​ជា សំនៀង និង ឌុន រដ្ឋា ត្រូវ​ដាក់​ឲ្យ​ជួប​បរទេស បន្ថែម​លើ​គូ​ម៉ារ៉ាតុង​ដណ្តើម​ប្រាក់​លាន​

កីឡាករកម្ពុជា ជា សំនៀង និងកីឡាករ Yort Sensak ។ រូបថត យឺន ពន្លក

ភ្នំពេញៈ កីឡាករកម្ពុជា ជា សំនៀង និង ឌុន រដ្ឋា នឹងត្រូវឡើងតតាំងជាមួយអ្នកប្រដាល់របស់ថៃ និងរុស្ស៊ី នៅលើសង្វៀន SEATV នាយប់ថ្ងៃសៅរ៍ ខាងមុខនេះ ហើយការប្រកួតមិត្តភាពអន្តរជាតិ ២ គូនេះ គឺបន្ថែមទៅលើការប្រកួតជម្រុះម៉ារ៉ាតុងដណ្តើមប្រាក់លាន ក្នុងទម្ងន់ ៦០ គីឡូក្រាម។

ជា សំនៀង ដែលជាម្ចាស់ខ្សែក្រវ៉ាត់មួយរូប ក្នុងទម្ងន់ ៦៥ គីឡូក្រាម នៅសង្វៀន SEATV ត្រូវបានផ្គូផ្គងឲ្យប្រកួតជាមួយកីឡាករជើងចាស់របស់ ថៃ Yort Sensak ឯ ឌុន រដ្ឋា ត្រូវប៉ះអ្នកប្រដាល់មកពីរុស្ស៊ី Athur Shushinsky។ ចំណែកគូប្រកួតជម្រុះដណ្តើមប្រាក់លាននៃកម្មវិធី Ganzberg Top Fighter គឺ សេក ចៅជូត ត្រូវប៉ះ សូត្រ ខេវិន ឯ វៀត ប៊ុនឌឿន ត្រូវជួបជាមួយ ឡុង ឡា។

ការប្រកួតដណ្តើមប្រាក់លានទាំង ២ គូ និងអន្តរជាតិ ២ គូនេះ វាបានបង្ហាញឲ្យឃើញនូវចំណាប់អារម្មណ៍ខ្លាំង។ ចំពោះគូម៉ារ៉ាតុង ដែលជាកីឡាករវ័យក្មេងៗ និងជើងថ្មី ដែលជាការរៀបចំប្រកួតមួយ ទំនងហាក់ដូចជាផ្តល់ឱកាសឲ្យជើងខ្លាំងៗវ័យក្មេង ទទួលបានឱកាសប្រកួតជាលក្ខណៈម៉ារ៉ាតុង ឲ្យមានតម្លៃខ្លួនប្រកួតប្រសើរជាងការប្រកួតធម្មតា។

ជាមួយគ្នានេះ ការវិលមកជួបគ្នារបស់ ជា សំនៀង និង Yort Sensak ត្រូវបានអ្នកតាមដានទស្សនាគេយល់ថា ជា សំនៀង បានជួបការប្រកួតមានលក្ខណៈធ្ងន់ធ្ងរ តឹងតែងដែលជាឧបសគ្គលំបាកឈ្នះបំផុត ព្រោះកន្លងមក ជា សំនៀង ធ្លាប់បរាជ័យ យ៉ាងគ្រាំគ្រាដោយអាជ្ញាកណ្តាលរាប់ចំនួន ២លើក មុននឹងចាញ់ Yort Sensak នៅលើសង្វៀនប៉ុស្តិ៍លេខ ៥ ។

យោងតាមស្ថិតិប្រកួត ដែល ភ្នំពេញ ប៉ុស្តិ៍ ទទួលបាន ពីគណៈកម្មការផ្គូផ្គង បានឲ្យដឹងថា ជា សំនៀង មានប្រវត្តិប្រកួត ៩៤ ដង ឈ្នះ ៧៨ ចាញ់ ១៣ និងស្មើ ៣ ដង។ រីឯ Yort Sensak មានកម្ពស់ ១,៧០ ម៉ែត្រដូចគ្នា និងមានប្រវត្តិប្រកួតប្រហាក់ប្រហែលគ្នា គឺបាន ៨៩ ដងឈ្នះ ៧៣ ចាញ់ ១៤ និងស្មើ ២ ដង។

កីឡាករ Yort Sensak ធ្លាប់មកប្រកួតស្រុកខ្មែរញឹកញាប់ និងទទួលបានលទ្ធផលល្អ ដោយបានឈ្នះជើងខ្លាំងរបស់កម្ពុជា មួយចំនួនគួរឲ្យកត់សម្គាល់ ប៉ុន្តែការប្រកួតរបស់ ជា សំនៀង មួយរយៈចុងក្រោយនេះ មានការធ្លាក់ចុះជាងមុន ពិសេសក្រោយពេលរូបគេឈ្នះបានខ្សែក្រវ៉ាត់ទម្ងន់ ៦៥ គីឡូក្រាម ពីកីឡាករថៃ Play Noy រួចមក។

ឌុន រដ្ឋា និង Athur Shushinsky ដែលជួបគ្នាក្នុងទម្ងន់ ៧១ គីឡូក្រាម។ រូបថត យឺន ពន្លក

ទោះជាយ៉ាងណា លោក ហង្ស ស៊ឺន គ្រូបង្វឹករបស់ ជា សំនៀង បាននិយាយថា៖ «ជា សំនៀង ហ្វឹកហាត់ត្រៀមប្រកួតបានល្អ ព្រោះក្នុងរយៈពេលចូលឆ្នាំខ្មែរកន្លងមកនេះ ក៏នៅហាត់ដែរ អ៊ីចឹងខ្ញុំសង្ឃឹមថា សំនៀង មិនធ្វើឲ្យអ្នកទស្សនាខកចិត្តនោះឡើយ»។

លោកបានបន្តថា៖ «ខ្ញុំមិនដែលឃើញការប្រកួតរបស់កីឡាករថៃនោះទេ ប៉ុន្តែសម្រាប់ជា សំនៀង កូនសិស្សខ្ញុំ គឺធានាវ៉ៃអស់ពីសមត្ថភាព ឯបញ្ហាចាញ់ឬឈ្នះ មិនហ៊ានថាមុននោះទេ ព្រោះវាអាស្រ័យពេលប្រកួតជាក់ស្តែង ហើយខ្ញុំក៏មានការបារម្ភខ្លះដែរ ទៅលើផ្នែកកម្លាំងដោយសារវាមានអាយុច្រើន ដែលកម្លាំងក៏ធ្លាក់ចុះជាងមុនដែរ»។

ចំណែកលោក ថៃ អ៊ូ ប្រតិភូដឹកនាំកីឡាករថៃមកប្រកួត បានប្រាប់ថា កីឡាករថៃ Yort Sensakនេះ ធ្លាប់មកប្រកួតនៅស្រុកខ្មែរចំនួន ៥ លើក ឈ្នះទាំង ៥ លើក ដូចជា មាស ច័ន្ទមាន, ជា សំនៀង, ថុល មករា និង គឹម វាសនា ជាដើម។ ចំណែកការប្រកួតលើកនេះ ជាសំនៀង ពិតជាលំបាកឈ្នះ Yort Sensak ព្រោះថៃម្នាក់នេះ មានស្នៀតទាត់ល្អ កែងល្អ ជង្គង់ល្អ និងវាយស៊ូបំផុត»។

ដោយឡែក ឌុន រដ្ឋា និង Athur Shushinsky ដែលជួបគ្នាក្នុងទម្ងន់ ៧១ គីឡូក្រាមនោះ ត្រូវបានគេរំពឹងថា មិនអាចឈ្នះ ឌុន រដ្ឋា នោះទេ ព្រោះកីឡាករពួកអីរ៉ុប ដែលយកមកប្រកួតភាគច្រើនជាប្រភេទកីឡាករទេសចរណ៍ មកប្រកួតគ្រាន់តែបង្គ្រប់កិច្ច តាមការចង់បានរបស់អ្នកឧបត្ថម្ភកម្មវិធីប៉ុណ្ណោះ។

ជាមួយគ្នានេះ លោក ថៃ អ៊ូ បានត្អូញត្អែរពីតម្លៃខ្លួនពួកកីឡាករអីរ៉ុបនេះ ថ្លៃហើយអស់សោហ៊ុយច្រើនទៀត ប៉ុន្តែសមត្ថភាពមិនល្អដល់កីឡាករថៃទេ។ ដោយឡែកគូម៉ារ៉ាតុងវិញសូត្រ ខេវិន ត្រូវបានគ្រូបង្វឹកគឺ លោក សួន ប៊ុនសូត្រ អះអាងរំពឹងឈ្នះ សេក ចៅជូត ដោយមិនបារម្ភពីការចាញ់នោះទេ ឯ វៀត ប៊ុនឌឿន ក៏ត្រូវបានគេរំពឹងថា ឈ្នះលើជើងថ្មី ឡុង ឡាមកពីខេត្តឧត្តរមានជ័យផងដែរ៕

ជា សំនៀង និង ឌុន រដ្ឋា ត្រូវដាក់ឲ្យជួបបរទេស បន្ថែមលើគូម៉ារ៉ាតុងដណ្តើមប្រាក់លាន

ព័ត៌មានថ្មីៗ

វីដេអូ

ជា សំនៀង និង ឌុន រដ្ឋា ត្រូវ​ដាក់​ឲ្យ​ជួប​បរទេស បន្ថែម​លើ​គូ​ម៉ារ៉ាតុង​ដណ្តើម​ប្រាក់​លាន

កីឡា

ព័ត៌មានថ្មីៗ

វីដេអូ

ជា សំនៀង និង ឌុន រដ្ឋា ត្រូវដាក់ឲ្យជួបបរទេស បន្ថែមលើគូម៉ារ៉ាតុងដណ្តើមប្រាក់លាន