ភ្នំពេញៈ អ្នកប្រដាល់វ័យក្មេងជើងខ្លាំង ទើបតែលេចធ្លោ គួន សុវណ្ណ របស់ក្លិបយុវវាលស្បូវដែលជាប្អូនបង្កើត គួន ប៊ុនហ៊ីម បាននិងកំពុងធ្វើឲ្យអ្នកទស្សនាមានការចាប់អារម្មណ៍ ខណៈរូបគេបានយកឈ្នះអ្នកប្រដាល់ជើងថ្មី សួ ចាន់រាជ របស់ក្លិបតាព្រហ្មមានជ័យដោយពិន្ទុដាច់ ដើម្បីបានឡើងទៅប្រកួត ១៦ នាក់ចុងក្រោយនៃពាន TV5 Boxing Knock Out Serie (K-Cement) នោះ។
សម្រាប់ការប្រកួតដែលមានតែ ៣ ទឹកនោះនៅលើសង្វៀនប៉ុស្តិ៍លេខ ៥ កាលពីយប់ថ្ងៃសៅរ៍កន្លងមកនេះ សុវណ្ណ មានប្រៀបលើកីឡាករ សួ ចាន់រាជ ទាំង ៣ ទឹកដាច់តែម្ដងដែលធ្វើឲ្យ ចាន់រាជ បានខ្ទាតចេញពីវគ្គជម្រុះក្នុងរដូវកាលថ្មីនេះ។
កីឡាករ គួន ប៊ុនហ៊ីម ដែលជាបងប្រុស គួន សុវណ្ណ បានប្រាប់ឲ្យដឹងថា៖ «ទោះបីជា គួន សុវណ្ណ ជាប្អូនខ្ញុំ ប៉ុន្តែយើងនៅក្លិបផ្សេងគ្នាគឺខ្ញុំនៅក្លិបរស្មីសាមគ្គីខេត្តបាត់ដំបង ចំណែកប្អូនខ្ញុំនៅក្លិបវាលស្បូវរាជធានីភ្នំពេញ ដើម្បីស្វែងរកការប្រកួត ហើយក្នុងចំណោមអ្នកប្រដាល់ជំនាន់ក្រោយទម្ងន់ស្រាល គឺប្អូនរបស់ខ្ញុំអាចនឹងឈានចូលទៅវគ្គបន្តបន្ទាប់ ដោយខ្ញុំរំពឹងថានឹងទៅដល់វគ្គចុងក្រោយមិនខាន»។
ក្នុងប្រវត្តិប្រកួតចំនួន ៦៥ ដង គួន សុវណ្ណ បានចាញ់តែ ៤ ដងប៉ុណ្ណោះ ហើយតាមសមត្ថភាព និងការអះអាងពីបងប្រុសរបស់គេ គួន ប៊ុនហ៊ីម គឺ សុវណ្ណ អាចនឹងក្លាយជាកីឡាករល្បីក្នុងពេលអនាគត។ ទោះជាយ៉ាងណាការផ្តល់ពិន្ទុនៅសង្វៀនប៉ុស្តិ៍លេខ ៥ នៅមានកម្រិតមិនទាន់សុក្រឹតនៅឡើយ ព្រោះក្នុងចំណោមចៅក្រម ៥ រូបនៅមានចៅក្រមម្នាក់ផ្ដល់ពិន្ទុឲ្យ ចាន់រាជ ឈ្នះទៀតដែលបង្ហាញថាទង្វើបក្ខពួកនិយមមិនទាន់បានពង្រឹងល្អនៅឡើយ។
លោក ម៉ៃ សុភា គ្រូបង្វឹក គួន សុវណ្ណ បាននិយាយថា៖ «គួន សុវណ្ណ ធ្លាប់ឈ្នះចំណាត់ថ្នាក់ជយលាភីជម្រើសជាតិកន្លងមក ហើយក្នុងព្រឹតិ្តការណ៍ប្រកួតដណ្តើមខ្សែក្រវាត់នៅសង្វៀនប៉ុស្តិ៍លេខ ៥ នេះគឺសង្ឃឹមខ្ពស់នឹងអាចឈានទៅដល់វគ្គផ្តាច់ព្រ័ត្រ ព្រោះខ្ញុំកំពុងតែបង្វឹកឲ្យបានល្អ ដើម្បីពង្រឹងសមត្ថភាពយកឈ្នះឲ្យបាន»។
ជាមួយគ្នានេះអ្នកប្រដាល់វ័យក្មេង ឡុង ណងសៅ មកពីក្លិបសាលវ័ន្ដកីឡា ក៏បានឡើងទៅវគ្គ ១៦ នាក់ចុងក្រោយក្នុងព្រឹត្តិការណ៍ TV5 Boxing Knock Out Serie នេះផងដែរ បន្ទាប់ពីរូបគេបានផ្ដួលអ្នកប្រដាល់វ័យក្មេងដូចគ្នាកីឡាករ ប្រាក់ ស៊ីណាត មកពីក្លិបតាឯកដំបងដែកមានរិទ្ធ ឲ្យសន្លប់នៅទឹកទី ១ យ៉ាងងាយនោះ៕