ខ្លាំង​រៀន​ផ្នែក​ច្បាប់​នៅ​សាកល​វិទ្យាល័យ​បៀលប្រាយ​។ សែន រ៉ាដេត គឺជា​ម្ចាស់​ខ្សែក្រវាត់​ ២ ​ស្ថាប័ន​ក្នុង​ទម្ងន់ ៥១ ​គីឡូក្រាម​ដោយ​រូបគេ និង សែន រ៉ាឌី ជា​បងប្រុស បាន​ផ្លាស់ប្តូរ​ជីវភាព​បាន​ប្រសើរ​ពី​កូន​អ្នក​នេសាទ​នៅលើ​ផ្ទៃសមុទ្រ​នា​ខេត្ត​កោះកុង​មក​រស់នៅ​រាជធានី​ភ្នំពេញ​តាមរយៈ​ការហ្វឹកហាត់ និង​ឡើង​ប្រកួត​កីឡាប្រដាល់​គុន​ខ្មែរ​។

មិន​ត្រឹមតែ​ប៉ុណ្ណោះ កីឡាករ​មាន​ទម្ងន់​ ៥៤ ​គីឡូក្រាម​កម្ពស់​ ១,៦៨ ​ម៉ែត្រ អាយុ​ ២៣ ​ឆ្នាំ សេន រ៉ាដេត បាន​ឈោង​ចាប់​ការ​ការសិក្សា​នៅ​កម្រិត​បរិញ្ញាបត្រ​ផង​ដែរ និង​បាន​ជាប់​ជា​កីឡាករ​ឆ្នើម​ជម្រើសជាតិ​វ៉ូវីណាម ទទួល​បាន​ជយលាភី​កម្រិត​ពិភពលោក ហើយ​ទទួល​បាន​ប្រាក់រង្វាន់​ពី​រាជរដ្ឋាភិបាល​គួរ​ជាទី​មោទនៈ​។

សែន រ៉ាដេត បាន​ប្រាប់​ភ្នំពេញ​ប៉ុស្តិ៍​ថា​៖ «​នៅ​ពី​ពាក់កណ្តាល​ឆ្នាំ​ ២០១៧ ខ្ញុំ​បាន​ឃ្លាត​ពី​សង្វៀន​ប្រដាល់​គុន​ខ្មែរ ដើម្បី​មក​ហាត់​វ៉ូវីណាម និង​ចូលរៀន​នៅ​សាកលវិទ្យាល័យ​ដែល​គិត​មក​ដល់​ពេល​នេះ ខ្ញុំ​រៀន​ផ្នែក​ច្បាប់​ឆ្នាំ​ទី​ ៤ ​ហើយ​នៅ​សាកលវិទ្យាល័យ​បៀលប្រាយ​ដោយ​ទទួលបាន​អាហារូបករណ៍​តាមរយៈ​កីឡា​តែម្តង​»​។

កាលពី​ឆ្នាំ​ ២០១៥ សែន រ៉ាដេត បានឈ្នះ​ខ្សែក្រវាត់​ណាហ្គាវើល​ទម្ងន់​ ៥១ ​គីឡូក្រាម​នៅ​សង្វៀន​អប្សរា ហើយ​បន្ទាប់មក​រូបគេ​បាន​ឈ្នះ​ខ្សែក្រវាត់​មួយទៀត​នៅ​សង្វៀន CBS ក្នុង​ទម្ងន់​ ៥១ ​គីឡូក្រាម​ផងដែរ ខណៈ​ប្រវត្តិ​ប្រកួត​របស់ សែន រ៉ាដេត នៅតែ​មាន​ប្រិយភាព​ខ្លាំង​ដដែល​ដោយសារ​ការប្រកួត​របស់​គេ​មិន​ចេះ​បន្ធូរដៃ​ឲ្យ​គូប្រកួត​ខ្លួន​នោះ​ឡើយ ពិសេស​ក្បាច់​ជង្គង់ និង​កែង​រហ័ស​លំបាក​រក​ដៃគូ​ក្នុងស្រុក​ប្រកួត​ជាមួយ​។

ឆ្លងកាត់​បទពិសោធ​ប្រកួត​បាន​ចំនួន​ជាង​ ៦០ ​ដង សែន រ៉ាដេត ចាញ់​តែ​ ៩ ​ដង​ទេ ហើយ​ក្រៅពី​នេះ​ឈ្នះ និង​ភាគច្រើន​ផ្តួល​ដៃគូ​ឲ្យ​សន្លប់​។ រ៉ាដេត បាន​បញ្ជាក់​ថា​៖ «​ទោះបី​ជា​ខ្ញុំ​នៅក្នុង​កីឡា​ជម្រើសជាតិ​វ៉ូវីណាម ប៉ុន្តែ​បើ​នៅ​ចុង​សប្តាហ៍​ប្រដាល់​គុន​ខ្មែរ​អនុញ្ញាត​ឲ្យ​ខ្ញុំ​បាន​ចូល​ប្រកួត​គឺ​ខ្ញុំ​នៅតែ​បន្ត​ប្រកួត​បាន​ទៀត ដើម្បី​ពង្រឹង​សមត្ថភាព កម្លាំង​ថាមពល និង​បម្រើការ​ទស្សនា​របស់​បងប្អូន​ដែល​តែងតែ​គាំទ្រ​ការប្រកួត​របស់ខ្ញុំ​»​។

កីឡាករ​រូបនេះ​បាន​បន្ថែម​ថា​៖ «​ទោះបី​ជា​ការហ្វឹកហាត់​ប្រមូលផ្តុំ​របស់​ក្រុម​ជម្រើសជាតិ​វ៉ូវីណាម​មាន​ការ​មមាញឹក ក៏​ខ្ញុំ​អាច​នឹង​ទៅ​ប្រកួត​បាន​នៅ​ចុង​សប្តាហ៍​ដោយ​មិន​ឲ្យ​ប៉ះពាល់​ការហាត់​នោះ​ឡើយ ព្រោះ​ខ្ញុំ​ចង់រក​ប្រាក់​ចំណូល​បន្ថែម​ផង ដ្បិតអី​នៅ​ក្រុម​ជម្រើសជាតិ ក្រៅពី​ហូបចុក​ស្នាក់នៅ​គឺ​មាន​របប​ឧបត្ថម្ភ​ប្រាក់​ជិត​មួយ​លាន​រៀល​ប៉ុណ្ណោះ​»​។

ចំណែក សែន រ៉ាឌី ជា​បងប្រុស​បាន​ប្រាប់ថា​៖ «​ខ្ញុំ​ចង់​ឲ្យ​ប្អូន​ខ្ញុំ បាន​ឡើង​ប្រកួត​វិញ​ដែរ ព្រោះ​ថា​នៅ​ថ្ងៃ​សៅរ៍ និង​អាទិត្យ​ក្រុម​ជម្រើសជាតិ​វ៉ូវីណាម​មិន​ហាត់​ទេ គឺ​អនុញ្ញាត​ឲ្យ​សម្រាក ហេតុនេះ​ការប្រកួត​គឺ​បាន​លុយ​ផង និង​បង្កើន​សមត្ថភាព​ផង​។ ចំណែក​ខ្ញុំ​មិនទាន់​មាន​ពេល​ឡើង​ប្រកួត​ទេ ព្រោះ​ក្រៅពី​ហាត់​វ៉ូវីណាម​ខ្ញុំ​ជួយ​លក់ដូរ​ប្រពន្ធ​»​។

ប្រភព​ពី​មន្ត្រី​គ្រប់គ្រង​កីឡា​ក្រសួងមហាផ្ទៃ​លោក​ឧត្តមសេនីយ៍ ជា ប៊ុនហេង បាន​ប្រាប់​ថា សែន រ៉ាឌី ត្រូវបាន​បញ្ចូល​ជា​ក្របខ័ណ្ឌ​មន្ត្រី​នគរបាល​រួចហើយ ចំណែក សែន រ៉ាដេត ដែល​បាន​នាំ​ជយលាភី​ជូន​ជាតិ តាមរយៈ​កីឡា​វ៉ូវីណាម​កន្លង​មក​នេះ​កំពុង​ស្នើសុំ​ឲ្យ​ទទួល​បាន​ក្របខ័ណ្ឌ​ជា​ប៉ូលិស​ផងដែរ​។ ប្រធាន​អង្គភាព​កីឡា​ក្រសួងមហាផ្ទៃ​រូបនេះ​បាន​បន្ថែមថា សែន រ៉ាដេត គួរ​ប្រឹងប្រែង​ហាត់​បន្ថែម ឡើង​ប្រកួត​គុន​ខ្មែរ​នៅ​ចុង​សប្តាហ៍ ដើម្បី​រក​ចំណូល ក៏​វា​មិន​ខុស​អ្វី​ដែរ ព្រោះ​ធ្វើឲ្យ​មាន​បទពិសោធ និង​បាន​លុយ​សម្រាប់​ជីវភាព​ផង​៕

អត្ថបទគួរចាប់អារម្មណ៍