.jpg)
រឿង សោភ័ណ្ឌ មានការជឿជាក់ថា រូបគេនឹងអាចផ្តួលអ្នកប្រដាល់បារាំងរូបនេះឲ្យសន្លប់ ដើម្បីបានប្រាក់រង្វាន់បន្ថែម។ រូប សហការី
ភ្នំពេញ៖ អ្នកប្រដាល់គុនខ្មែរលំដាប់ជួរមុខចំនួន ៥ នាក់ទៀត មាន រឿង សោភ័ណ្ឌ, ម៉ឺន មេឃា, លី ភា, ឡុង សុវណ្ណឌឿន និង សូត្រ ប៊ុនធី នឹងត្រូវបង្ហាញសមត្ថភាពរួមគ្នាក្នុងការប្រកួត Mas Fight នៅលើសង្វៀនថោន នាថ្ងៃអាទិត្យខាងមុខនេះ ហើយការឡើងប្រកួតក្នុងព្រឹត្តិការណ៍ ដែល ១ ទឹក មាន ៩ នាទីនេះ គឺពួកគេសុទ្ធតែរំពឹងអាចផ្តួលកីឡាករបរទេសឲ្យសន្លប់ មុនពេលកំណត់ ដើម្បីទទួលបានប្រាក់រង្វាន់បន្ថែម ចាប់ពី ២០០ ដុល្លារ ដល់ខ្ទង់ពាន់ដុល្លារ។
តាមគណៈកម្មការរៀបចំឲ្យបានឲ្យដឹងថា អ្នកលេងកណ្តាប់ដៃឆ្វេង រឿង សោភ័ណ្ឌ នឹងត្រូវប៉ះជាមួយអ្នកប្រដាល់ផ្សងព្រេងមកពីប្រទេស បារាំង Sam Sityodtong ក្នុងទម្ងន់ ៧០ គីឡូក្រាម ហើយតាមប្រវត្តិរបស់បារាំងរូបនេះ ទំនងជា សោភ័ណ្ឌ អាចនឹងស៊ីផុយ ព្រោះ Sam Sityodtong ដែលមាន កម្ពស់ ១,៨០ ធ្លាប់ប្រកួតត្រឹម ១៨ ដង ឈ្នះ ១១ និងចាញ់ ៧ ដង ខណៈដែល សោភ័ណ្ឌ ប្រកួតបានដល់ ១៧០ ដង ឈ្នះ ១៥៥ ចាញ់ ១០ ស្មើ ៥ និងធ្លាប់បានខ្សែក្រវាត់ចំនួន ៨ ស្ថាប័ន។
រឿង សោភ័ណ្ឌ និយាយថា៖ «បើកីឡាករបារាំងនោះមិនលាក់ប្រវត្តិប្រកួតទេ គឺបទពិសោធប៉ុណ្ណឹង មិនអាចគេចផុតពីសន្លប់ក្រោមកណ្តាប់ដៃរបស់ខ្ញុំបាននោះទេ។ កីឡាករបារាំងនោះ ប្រហែលជាមិនខ្លាំងប៉ុន្មានទេ ព្រោះខ្ញុំបើកមើលតាមយូធូប មិនទាន់មានឈ្មោះអ្វីដែលខ្ញុំព្រួយបារម្ភឡើយ គឺគេវ៉ៃរត់ និងមិនហ៊ានប្តូរកណ្តាប់ដៃជាមួយខ្ញុំទេ»។
សោភ័ណ្ឌ បានបន្ថែមថា៖ «ទោះជាយ៉ាងណា គណៈកម្មការផ្គូផ្គងមិនរើសយកជើងខ្សោយមកប៉ះខ្ញុំនោះទេ ព្រោះតាមខ្ញុំដឹង គណៈកម្មការផ្គូផ្គង នៅហុងកុង បានពិនិត្យមើលវីដេអូប្រកួតហើយ ទើបគេផ្គូផ្គងឲ្យមកប្រកួតនៅយើង។ ទោះយ៉ាងនេះក្តី ខ្ញុំនៅតែមានទំនុកចិត្តលើខ្លួន គឺខ្ញុំសង្ឃឹម ៩០ ភាគរយ ក្នុងការផ្តួលឲ្យបារាំងនោះដេកស្អាត ដើម្បីប្រមូលប្រាក់រង្វាន់»។
ចំណែកជើងខ្លាំងវ័យក្មេង ម៉ឺន មេឃា នឹងត្រូវប្រកួតទម្ងន់ ៦០ គីឡូក្រាមជាមួយម្ចាស់ខ្សែក្រវាត់មកពីប្រទេស ចិន Su Faming ដែលធ្លាប់ប្រកួតបាន ២៦ ដង ឈ្នះ ១៧ ចាញ់ ៩ ហើយធ្លាប់ផ្តួលដៃគូឲ្យសន្លប់ចំនួន ៤ ដង ខណៈ ម៉ឺន មេឃា ប្រកួតបាន ២៩ ដង ឈ្នះ ២៥ ចាញ់ ៣ និងស្មើ ១ ដង។
ជាមួយគ្នាកីឡាករ លី ភា ត្រូវតទល់ជាមួយជើងខ្លាំង និងជាម្ចាស់ខ្សែក្រវាត់មកពីថៃ Kwanpayak។ អ្នកទាំង ២ នេះ មានកម្ពស់ ១,៧០ ម៉ែត្រ ប្រហែលគ្នា ប៉ុន្តែ លី ភា មានបទពិសោធត្រឹមពាក់កណ្តាលកីឡាករថៃប៉ុណ្ណោះ លី ភា ប្រកួតបាន ៨៦ ឈ្នះ ៧២ ចាញ់ ១៤ និងធ្លាប់ផ្តួលដៃគូឲ្យសន្លប់ ២៥ ដង ចំណែក Kwanpayak ប្រកួតបានចំនួន ១៥០ ដង ឈ្នះ ៨៣ ចាញ់ ៦៦ ស្មើ ១ និងធ្លាប់ផ្តួលដៃគូឲ្យសន្លប់បានចំនួន ៣៥ ដង។
យ៉ាងណាមិញ ឡុង សុវណ្ណឌឿន ដែលយូរៗឡើងប្រកួតម្តងនោះ ត្រូវជួបជាមួយថៃ Denkronburi ក្នុងទម្ងន់ ៧១ គីឡូក្រាម ហើយតាមប្រវត្តិប្រកួតថៃម្នាក់នេះ ធ្លាប់ប្រកួតបានច្រើនជាង សុវណ្ណឌឿន ជាងពាក់កណ្តាល។ តាមប្រភពដែលស្គាល់កីឡាករថៃរូបនេះ បានឲ្យដឹងថា អ្នកទាំង ២ នេះ មានកម្ពស់ ១,៧៥ ម៉ែត្រដូចគ្នា និងមានក្បាច់គុនមិនកាចសាហាវប៉ុន្មានទេ។
លោក ឡុង សាលវ័ន្ត គ្រូបង្វឹក ឡុង សុវណ្ណឌឿន បាននិយាយថា៖ «ឡុង សុវណ្ណឌឿន មានទំនុកចិត្តឈ្នះ ៥០ ភាគរយប៉ុណ្ណោះ ព្រោះការប្រកួតនេះ បើយើងឈរបាន ៩ នាទីពេញមិនសន្លប់ គឺដឹងតែពីស្មើគ្នាហើយ»។
ចំណែកកីឡាករ សូត្រ ប៊ុនធី ដែលទើបតែផ្តួលជើងខ្លាំងថៃ Fa Nemith កាលពីសប្តាហ៍មុននោះ ត្រូវប្រឈមជាមួយជើងខ្លាំងចិន Moserwooda ក្នុងទម្ងន់ ៦៣ គីឡូក្រាម។ ជុំវិញការប្រកួតនេះ លោក សួន ប៊ុនសូត្រ ជាគ្រូបង្វឹក បានប្រាប់ថា៖ «ប៊ុនធី ហ្វឹកហាត់បានល្អ និងមានបំណងផ្តួលកីឡាករចិនឲ្យសន្លប់យកប្រាក់រង្វាន់បន្ថែម ហើយការប្រកួតនេះ នឹងមានភាពទាក់ទាញ ព្រោះការផ្តល់ប្រាក់រង្វាន់បន្ថែមនេះ ជាកម្លាំងចិត្តឲ្យកីឡាករវ៉ៃប្តូរ ដើម្បីឈ្នះដោយសន្លប់ គឺជក់ចិត្ត»។
លោក ស្រ៊ុន កុសល នាយកគ្រប់គ្រងកម្មវិធីបាននិយាយថា៖ «គិតមកដល់សប្តាហ៍ទី ១៣ នេះ កម្មវិធី Mas Fight Cambodia របស់សង្វៀនថោន នៅតែឈររឹងមាំក្នុងលក្ខខណ្ឌប្រកួតច្បាស់លាស់ គឺប្រកួតប្រជែងក្នុងតម្លាភាពសុចរិត ព្រមទាំងមានការគាំទ្រមហាជនកាន់តែកើនឡើង»៕
