ភ្នំពេញ៖ កីឡាករលំដាប់ជើងខ្លាំងរបស់កម្ពុជាចំនួន ៦ នាក់ ត្រូវបានដាក់ឲ្យប្រកួតគ្នា នៅលើសង្វៀន CNC នាព្រឹកថ្ងៃអាទិត្យ ដោយក្នុងនោះ សួន ចាន់នី (សូត្រ ប៊ុនធី) ត្រូវសងសឹក ឡុង សំណាង ចំណែកជើងខ្លាំងជំនាន់ថ្មី ឈឿង ល្វៃ ផ្សងសំណាងប៉ះជាមួយ ឡៅ ចន្ទ្រា ហើយ រឿម វណ្ណៈ ដាក់ឲ្យប្រកួតជំនួស ឡុង ជិន ដោយរូបគេត្រូវប្រឈមជាមួយជើងខ្លាំងវ័យក្មេង ម៉ឺន មេឃា។
សម្រាប់ការប្រកួតទាំង ៣ គូ ដ៏គួរឲ្យចាប់អារម្មណ៍នេះ ត្រូវបានប្រភពតាមដានសកម្មភាពប្រកួតប្រដាល់ប្រចាំសប្តាហ៍ ហ៊ានទស្សន៍ទាយថា ឡៅ ចន្ទ្រា អាចនឹងឈ្នះ ឈឿង ល្វៃ ហើយ ម៉ឺន មេឃា ក៏អាចនឹងឈ្នះ រឿម វណ្ណៈ ក្នុងភាគរយខ្ពស់បំផុតដូចគ្នា ប៉ុន្តែសម្រាប់ សួន ចាន់នី ដែលឡើងសងសឹកជាមួយ ឡុង សំណាង នោះ អាចនឹងមានការប្រទាញប្រទង់គ្នាខ្លាំង មុននឹងដឹងលទ្ធផល។
លោក សួន ប៊ុនសូត្រ គ្រូបង្វឹក និងជាឪពុករបស់ សួន ចាន់នី បាននិយាយថា៖ «កូនរបស់ខ្ញុំកំពុងហ្វឹកហាត់ត្រៀមបានល្អ ដើម្បីប្រកួតសងសឹក ដោយសង្ឃឹមនិងមានទំនុកចិត្តថា នឹងយកឈ្នះបានវិញ។ ចំណែកកាលលើកមុនប្រកួតចាញ់ក្នុងលក្ខណៈប្រផិតប្រផើយ គឺពិន្ទុ ៣ ទល់ ២ ប៉ុណ្ណោះចំណែកជំនួបលើកនេះ ខ្ញុំគិតថា ៦០ ភាគរយគឺឈ្នះ ដោយប្រើស្នៀតវ៉ៃឆ្ងាយ និងស្នៀតកែង ដោយយើងសម្រួចឲ្យបានល្អ»។
ចំណែកលោក ឡុង សាលវ័ន្ត គ្រូបង្វឹក ឡុង សំណាង បាននិយាយថា៖ «ប្រវត្តិប្រកួតគ្នារបស់កីឡាករ ២ នាក់នេះ គឺ ឡុង សំណាង ធ្លាប់ឈ្នះ ២ លើក គឺនៅការប្រកួតជើងឯកជាតិឆ្នាំ ២០១៩ ម្តង និងកាលពីសប្តាហ៍មុនម្តង ប៉ុន្តែត្រឹមពិន្ទុទាំងប្រផិតប្រផើយមែន»។ លោកបន្តថា៖ «ឡុង សំណាង ក៏មានចំណុចខ្សោយចាញ់ប្រៀបក្បាច់កែងរបស់ សួន ចាន់នី ដែរ ប៉ុន្តែបើឱបជាប់ឡើងជង្គង់វិញ សំណាង វ៉ៃជង្គង់បានលឿនជាង និងមានប្រៀបជាង ហេតុនេះខ្ញុំនៅតែមានសង្ឃឹម ៧០ ភាគរយថា ឡុង សំណាង នឹងឈ្នះ»។
ចំពោះកីឡាករ ឈឿង ល្វៃ ដែលទើបតែសាងបានភាពល្បីល្បាញក្នុងរយៈពេលមួយឆ្នាំនេះពិតជាមានមហិច្ឆតាធំ សុំសាកកម្លាំង និងបច្ចេកទេសជាមួយជើងចាស់ល្បីឈ្មោះ ឡៅ ចន្ទ្រា ប៉ុន្តែប្រភពជាច្រើនបានហៅគូនេះថា ឈឿង ល្វៃ ឡើងកំដរឆាក ឬតួសម្រាប់ចាញ់ប៉ុណ្ណោះ ព្រោះបើប្រៀបធៀបបទពិសោធជាមួយ ឡៅ ចន្ទ្រា គឺនៅខ្ចីជាងឆ្ងាយណាស់។
យ៉ាងណាក៏ដោយ យោងតាមគណៈកម្មការផ្គូផ្គងបានប្រាប់ភ្នំពេញប៉ុស្តិ៍ ថា៖ «ការផ្គូផ្គងដាក់ឲ្យប្រកួតគ្នានេះ ដោយសារ ឈឿង ល្វៃ ចាប់ផ្តើមឡើងជាលំដាប់ ដោយមួយរយៈនេះ វ៉ៃឲ្យជើងចាស់ លួន សុខខេង សន្លប់ធំ និងវ៉ៃស្មើជាមួយជើងខ្លាំង វង្ស វិឆ័យ ផងដែរ»។
កីឡាករ ឈឿង ល្វៃ ដែលពីមុនប្រើឈ្មោះ ឡុង វ៉ៃ កាលរូបគេនៅក្លិបសាលវ័ន្តកីឡា គឺធ្លាប់ឈ្នះជើងឯករងពីការប្រកួតជ្រើសរើសជើងឯកថ្នាក់ជាតិ ឆ្នាំ ២០១៩ ហើយជំនួបនេះ គេបាននិយាយថា៖ «ខ្ញុំសប្បាយចិត្ត ពេលបានប្រកួតជាមួយជើងខ្លាំង មានបទពិសោធល្អ ហើយបើចាញ់ ក៏មិនអីដែរ គឺខ្ញុំធានាវ៉ៃអស់ពីសមត្ថភាពដើម្បីអនាគត»៕